ފެބްރުއަރީ މަހު ރާއްޖޭގެ އިންފްލޭޝަން %0.05 ދަށްވެއްޖެ

މިދިޔަ ފެބްރުއަރީ މަހު ރާއްޖޭގެ އިންފްލޭޝަން ނުވަތަ މުދަލާއި ޚިދުމަތުގެ އަގު 0.05 އިންސައްތަ ދަށަށް ހިނގައްޖެއެވެ.

ނޭޝަނަލް ބިއުރޯ އޮފް ސްޓެޓިސްޓިކްސް އިން އާއްމު ކުރި ކޮންސިއުމާ ޕްރައިސް އިންޑެކްސް ދައްކާ ގޮތުގައި ފެބްރުއަރީ މަހު ރާއްޖޭގެ އިންފްލޭޝަން ވަނީ 0.05 ޕަސެންޓް ދަށްވެފަ އެވެ. އޭގެ ކުރީން ޖެނުއަރީ މަހު އިންފްލޭޝަން ހުރީ 0.25 ޕަސެންޓް މަތީގަ އެވެ.

advertisement

މަހުގެ އަގު ތަކަށް އައި ބަދަލު ނުހިމަނައި ބަލައިފިނަމަ ފެބުރުއަރީ މަހު އިންފްލޭޝަން ރޭޓް ހުރީ 0.02 ޕަސެންޓްގަ އެވެ. މި އަދަދު ފާއިތުވި ޖަނަވަރީ މަހު ހުރީ 0.38 ޕަސެންޓުގަ އެވެ.
ފެބްރުއަރީ މަހު މައިގަނޑު ގޮތެއްގައި އަގުތައް ދަށަށް ގޮސްފައިވާ ބާވަތްތަކުގެ ތެރޭގައި މޯބައިލް ފޯނުގެ މުވާސަލާތީ ހިދުމަތް ހިމެނެ އެވެ. މުވާސަލާތީ ޚިދުމަތް 4.62 ޕަސެންޓް ވަނީ ދަށްވެފައެވެ. އަދި ގޭގައި ހިފާ ގެންގުޅޭ ސާމާނު 3.56 ޕަސެންޓް ވަނީ ދަށްވެފައެވެ. މީގެއިތުރުން ގޭގެ ކުލިން 0.10 ޕަސެންޓް ދަށްވެފައިވާކަމަށްވެސް ތަފާސްހިސާބުތަކުން ދައްކައެވެ.

އަގުމަތިވެފައިވާ ތަކެތީގެ ތެރޭގައި ކާބޯތަކެތި ހިމެނެއެވެ. އެގޮތުން މޭވާއިން 4.64 ޕަސެންޓް އަދި ބިހާއި ކިރު ފަދަ ތަކެތީގެ ބައިން 1.04 ޕަސެންޓް މަތިވެފައިވެ އެވެ. ތަރުކާރީގެ ބައިން 1.54 ޕަސެންޓު މަތިވެފައިވާކަމަށް ތަފާސްހިސާބުތައް ދައްކައެވެ.