އެޗް10 ކެޓަގަރީން ފްލެޓް ލިބުނު މީހުންގެ މެދުގައި ގުރުއަތު ނަގައިފި

ހިޔާ ފްލެޓްގެ އެޗް10 ކެޓަގަރީގެ މީހުންގެ މެދުގައި ގުރުއަތުލައި ލިބުނު ފްލެޓްތައް ކަނޑައަޅައިފިއެވެ. ސަރުކާރުން ރައްޔިތުންނަށް ބޯހިޔާވަހިކަން ފޯރުކޮށް ދެއްވުމަށް ހިންގަވާ މަޝްރޫޢު ރޫޢުގެދަށުން ހުޅުމާލެ ފޭސް ދޭއް ގައި 6720 ފުލެޓް ވަނީ އިމާރާތްކޮށްފައެވެ. މީގެތެރެއިން އެޗް10 ކެޓަގަރީ ނުވަތަ ޙާއްޞައެހީއަށް ބޭނުންވާ މީހުންގެ ކެޓަގަރީގެ ގުރު ނެގުން ވަނީ މިހާރު ކުރިއަށްގެންގޮސްފައެވެ.

ގުރުނެގުމުގެ ހަރަކާތްވަނީ މީޑިއާއިން ލައިވްކޮށް ކުރިއަށް ގެންގޮސްފައެވެ. މި އިވެންޓްގައި މި ކެޓަގަރީން ދާއިމީ ލިސްޓްގައި ހިމެނިފައިވާ ފަރާތްތަކުގެ މެދުގައި ނެގުނު ގުރުޢަތުލުން ކުރިއަށް ގެންދެވިފައިވަނީ ފުލެޓް ނަމްބަރު ކަރުދާސް ކޮޅުތަކެއްގައި ފޮއްޓަކަށް އެޅުމަށްފަހު މި ކެޓަގަރީ އިން ފުލެޓް ލިބިފައިވާކަމަށް ސަރުކާރުން ކަނޑައަޅުއްވާފައިވާ ލިސްޓުގައި ހިމެނޭ ފަރާތް ތަކުގެ އައި.ޑީ ނަމްބަރު ތަރުތީބުންނެވެ.

advertisement

މީގެއިތުރުން، ގުރުއަތުން ނެގުނު ފުލެޓާއި، ފުލޯ އާއި ޓަވަރު އިނގޭގޮތަށް ޓީވީ ސްކްރީނުން ވަނީ ދައްކާފައެވެ. އަދި މި ހުރިހާ މަޢުލޫމާތުތަކެއް ފުލެޓް ލިބުނު ފަރާތްތަކުން ދެއްވާފައިވާ ފޯނުނަމްބަރަށް SMS ޒަރިއްޔާއިން ވަނީ ޙިއްސާކުރެވިފައެވެ.

ޖުމްލަ 188 ފަރާތެއްގެ މެދުގައި ގުރުޢަތު ނެގުނު އިރު، މި ކެޓަގަރީގެ ހުރިހާ ފަރާތަކަށްވެސް ފުލެޓް ދިނުމަށް ހަމަޖެހިފައިވަނީ ޓަވަރުތަކުގެ ފުރަތަމަ ފަންގިފިލާއިންނެވެ. އަދި މި ގުރުޢަތަށްފަހު ލިބުނު ފުލެޓްގެ އެގްރީމެންޓްގައި ސޮއި ކުރުމާއި، ފުލެޓްގެ ތަޅުދަނޑި ޙަވާލުކުރާނެ ތާރީހެއް ފަހުން އިޢުލާނު ކުރެވިގެންދާނެއެވެ.