އިންޑިއާގައި އުފައްދާ ކޮވިޑް-19 ވެކްސިންގެ ތިންވަނަ ކޮންސައިންމަންޓް ދިވެހިރާއްޖެއަށް ގެނެސްފި

ދިވެހި ރައްޔިތުންނަށް ވެކްސިންގެ ދެވަނަ ޑޯޒް ޖެހުމުގެ މަރުހަލާ ފެށުމަށްޓަކައި އިންޑިއާ ގައި އުފައްދާ، އަދި ދުނިޔޭގެ ސިއްހަތު ޖަމިއްޔާއިން އެޕްރޫވް ކޮށްފައިވާ ކޮވިޑް-19 ވެކްސިންގެ 100،000 ޑޯޒްގެ ކޮންސައިންމެންޓެއް މިއަދު ވަނީ ދިވެހިރާއްޖެއާއި ހަވާލުކުރެވިފައެވެ. އިންޑިއާގެ އެކްސްޕޯޓް ރިސްޓްރިކްޝަންތަކާއި ޑޮމެސްޓިކް ރިކުއަމެންޓް އާއި އެކުގައިވެސް، ދިވެހި ސަރުކާރާއި އިންޑިއާގެ ސިރަމް އިންސްޓިޓިއުޓްގެ މެދުގައި ސޮއި ކުރެވިފައިވާ ކޮމާޝަލް އެއްބަސްވުމެއްގެ ދަށުން، އިންޑިއާއިން މިވަނީ ދިވެހިރާއްޖެއަށް ވެކްސިން ފޯރުކޮށްދިނުމުގައި އެހީތެރިވެފައެވެ.

އިންޑިއާއިން އެންމެ ފުރަތަމަ ވެކްސިން ހަދިޔާކުރި ގައުމަކީވެސް ދިވެހިރާއްޖެއެވެ. އެގޮތުން، އިންޑިއާގައި ވެކްސިން ޖަހަން ފެށުނުތާ 96 ގަޑިއިރުގެ ތެރޭގައި، 20 ޖަނަވަރީ 2021 ގައި 100،000 ޑޯޒް ވަނީ ދިވެހިރާއްޖެއަށް ހަދިޔާކޮށްފައެވެ. މި ކޮންސައިންމެންޓްގެ ސަބަބުން ދުނިޔޭގައި އެންމެ ހަލުވިމިނުގައި ވެކްސިން ޑްރައިވް ހިންގާ އެއް ގައުމަކަށް ރާއްޖެވެގެންދިއުމަށާއި، ރާއްޖޭގެ އާބާދީގެ ގާތްގަނޑަކަށް 50 އިންސައްތަ މީހުންނަށް ވެކްސިންގެ ފުރަތަމަ ޑޯޒް ޖެހުމަށް މަގުފަހި ވެގެންދިއައެވެ. އަދި 20 ފެބްރުއަރީ 2021 ގައި އިންޑިއާގެ އެކްސްޓާނަލް އެފެއާޒް މިނިސްޓަރ ޑރ. ޖެއިޝަންކަރު ދިވެހިރާއްޖެއަށް ކުރެއްވި ރަސްމީ ދަތުރުފުޅުގެ ތެރޭގައި ވެކްސިންގެ އިތުރު 100،000 ޑޯޒް ވަނީ ހަދިޔާކުރެވިފައެވެ.

advertisement

މިއަދުގެ މި ކޮންސައިންމެންޓާއި އެކު އިންޑިއާއިން މިވަނީ ދިވެހިރާއްޖެއަށް ވެކްސިން ސަޕްލައި ކުރުމަށް އެހީތެރިވުމަށް ވެވުނު ކޮމިޓްމެންޓް ފުރިހަމަކޮށްފައެވެ. އަދި ވެކްސިން ކޮންސައިންމެންޓް ލިބުމާއިއެކު، ދިވެހި ރައްޔިތުންނަށް ވެކްސިންގެ ދެވަނަ ޑޯޒް ޖަހަން ވަރަށް އަވަހަށް ފެށޭނެކަމަށް އުންމީދުކުރެވެއެވެ.

16 ޖަނަވަރީ 2021 ގައި އިންޑިއާގެ ވެކްސިން ޑްރައިވް އިފްތިތާހު ކުރައްވަމުން ބޮޑު ވަޒީރު ނަރޭންދްރަ މޯދީ ވިދާޅުވިގޮތުގައި: “މިއަދު އިންޑިއާއިން އަމިއްލަ ވެކްސިންއެއް އުފައްދާފައިވީހިނދު، ދުނިޔެ ދަނީ އުންމީދީ ނަޒަރަކުން އިންޑިއާއަށް ބަލަމުންނެވެ. އަދި އަހަރެމެންގެ ވެކްސިން ޑްރައިވް ކުރިއަށް ދާހެން، އެހެން ގައުމުތަކަށް ވެސް މި ވެކްސިންގެ ފައިދާ ލިބިގެންދާނެއެވެ. އިންޑިއާގެ ވެކްސިންއާއި ވެކްސިން އުފެއްދުމުގެ ގާބިލުކަން ބޭނުން ކުރަންވާނީ މުޅި އިންސާނިއްޔަތަށް ފައިދާވާހެން؛ މިއީ އަހަރެމެންގެ ކޮމިޓްމެންޓް އެވެ.”

އަދި ހަމަ ވިދާޅުވިގޮތަށް، އެންމެ ދެމަސް ދުވަހުގެ ތެރޭގައި އިންޑިއާއިން މިވަނީ މިޝަން ‘ވެކްސިން މެއިތިރީ’ ގެ ދަށުން އިންޑިއާއިން އުފައްދާފައިވާ ވެކްސިންގެ 60 މިލިއަން ޑޯޒް، ހަދިޔާގެ ގޮތަށާއި ކޮމާޝަލް އެއްބަސްވުމުގެ ދަށުން 70 ގައުމަކަށް ފޯރުކޮށްދީފައެވެ.

އިންޑިއާއާއި ދިވެހިރާއްޖޭގެ މެދުގައި ވަނީ ވަރަށްވެސް ޒަމާންވީ ގުޅުމެކެވެ. އަދި އިންޑިއާގެ ‘ނެއިބަހުޑް ފަސްޓް’ ޕޮލިސީ އާއި ދިވެހި ސަރުކާރުގެ ‘އިންޑިއާ ފަސްޓް’ ޕޮލިސީގެ ސަބަބުން ދެގައުމުގެ ރައްޔިތުންނަށް އެތައް ފައިދާތަކެއް ދަނީ ލިބެމުންނެވެ. އަދި ރައީސް ސޯލިހާއި ބޮޑު ވަޒީރު މޯދީގެ އިސްނެންގެވުމުގެ ދަށުން މި ގުޅުން ވަނީ އިތުރަށް ބަދަހި ވެފައެވެ. ކޮވިޑް-19 ބަލިމަޑުކަމުގެ ތެރޭގައި އިންޑިއާ އާއި ދިވެހިރާއްޖެއިން އެކުގައި ކުރެވިފައިވާ މަސައްކަތުގެ ސަބަބުންނާއި، އަދި ޕެންޑެމިކްގެ ފުރަތަމަ ދުވަސްކޮޅު އިންޑިއާއިން ފޯރުކޮށްދިން އެހީތެރިކަމުގެ ސަބަބުން ދެގައުމުގެ ގުޅުމަށް އިތުރު އާރޯކަމެއް ވަނީ ލިބިފައެވެ.