މި ސަރުކާރުގެ ފުރަތަމަ ބޯހިޔާވަހިކަމުގެ މަޝްރޫއު އަށް ކުރިމަތިލުމަށް އަންނަ މޭމަހު ހުޅުވާލަނީ

މި ސަރުކާރުގެ ފުރަތަމަ ބޯހިޔާވަހިކަމުގެ މަޝްރޫއު އަށް ކުރިމަތިލުމުގެ ފުރުސަތު އަންނަ މެއި މަހު ހުޅުވާލާނެކަން ސަރުކާރުން ހާމަކުރައްވައިފިއެވެ.

ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ހައުސިންގ މިނިސްޓަރ މުހައްމަދު އަސްލަމް ވިދާޅުވީ މި މަޝްރޫއުއަށް ކުރިމަތިލުމަށް މެއި މަހު ހުޅުވާލާނެ ކަމަށެވެ. މިއީ މާލޭގެ ރައްވެހިންނަށް އަމާޒުކޮށްގެން ހިންގާ މަޝްރޫއު އެކެވެ.

advertisement

އަސްލަމް ވިދާޅުވީ މިނިސްޓްރީން ހެދި ހައުސިންގ ނީޑް އެސެސްމެންޓުން އެނގުނު ގޮތުގައި މިވަގުތު މާލޭގައި ބޯހިޔާވަހިކަމަށް ބޭނުންވާ 7500 އާއިލާ ދިރިއުޅެއެވެ. އަދި މި މަޝްރުއުގެ އެންމެ ބޮޑު ‘ފޯކަސް’ ވެސް އޮތީ މާލޭގެ ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ކަމަށްވާއިރު 600 އަކަ ފޫޓު ހަމަނުވާ ތަނެއްގައި ދިރިއުޅޭ ނަމަ، އެއީ ދިރިއުޅެން ހެޔޮވާވަރުގެ ތަނެއް ނޫންކަމަށެވެ.

އެޕްލިކޭޝަން އަށް މާކްސް ދިނުމަށް ކަނޑައަޅާފައިވާ ގޮތުން 15 އަހަރުވަންދެން މާލޭގެ ރައްވެއްސެސަކަށް ވެފައި، އޭނާގެ އަމިއްލަ ނަމުގައި 600 އަކަފޫޓުގެ ދިރިއުޅޭނެ ތަނެއް ނެތް މީހަކަށް ވާނަމަ، ހައުސިންގ ޔުނިޓަކަށް ކުރިމަތިލެވޭނެއެވެ. ދެން ބަލާނީ މިހާރު ދިރިއުޅުމުގެ ހާލަތަށާއި، އާއިލާގެ ކުޑަ ބޮޑު މިނަށެވެ. މި މަޝްރޫއު އިން ހައުސިން ދިނުމުގައި އިސްކަން ދޭނީ 75 މާކްސް އަށް ވުރެ މަތިން ލިބޭ ފަރާތްތަކަށެވެ.