ޑިޕްލޮމާ އިން ރޭޑިއޮގްރަފީ ކޯސްތަކެއް ފަށަނީ

ހެލްތު މިނިސްޓްރީން އެސްޓީއޯއާއި އެމްއެންޔޫ ގުޅިގެން ދިވެހިންނަށް ހާއްސަ “ޑިޕްލޮމާ އިން ރޭޑިއޮގްރަފީ” ކޯސް އިއުލާންކޮށްފި އެވެ. މި ކޯސް ރަސްމީކޮށް އިފްތިތާޙްކޮށްދެއްވީ ރައީސުލްޖުމްހޫރިއްޔާގެ ނައިބު ފައިޞަލް ނަސީމެވެ.

މި ރަސްމިއްޔާތުގައި ވާހަކަދައްކަވަމުން މިނިސްޓަރ ނަސީމް ވިދާޅުވީ، ޞިއްޙީ ދާއިރާގައި ފަންނީ މަޤާމުތަކުގައި މަސައްކަތް ކުރާ މީހުންގެ ގާތްގަނޑަކަށް 95 އިންސައްތައަކީ ބިދޭސީންކަމަށެވެ. ރޭޑިއޯގްރާފަރުންގެ ގޮތުގައި މަސައްކަތް ކުރާ މީހުންނަށް އެކަނި ބެލިނަމަވެސް އަތޮޅުތަކުގައި ޞިއްޙީ ޚިދުމަތްދޭ 20 ތަނެއްގައި މަސައްކަތްކުރާ 37 ރޭޑިއޯގްރާފަރުންގެ ތެރޭގައި ހިމެނެނީ އެންމެ 3 ދިވެހިންކަން މިނިސްޓަރ ފާހަގަކުރެއްވިއެވެ. އަދި އައި.ޖީ.އެމް.އެޗްގައި 20 ރޭޑިއޯގްރާފަރުން މަސައްކަތްކުރާއިރު، އޭގެތެރޭގައި ހިމެނެނީ އެންމެ ދިވެއްސެއްކަމަށްވެސް މިނިސްޓަރ ވިދާޅުވިއެވެ.

advertisement

ހެލްތު މިނިސްޓްރީގެ އިރުޝާދާއެކު ކުރިއަށްގެންދާ އެ ކޯސް އިފްތިތާހުކުރަން ބޭއްވި ރަސްމިއްޔާތުގައި އެސްޓީއޯގެ މެނޭޖިން ޑިރެކްޓަރު ހުސައިން އަމްރު ވިދާޅުވީ، އެ ކޯސްތައް ފަށާނީ މެއި މަހުގައި ކަމަށެވެ. ރޭޑިއޯގްރަފީގެ ދާއިރާއަކީ މުސާރަ ބޮޑު ދާއިރާއެއްކަމަށާއި، އެކަށީގެންވާ ފުރުޞަތުތައް ތަނަވަސްކޮށްދެވިއްޖެނަމަ ދިވެހިންވެސް ވަޒީފާ އަދާކުރުމަށް ޝަޢުގުވެރިވާނެ ދާއިރާއެއްކަމަށެވެ. އަމްރު ވިދާޅުވީ އެމް.އެން.ޔޫއާއި ގުޅިގެން މި ކޯސް އަންނަ މެއިމަހު ފެށުމަށް ތައްޔާރުވަމުންދާކަމަށް އަމްރު ވިދާޅުވިއެވެ.

މި ކޯސް ކުރިއަށް ގެންދިޔުމަށް ހަމަޖެހިފައިވަނީ ޖީއީ ހެލްތް ކެއަރގެ ކަރިކިއުލަމްއަކަށް “ފުލްޓައިމް” ކޯހެއްގެ ގޮތުގައިއެވެ. އަދި ކޯސް ފުރިހަމަކުރާ ފަރާތްތަކުން މޯލްޑިވްސް ނެޝަނަލް ޔުނިވަރސިޓީ އިން ހިންގާ ޑިގްރީ ޕްރޮގްރާމްގައި ބައިވެރިވުމުގެ ފުރުސަތު ލިބިގެންދާނެއެވެ. އަދި މި ކޯސް ކުރިއަށްދާނީ ކްލާސްރޫމް ގަޑިތަކުގެ އިތުރުން ލެބް ޓްރެއިނިންގތައްވެސް ހިމަނައިގެންނެވެ.

މިއީ މޯލްޑިވްސް ކޮލިފިކޭޝަންސް އޮތޯރިޓީގެ މިންގަނޑުތަކާއި އަދި މޯލްޑިވްސް އެލައިޑް ހެލްތް ކައުންސިލްގެ މިންގަނޑުތަކާއި އެއްގޮތަށް ކުރިއަށްގެންދާ ކޯހެކެވެ. އަދި މި ކޯހުން ފާސްވާ ބައިވެރިންނަށް ލެވެލް 5 ގެ ނެޝަނަލް ސެޓްފިކެޓްއެއް ލިބިގެންދާނެއެވެ.