އިންތިހާބު ކާމިޔާބު ކުރެވިއްޖެނަމަ ލާމަރުކަޒީ ނިޒާމް ފުރިހަމަކުރެވޭނެ – ރައީސް

ކުރިއަށްއޮތް ލޯކަލް ކައުންސިލްތަކުގެ އިންތިޚާބު އެމްޑީޕީއަށް ކާމިޔާބުކުރެވިއްޖެނަމަ ކުރިއަށްއޮތް އަހަރުތަކުގައި ލާމަރުކަޒީ ނިޒާމު ފުރިހަމަކުރުމުގައި ބޮޑުކާމިޔާބީއެއް ހޯދޭނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. ރައީސް މިހެން ވިދާޅުވީ، އެމްޑީޕީން އިންތިޒާމުކޮށްގެން ކައުންސިލް އިންތިޚާބުގައި ވާދަކުރާ ކެނޑިޑޭޓުންނާއެކު ބޭއްވި ހަރަކާތް ނިންމާލުމުގެ ގޮތުން ވާހަކަފުޅުދައްކަވަމުންނެވެ.

ކޯވިޑް-19ގެ ދަތި ދަނޑިވަޅުގައިވެސް ރައްޔިތުންގެ ދިރިއުޅުމުގެ ޙާލަތު ރަނގަޅުކުރުމައްޓަކައި ރައްޔިތުންނަށް ބޭނުންވާ އަސާސީ ބޭނުންތައް ފުރިހަމަކުރުމާއި، މާލީ ގޮތުން ރައްޔިތުން ފުދުންތެރިކުރުމަށް ސަރުކާރުން ޚާއްސަ އިސްކަމެއް ދެއްވިކަމަށް ރައީސް ވިދާޅުވިއެވެ. ރައީސް ވިދާޅުވީ، ޕީއެސްއައިޕީގެ މުޅި ޕްރޮޖެކްޓަށް، ސަރުކާރުގެ ބަޖެޓުން 8.8 ބިލިޔަން ރުފިޔާ މިދިޔަ އަހަރު ޚަރަދުކޮށްފައިވާކަމަށެވެ.

advertisement

ރައީސް ވިދާޅުވީ ކޯވިޑް-19އާ ގުޅިގެން ސްކޫލްތަކުގެ ނާސްތާ ޕްރޮގްރާމް މެދުކަނޑާލިއިރު، 139 މިލިޔަން ރުފިޔާ އެކަމަށް ޚަރަދުކުރެވިފައިވާކަމަށެވެ. މީގެ އިތުރުން ކޯވިޑް-19އާ ގުޅިގެން ދިމާވި މާލީ ދަތިތައް ހައްލުކުރުމަށް 628 ފަރާތަކަށް 771.6 މިލިޔަން ރުފިޔާގެ އެސްއެމްއީ ލޯނު ދެވިފައިވާކަންވެސް ރައީސް ފާހަގަކުރެއްވިއެވެ.