ތަރާވީހް ނަމާދުކުރުމަށް ރާއްޖެއިން ބޭރުން ހާފިޒުންނާއި ގާރީން ގެނައުމަށް ވިސާއެއް ދޫކުރަނީ

ކުރިއަށް އޮތް ރަމަޟާން މަހު ރާއްޖޭގެ މިސްކިތްތަކުގައި ހިފްޒުކޮށް ތަރާވީހު ނަމާދު ކުރުމަށް ރާއްޖެއިން ބޭރުން ހާފިޒުންނާއި ގާރީން ގެނައުމަށް ހާއްސަ ވިސާ ދޫކުރާނެ ކަމަށް އިމިގްރޭޝަނުން ބުނެފި އެވެ.

އިމިގްރޭޝަނުން ބުނީ ބޭރުން ހާފިޒުންނާއި ގާރިން ގެންނަން ބޭނުން ފަރާތްތަކުން ހުށަހަޅަން ޖެހޭ ލިޔުންތައް އިމުގާ ޕޯޓަލް މެދުވެރިކޮށް ހުށަހެޅުމުން ރަސްމީ ހަތް ދުވަހުގެ ތެރޭގައި ސިސްޓަމް މެދުވެރިކޮށް ހުއްދަ ލިބުނުކަން އަންގާނެ ކަމަށެވެ.

advertisement

ވީޒާއަށް އެދި ހުށަހަޅާއިރު ކައުންސިލް އިދާރާއިން ފުރިހަމަކުރަންޖެހޭ “ސްޕެޝަލް ވީޒާ”އަށް އެދޭފޯމާއި ވީޒާއަށް އެދޭ ފަރާތުގެ މަޢުލޫމާތު ފޯމާއި، މިނިސްޓްރީ އޮފް އިސްލާމިކް އެފެއަރޒްއިން ދޫކުރާ ހުއްދައިގެ އިތުރުން ބިދޭސީ ފަރާތުގެ “ޕާސްޕޯޓް ޑާޓާ ޕޭޖް”ގެ ކުލަ ކޮޕީ އަދި ބިދޭސީ މީހާގެ ޕާސްޕޯޓް ފޮޓޯ ހުށަހަޅަންޖެހޭނެކަމަށް އިމިގްރޭޝަނުން މަޢުލޫމާތުދެއެވެ.

ރާއްޖެ ގެންނަ ފަރާތުގެ އާއިލާގެ މެންބަރަކު(އަނބިން/ދަރިން) ގެންނަނަމަ، އެ ފަރާތްތަކަށް ދަތުރުކުރެވޭނީ ޙާފިޒު/ޤާރީ ގެންނަ އިދާރާއަކުން އެމީހުން ސްޕޮންސަރކޮށްގެންނެވެ. އިމިގްރޭޝަނުން ވިދާޅުވީ މި ފަރާތްތަކަށް ދޫކުރާނީ 30 ދުވަހުގެ ޓުއަރިސްޓް ވީޒާއެއްކަމަށެވެ. އަދި 30 ދުވަހަށްވުރެ އިތުރުވާނަމަ، ވީޒާ ހަމަވުމުގެ ކުރިން މުއްދަތު އިތުރުކުރަންޖެހޭނެކަމަށް އިމިގްރޭޝަނުން ބުނެއެވެ.

އެ މީހުން ރާއްޖޭގައި ތިބޭ މުއްދަތުގައި ވިސާގެ ކަންކަން ގަވާއިދާ އެއްގޮތަށް ފުރިހަމަ ކުރުމަކީ އެފަރާތްތައް ރާއްޖެ ގެންނަ ފަރާތެއްގެ ޒިންމާއެއް ކަމަށްވެސް އިމިގްރޭޝަނުން ބުންޏެވެ.