ހިޔާ ފްލެޓްތައް ގުރުއަތުނެގުން މާދަމާ

ހިޔާ މަޝްރޫޢުގެ ދަށުން ފްލެޓް ލިބޭ މީހުންގެ މެދުގައި ގުރުއަތު ނެގުން މިމަހުގެ 8 ވާ ބުރާސްފަތި ދުވަހު އޮންނާނެކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗް.ޑީ.ސީ)އިން ވިދާޅުވެއްޖެއެވެ.

އެޗް.ޑީ.ސީން ވިދާޅުވީ، ސަރުކާރުން ރައްޔިތުންނަށް ބޯހިޔާވަހިކަން ފޯރުކޮށް ދެއްވުމަށް ހިންގަވާ މަޝްރޫޢުގެ ދަށުން ހުޅުމާލެ ދެވަނަ ފިޔަވަހީ އިމާރާތް ކޮށްފައިވާ 6720 ފުލެޓް ލިބިފައިވާ ފަރާތްތަކަށް، ލިބެނީ ކޮން ފުލެޓެއްކަން ކަނޑައެޅުމަށްޓަކައި ފުލެޓް ލިބުނު ފަރާތްތަކުގެ މެދުގައި ގުރުއަތުލާ، އެފަރާތްތަކަށް ލިބޭ ފުލެޓް ކަނޑައެޅުމުގެ މަސައްކަތް ކުރިޔަށް ގެންދިއުމަށް ސަރުކާރުން އެ ކޯޕަރޭޝަނާ ޙަވާލުކޮށްފައިވާކަމަށެވެ.

advertisement

އެހެންކަމުން ހިޔާ ފްލެޓުގެ ގުރުއަތު ނެގުން މިމަހުގެ 8ވާ ބުރާސްފަތި ދުވަހު ފެށުމަށް ހަމަޖެހިފައިވާކަމަށެވެ. އެންމެ ފުރަތަމަ ގުރުއަތު ނަގާނީ ޚާއްޞަ އެހީއަށް ބޭނުންވާ މީހުންގެ ކެޓެގަރީކަމަށްވާ H10 ކެޓެގަރީއެވެ. އެގޮތުން އަންނަ ބުރާސްފަތި ދުވަހުގެ ހެދުނު 9:00އިން ފެށިގެން H10 ކެޓަގަރީ ލިސްޓުގައިވާ އެންމެންގެ ގުރުއަތު ނަގައިނިމެންދެން ގުރުއަތުލުން އެ ދުވަހު ކުރިއަށްގެންދާނެކަމަށް އެޗް.ޑީ.ސީން ވިދާޅުވެއެވެ. އަދި ގުރުއަތުލުން ކުރިއަށްދާނީ، H10 ކެޓަގަރީން ފުލެޓް ލިބިފައިވާކަމަށް ސަރުކާރުން ކަނޑައަޅުއްވާފައިވާ ލިސްޓުގައި ހިމެނޭ މީހުންގެ އައި.ޑީ ކާޑުގެ ނަމްބަރު ތަރުތީބުންނެވެ. ގުރުއަތު ނަގާނީ، ފުލެޓް ނަމްބަރު ކަރުދާސް ކޮޅުތަކެއްގައި ފޮށްޓަކަށް އެޅުމަށްފަހު ލިސްޓްގައި ހިމެނޭ މީހުންގެ އައި.ޑީ.ކާޑު ނަމްބަރު ތަރުތީބުންނެވެ.

މިދުވަސްވަރަކީ ކޯވިޑް-19ގެ ދުވަސްވަރު ކަމަށްވާތީ އެޗް.ޕީ.އޭގެ ގައިޑްލައިނާއި އެއްގޮތްވާ ގޮތުގެމަތިން ގުރުޢަތު ނަގާ ހޯލަށް ދަޢުވަތު ދެވިގެންވަޑައިގަންނަވާ އޮބްޒާވަރުންނަށް ވަނުމުގެ ފުރުޞަތު ދެވޭނެކަމަށާއި، ގުރުޢަތު ނަގާއިރު، ނެގުނު ފުލެޓާއި، ފުލޯއާއި ޓަވަރު އިނގޭގޮތަށް ޓީވީ ސްކްރީނުން ލައިވްކޮށް ދައްކާނެކަމަށް އެޗްޑީސީން ވިދާޅުވެއެވެ. ފުލެޓް ލިބުނު މީހުން ދީފައިވާ ފޯނުނަމްބަރަށް އެސް.އެމް.އެސްއެއް ލިބޭނެކަމަށާ، މި އެސް.އެމް.އެސްގައި ނެގުނު ފުލެޓް، ޓަވަރު، އަދި ފުލޯ ހިމެނިފައިވާނެކަމަށާއި، އެސް.އެމް.އެސްއާއެކު ފޮނުވާ ލިންކަށް ކްލިކް ކޮއްލުމުން ގުރުއަތުން ނެގުނު ފުލެޓްގެ އިތުރު މަޢުލޫމާތު ފެންނާނެކަމަށް އެޗް.ޑީ.ސީން ވިދާޅުވެއެވެ.