ރާއްޖޭގެ 86,000 އަށްވުރެ ގިނަ މީހުން ހިމެނޭހެން އެފްބީގެ ޒާތީ މައުލޫމާތު ލީކްކޮއްލައިފި

ފޭސްބުކް ބޭނުންކުރާ 500 މިލިޔަނަށް ވުރެ ގިނަ މީހުންގެ ޒާތީ މައުލޫމާތު ހިލޭ ލިބޭ ގޮތަށް އިންޓަނެޓްގައި ލީކްކޮށްލައިފި އެވެ. ލީކް ކޮށްލާފައިވާ މައުލޫމާތުގެ ތެރޭގައި ރާއްޖޭގެ 86،000 ވުރެ ގިނަ މީހުންގެ މައުލޫމާތު ހިމެނޭކަމަށް ބޭރުގެ މީޑިއާތަކުން އިނގެއެވެ.

ލީކްކޮށްލި މައުލޫމާތުތަކުގެ ތެރޭގައި ފޭސްބުކްގައި މީހުން ބޭނުންކުރާ ފޯނު ނަމްބަރުތަކާއި ބައެއް ޕްރޮފައިލްތަކާ ގުޅިފައިވާ އީމެއިލް އެޑްރެސްތަކާއި އަދި މީހުން ތިބި ތަންތަނުގެ މައުލޫމާތެވެ. އޭގެ އިތުރުން މީހުންގެ އައިޑީތަކާއި ފުރިހަމަ ނަން ވެސް އޭގެ ތެރޭގައި ހިމެނެ އެވެ.

advertisement

ލީކްކޮށްލާފައިވާ މައުލޫމާތުތަކަކީ 2019 ވަނަ އަހަރު ފޭސްބުކުން ވަގަށް ނަގާފައިވާ މައުލޫމާތުތަކެކެވެ. އެ މައުލޫމާތު ހޯދި މީހުން ކުރިން އުޅުނީ ޓެލެގްރާމް ބޮޓެއް ބޭނުންކޮށްގެން މައުލޫމާތު ވިއްކާށެވެ. އެކަމަކު މިފަހަރު އެ ހުރިހާ މައުލޫމާތެއް އިންޓަނެޓަށް ދޫކޮށްލީ ބޭނުން ކޮންމެ މީހަކަށް ހިލޭ ލިބޭ ގޮތަށެވެ.

އިންޓަނެޓަށް ދޫކޮށްލި 500 މިލިޔަނަށް ވުރެ ގިނަ މީހުންގެ މައުލޫމާތުގެ ތެރޭގައި 106 ގައުމެއްގެ މީހުން ހިމެނޭ އިރު، އެމެރިކާ އާއި ޔޫރަޕްގެ ގިނަ އަދަދެއްގެ މީހުން އޭގެ ތެރޭގައި ހިމެނެ އެވެ. އެގޮތުން އެމެރިކާގެ 32 މިލިއަން މީހެއްގެ މައުލޫމާތާއި ޔޫރަޕްގެ 11 މިލިޔަން މީހުން އަދި އިންޑިއާގެ ހަ މިލިޔަން މީހުންގެ މައުލޫމާތު އޭގެ ތެރޭގައި ހިމެނެ އެވެ.