ރައްކާތެރިކަމުގެ ފިޔަވަޅުތައް އުވާލުމުން ރައީސް މައުމޫން ކަންބޮޑުވުން ފާޅުކުރައްވައިފި

ކޮވިޑް-19 އިން ރައްކާތެރިވާން އަޅާފައިވާ ފިޔަވަޅުތަކަށް ލުއި ދިނުމުން ކުރީގެ ރައީސް މައުމޫން އަބްދުލްގައްޔޫމް ކަންބޮޑުވުން ފާޅު ކުރައްވައިފި އެވެ.

ރައީސް މައުމޫން ކުރެއްވި ޓްވީޓެއްގައި ވަނީ ފިޔަވަޅުތަކަށް ލުއި ނުދީ ހަރުކަށި ކުރަން ގޮވާލާފައެވެ. ރައީސް މައުމޫން ވަނީ ކޮވިޑްގެ ނުރައްކާ ބޮޑުވެ ހާލަތު ގޯސްވުމުގެ ކުރިން އެކަމަށް ސަމާލުވާން ވެސް އިލްތިމާސް ކުރައްވާފަ އެވެ.

advertisement

ކޯވިޑް19 އިން ރައްކާތެރިވުމަށް އެޅި ގިނަ ފިޔަވަޅުތަކަށް އެޗްޕީއޭއިން މިހާރު ވަނީ ލުއިދީފައެވެ. އެގޮތުން ކެފޭ ރެސްޓޯރަންޓްތައް ހުޅުވާފައި ބެހެއްޓޭ ވަގުތު އިތުރުކޮށް ވެހިކަލް މަނާ ވަގުތު ވަނީ އުވާލާފަ އެވެ. އަންނަ މަހު ސުކޫލުތައް ހުޅުވާން ނިންމާފައިވާއިރު މާލެ ސަރަހައްދުގައި އިއުލާންކޮށްފައިވާ ކާފިއުވެސް މިހާރު ވަނީ އުވާލާފައެވެ. އަދި ސިނަމާތަކާއި ފިލްމު ތިއޭޓަރުތައް ހުޅުވުމުގެ ހުއްދަ ދިނުމާއެކު ޔުނިވާސިޓީތަކާއި ކޮލެޖުތަކަށް ދަރިވަރުން ހާޒިރުވެ ކުލާސްތައް ކުރިއަށް ގެންދަން ވެސް ވަނީ ހުޅުވާލާފަ އެވެ.

އެޗްޕީއޭއީން ކާފިއު އުވާލާއި ލުއި ދިން ނަމަވެސް އެއްފަހަރާ ފަސް މީހުންނަށް ވުރެ ގިނައިން މަގުމައްޗަށް އެއްވެ އުޅުމާއި އެކަނި ކުރާ ކަސްރަތުތައް ފިޔަވައި، ކުޅިވަރުގެ ހަރަކާތްތަކާއި ކަސްރަތުގެ ހަރަކާތްތައް ހުއްޓައިލުމަށް އެނގި އެންގުން ނިމުމަކަށް ނުގެނެ އެވެ. އަދި މާލެ ޕާޓީތަކާއި ހަފުލާތަކާއި ރަސްމިއްޔާތުތައްވެސް ނުބޭއްވެ އެވެ. މާލެ ސަރަހައްދުން ރާއްޖޭގެ އެހެން ރަށްރަށަށް ދަތުރުކުރާ ފަރާތްތައް ކަރަންޓީނު ވާން ޖެހެ އެވެ.

ކޯވިޑް19 އިން ރައްކާތެރިވުމަށް އެޅި ފިޔަވަޅުތަކަށް ލުއިދީފައިވާއިރު ކޯވިޑްގެ ކޭސްތައް ފެންނަ މިންވަރު އަނެއްކާވެސް އަންނަނީ އިތުރުވަމުންނެވެ. އެގޮތުން ފާއިތުވި 24 ގަޑިއިރުގެ ތެރޭގައިވެސް ރާއްޖެއިން 169 މީހަކު ވަނީ މި ބައްޔަށް ޕޮޒިޓިވް ވެފައެވެ. އަދި އޭގެ ކުރީދުވަހު 300 މީހުން ވަނީ ޕޮޒިޓިވް ވެފައެވެ.