ދީބާޖާ ކުންފުންޔާއި ސަރުކާރާމެދު އޮތް މައްސަލައިގެ ކުރު ހުލާސާއެއް

އެމްޑީޕީގެ ވެރިކަމުގައި އުތުރު ޕްރޮވިންސްގެ ފެރީގެ ޚިދުމަތް ދިނުމަށް ސަރުކާރުން ދީބާޖާ ކިޔާ ކުންފުންޏަކާއިއެކު ވަނީ އެއްބަސްވުމުގައި ސޮއެކޮށްފައެވެ. ނަމަވެސް ދީބާޖާއާ އެކު ހެދި އެއްބަސްވުން ސަރުކާރުން ބާތިލު ކުރީ 2013 ވަނަ އަހަރު އެވެ. އެ މައްސަލައިގައި ދީބާޖާ ކުންފުނިން ދައުލަތާ ދެކޮޅަށް ސިވިލް ކޯޓުގައި ދައުވާކުރީ ގެއްލުމުގެ ބަދަލަށް 2.4 ބިލިއަން ރުފިޔާ ހޯދުމަށެވެ. އެ މައްސަލައިގައި 2014 ގައި ސިވިލް ކޯޓުން ދައުލަތަށް އަމުރުކުރީ ގެއްލުމުގެ ބަދަލަށް 348 މިލިއަން ރުފިޔާ ދީބާޖާ އަށް ދެއްކުމަށެވެ.

ސިވިލް ކޯޓުގެ ހުކުމް ދައުލަތުން އިސްތިއުނާފް ކުރުމުން ހައި ކޯޓަށް ހުށައެޅިއެވެ. ސިވިލް ކޯޓުގެ ހުކުމްގައިވަނީ ދެ ފަރާތެއްގެ ދެމެދުގައި އޮތް އެއްބަސްވުމެއް އުވާލުމުން ލިބޭ ގެއްލުމުގެ ބަދަލު ނަގައިދެވޭނީ ގާނޫނާ ޚިލާފަށް އެ އެއްބަސްވުމެއް އުވާލިކަން ސާބިތު ކުރެވިގެން ކަމަށެވެ. އެކަމަކު ދީބާޖާއާ އެކު ސަރުކާރުން ހެދި އެއްބަސްވުން ސަރުކާރުން ބާތިލު ކުރީ ގާނޫނާ ޚިލާފަށް ކަން ދީބާޖާ އަށް ސާބިތު ކޮށްދެވިފައި ނުވާ ކަމަށް އެ ހުކުމުގައިވެ އެވެ. އެހެންކަމުން ހައި ކޯޓުން ވަނީ ސިވިލް ކޯޓުގެ ހުކުމް ބާތިލްކޮށް، އެ ފައިސާ ދައްކަން ނުޖެހޭނެ ކަމަށް ހުކުމްކޮށްފަ އެވެ.

advertisement

ހައި ކޯޓުގެ ހުކުމް ދީބާޖާ އިން ސުޕްރީމް ކޯޓުގައި އިސްތިއުނާފް ކުރުމުން، އެ ކޯޓުގެ ހުކުމުގައި ވަނީ ސިވިލް ކޯޓުގެ އެ ހުކުމް ދައުލަތުން ހައި ކޯޓުގައި އިސްތިއުނާފް ކުރީ އިސްތިއުނާފް ކުރުމުގެ މުއްދަތު ހަމަވި ފަހުން ކަމަށެވެ. އެހެންވެ، އެ މުއްދަތު ހަމަވި ފަހުން އެ މައްސަލަ ހައި ކޯޓުން ބަލައިގަނެ މައުޟޫއީ ގޮތުން ބަލާފައިވަނީ ގާނޫނީ އުސޫލުތަކާ ޚިލާފަށް ކަމަށް ސުޕްރީމް ކޯޓުން ހުކުމްކުރިއެވެ.

ރާއްޖޭގެ އުތުރުގެ ސަރަޙައްދުގައި ފެރީގެ ޚިދުމަތް ދިނުމަށް ދީބާޖާއާއެކު ސަރުކާރުން ވެފައިއޮތް އެއްބަސްވުން އުވާލުމުން އެކުންފުންޏަށް ބޮޑު ބަދަލެއް ދޭން ނިންމާފައި އޮތްނަމަވެސް، އެ ކުންފުންޏަށް ދައުލަތުން އެއްވެސް ބަދަލެއް ދޭން ޖެހޭވަރުގެ ގެއްލުމެއް ލިބުނުކަމެއް އެއްވެސް ލިޔެކިޔުމަކުން ފެންނަން ނެތްކަމަށް އޮޑިޓަ ޖެނެރަލް ހަސަން ޒިޔަތުވެސް ވަނީ ވިދާޅުވެފައެވެ.

މިމައްސަލާގައި މިދިޔަ އަހަރު ރައްޔިތުންގެ މަޖިލީހުގެ މާލިއްޔަތު ކޮމިޓީގައި ވާހަކަފުޅުދައްކަވަމުން އޮޑިޓަރ ޖެނެރަލް ޙަސަން ޒިޔަތު ވިދާޅުވީ ނ، ރ، ބ، ޅ މިއަތޮޅުތަކުގެ ފެރީގެ ޚިދުމަތް ދޭން ދީބާޖާއާއެކު ވީ އެއްބަސްވުމާ އެއްގޮތަށް ސަރުކާރުން ކޮށްދޭން ޖެހޭ ހުރިހާ ކަމެއް ފުރިހަމަކޮށްފައިވާ ކަމަށެވެ. އެހެންނަމަވެސް އެ ޚިދުމަތް ފެށުމުގައިވެސް އެ ކުންފުނިން ޢަމަލުކުރަމުން ދިޔައީ އެއްބަސްވުމާ ޚިލާފަށް ކަމަށެވެ. އެއީ ސަރުކާރުން ކޮށްދޭންޖެހޭ އެއްވެސްކަމެއް ފުރިހަމަ ނުވެ އޮތުމުން ނޫން ކަމަށް ވެސް އޮޑިޓަރ ޖެނަރަލް ވިދާޅުވިއެވެ.

އުތުރު ޕްރޮވިންސްގައި ފެރީގެ ޚިދުމަތް ދިނުމަށް ކުރީގެ ރައީސް މުހައްމަދު ނަޝީދުގެ ސަރުކާރުން ކުރިން ހަވާލުކުރި ދީބާޖާ އިންވެސްޓްމަންޓާ އެކު ހެދި އެއްބަސްވުން ބާތިލްކުރީ ކުރީގެ ރައީސް މުހައްމަދު ވަހީދުގެ ސަރުކާރުންނެވެ.