ތެޔޮބޯޓު އަޑިއަށްދިއުމުން ލިބުނު ގެއްލުން 10 މިލިއަނަށް އަރާނެކަމަށް ލަފާކުރެވޭ – ބްރޯ ފިއުލް

ބްރޯ ފިއުލްގެ ތެޔޮ ބޯޓެއްގައި އަލިފާން ރޯވެ އަޑިއަށް ދިއުމުން ލިބުނު ގެއްލުން 10 މިލިއަނެއްހާ ރުފިޔާ އަށް އަރާނެ ކަމަށް ލަފާކުރެވޭ ކަމަށް އެ ބޯޓު އޮޕަރޭޓްކުރާ ބްރޯ ފިއުލް ކުންފުނިން ބުނެފި އެވެ.

މާލެ އަތޮޅު އެނބޫދޫފިނޮޅު ކައިރީގައި އަޅާފައި އޮއްވައި “ބްރޯ ފިއުލް” ގެ ބޯޓު އަނދައި އަޑިއަށް ދިޔައީ ރޭގެ ވަގުތެއްގައެވެ. މި ބޯޓު އަޑިއަށް ދިޔައީ ރޯވި އަލިފާންގަނޑު ނިއްވުމުގެ މަސައްކަތް ސިފައިންގެ ފަޔާ ފައިޓަރުން ކުރަނިކޮށެވެ.

advertisement

ބްރޯ ފިއުލްއިން ވިދާޅުވީ، ބޯޓުގެ އަގަކީ ނުވަ މިލިއަން ރުފިޔާ ކަމަށެވެ. އެހެންކަމުން އެނދި ޑީސަލާއެކު ގާތްގަނޑަކަށް 10 މިލިއަން ރުފިޔާގެ ގެއްލުންވި ކަމަށް ލަފާ ކުރެވޭ ކަމަށް އޭނާ ވިދާޅުވި އެވެ.

ބްރޯ ފިއުލްއިން ވިދާޅުވީ، އެއީ 100،000 ލީޓަރުގެ ޑީސަލް ރައްކާ ކުރެވޭ ޖާގައިގެ ބޯޓެއް ކަމަށެވެ. އެމްއެންޑީއެފުން މައުލޫމާތުދޭގޮތުގައި ބޯޓުގައި ރޯވީ 60،000 ލީޓަރުގެ ޑީސަލާއެކު ޅ. އަތޮޅަށް ދަތުރުކުރަނިކޮށެވެ. ބްރޯ ފިއުއަކީ ރާއްޖޭގައި ތެޔޮ ޑިސްޓްރިބިއުޓް ކުރާ ކުންފުންޏެކެވެ.