ގަރލްސް ޓު ކޯޑް ތިނަދޫ ސީރީސްގެ ދެވަނަ ޕްރޮގްރާމް ނިންމާލައިފި

ދިރާގާއި ވިމެން އިން ޓެކް މޯލްޑިވްސް ގުޅިގެން ކުރިއަށް ގެންދިޔަ ގަރލްސް ޓު ކޯޑް ތިނަދޫ ސީރީސްގެ ދެވަނަ ޕްރޮގްރާމް ނިންމާލައިފިއެވެ. މި ޕްރޮގްރާމް ކުރިއަށްގެންގޮސްފައިވަނީ މިއަހަރުގެ ޖަނަވަރީ މަހުގެ 12 ވަނަ ދުވަހުން މާރޗް 15 ވަނަ ދުވަހުގެ ނިޔަލަށެވެ.

ގަރލްސް ޓު ކޯޑް ތިނަދޫ ސީރީސްގެ ދެވަނަ ޕްރޮގްރާމް ނިންމުމުގެ ހަފްލާ ބާއްވާފައިވަނީ ވާރޗުއަލްކޮށްނެވެ. މި ހަފްލާގައި ޕްރޮގްރާމްގެ ބައިވެރިންނާއި އެކުދިންގެ ބެލެނިވެރިން އަދި ދިރާގުގެ އިސްވެރިންނާއި ވިމެން އިން ޓެކްގެ ފަރާތުން ވަނީ ބައިވެރިވެފައެވެ.

advertisement

މި ޕްރޮގްރާމް ނިންމުމުގެ ގޮތުން ބޭއްވި ހަފްލާގައި، ޕްރޮގްރާމް ފުރިހަމަކުރި ދަރިވަރުންނަށް ސެޓްފިކެޓް ވަނީ ހަވާލު ކުރެވިފައެވެ. އަދި ކޯހުގެ ބައެއްގެ ގޮތުގައި ދަރިވަރުން ތައްޔާރުކުރި ވެބްސައިޓްތަކުގެ ތެރެއިން ފާހަގަކޮށްލެވޭ 3 ވެބްސައިޓްވެސް ދައްކާލެވުނެވެ. މިއަހަރު ހިންގުނު މިޕްރޮގްރާމްގައި 14 އަހަރާއި 20 އަހަރުގެ އުމުރުފުރައިގެ ކޯޑިންގއަށް މުޅިން އައު، ޖުމްލަ 17 ދަރިވަރުން ވަނީ ގ.ދ ތިނަދޫ އިން ބައިވެރިވެފައެވެ.

ޕްރޮގްރާމް ނިންމުމުގެ ހަފްލާގައި ދިރާގުގެ ޑައިރެކްޓަރ ކޯޕަރޭޓް ސަރވިސަސް އާތިފާ ޢަލީ ވިދާޅުވީ ޕްރޮގްރާމުގައި ދަސްވި ހުނަރުތަކާއެކު ބައިވެރިން މުސްތަގުބަލުގައި ކުރިއަށްދާނެކަމަށް އުންމީދުކުރާކަމަށެވެ. މީގެ އިތުރުން ދިރާގާއި ގުޅިގެން ވިމެން އިން ޓެކް މޯލްޑިވްސް އިން ޓެކް ދާއިރާގައި އަންހެން ކުދިންގެ ބައިވެރިވުން އިތުރުކުރުމަށް ކުރާ މަސައްކަތް ފާހަގަކޮށް އޭނާ ވަނީ މަރުހަބާ ވިދާޅުވެފައެވެ.

ޕްރޮގްރާމްގެ ޝަރަފުވެރި މެހެމާނު، ގދ. އަތޮޅު ތަޢުލީމީ މަރުކަޒުގެ ޕްރިންސިޕަލް މުޙައްމަދު ޝިފާޒު، ޕްރޮގްރާމްގެ ބައިވެރިންނަށް ދެއްވި މެސެޖުގައި ވިދާޅުވީ މި ޕްރޮގްރާމުން ދަސްކުރެވުނު ކޯޑިންގ ސްކިލްއަކީ ކުދިންގެ މުސްތަގްބަލުގައި ވަޒީފާއަކާ ހަމައަށް ދާއިރުގައި ވެސް ނުވަތަ އަމިއްލަ މަސައްކަތެއް ކުރިނަމަވެސް ފައިދާހުރި އަދި ބޭނުން ހިފޭނެ ހުނަރެއްކަމަށެވެ. އަދި ކޯޑިންނާއި ޓެކްނޮލޮޖީގެ ހުނަރަކީ ކުދިންގެ ވިސްނުން އިތުރަށް ތަރައްގީ ކުރުމަށް ލިބިދޭ ބާރެއްކަމަށެވެ.