އިންކަމް ސަޕޯޓް އެލަވަންސް 20،000 މީހުންނަށް ދޫކޮށްފި

އިންކަމް ސަޕޯޓް އެލަވަންސް މިހާތަނަށް 20000 އަށްވުރެ ގިނަ މީހުންނަށް ދޫކޮށްފިއެވެ. އިންކަމް ސަޕޯޓް އެލަވަންސްއަކީ ކޯވިޑް19އާ ގުޅިގެން އާމްދަނީއަށް އަސަރުކޮށްފައިވާ ފަރާތްތަކަށް ސަރުކާރުން ދޫކުރާ އެލަވަންސްއެކެވެ.

ފިނޭންސް މިނިސްޓްރީން އެންމެ ފަހުން އާންމުކޮށްފައިވާ ތަފާސް ހިސާބުތައް ދައްކާގޮތުން މިމަހުގެ 18 ވަނަ ދުވަހާއި ހަމައަށް އިންކަމް ސަޕޯޓް އެލަވަންސްގެ ގޮތުގައި ސަރުކާރުން ވަނީ 359.1 މިލިއަން ރުފިޔާ ދޫކޮށްފައެވެ. މިއީ ވަކިވަކި ފަރުދުންގެ ތެރެއިން 20،768 ފަރާތަކަށް ދޫކޮށްފައިވާ އެލަވަންސްގެ އަދަދެވެ.

advertisement

އެލަވަންސް ދީފައިވަނީ ތިން ބުރަކަށް ބަހާލައިގެންނެވެ. އެގޮތުން ފުރަތަމަ ބުރުގައި އެލަވަންސް ދޫކޮށްފައިވަނީ މިދިޔަ އަހަރުގެ އޭޕްރިލް، މޭ އަދި ޖޫން މަހަށެވެ. 2 ވަނަ ބުރުގައި އެލަވަންސް ދޫކޮށްފައިވަނީ ޖުލައި، އޮގަސްޓް، ސެޕްޓެމްބަރު މަހުއެވެ. 3 ވަނަ ބުރުގައި އެލަވަންސް ދޫކުރަނީ އޮކްޓޯބަރ، ނޮވެމްބަރ އަދި ޑިސެމްބަރު މަހަށެވެ. މިހާރު އެލަވަންސް ދޫކުރަމުންދަނީ ޑިސެމްބަރުމަހުގެ އެލަވަންސްއަށް އެދިފައިވާ ފަރާތްތަކަށެވެ.

އިންކަމް ސަޕޯޓް އެލަވަންސްއަކީ ކޯވިޑް-19އާ ގުޅިގެން ގިނަ ބައެއްގެ ވަޒީފާ ގެއްލުމާއި، ވިޔަފާރިތައް ހުއްޓި ޢާމްދަނީއަށް އަސަރުކުރުމާއި ގުޅިގެން، އެފަދަ ފަރާތްތަކަށް އެހީވުމަށް ސަރުކާރުން ދޭންފެށި އެލަވަންސެކެވެ. ކޯވިޑް-19ގެ ޙާލަތާއި ގުޅިގެން ޢާމްދަނީއަށް ނުރަނގަޅު އަސަރު ކޮށްފައިވާ ފަރާތްތަކަށް އިންކަމް ސަޕޯޓް އެލަވަންސްގެ ގޮތުގައި، ސަރުކާރުން ދޫކުރަނީ މަހަކު 5000 ރުފިޔާއެވެ. މިހާރު ކުރިއަށްދަނީ އިންކަމް ސަޕޯޓް އެލަވަންސް ދޫކުރުމުގެ އެންމެ ފަހު ބުރެވެ.