ކިންގް ސަލްމާން މިސްކިތް ރޯދައަށް ނުހުޅުވުނީ ސައުދީގެ އޮފިޝަލުންނަށް ނާދެވުމުން – މިނިސްޓްރީ

ކުރީގެ ރައީސް އަބްދުﷲ ޔާމީންގެ އިސްނެންގެވުމަކަށް ސައުދީ ސަރުކާރުން މާލޭގައި އިމާރާތްކޮށްދީފައިވާ ކިންގް ސަލްމާން މިސްކިތް ހުޅުވުން ލަސްވަނީ އެ ތަން ހުޅުވުމުގެ ރަސްމިއްޔާތުގައި ބައިވެރިވެވަޑައިގަންނަވަން އެދިވަޑައިގަންނަވާ ސައޫދީ އަރަބިއްޔާގެ އޮފިޝަލުންނަށް ވަޑައިގެންނެވޭ ފަދަ ހާލަތަކަށް ނުދާތީ ކަމަށް ދިވެހި ސަރުކާރުން ބުނެފި އެވެ.

އިސްލާމިކް މިނިސްޓްރީން ނެރުނު ބަޔާނެއްގައި ބުނީ ކިންގް ސަލްމާން މިސްކިތަކީ ސައުދީ ސަރުކާރުން ބޮޑު ހޭދައެއް ކޮށްގެން ބިނާކޮށްފައިވާ މިސްކިތެއް ކަމަށާއި އެ މިސްކިތް ހުޅުވުމުގެ ރަސްމިއްޔާތުގައި ބައިވެރިވުމުގެ ޝައުގުވެރިކަން ސައުދީ ސަރުކާރުން ފާޅުކޮށްފައިވާ ކަމަށެވެ.

advertisement

އެ މިސްކިތް ހުޅުވަން އެކި ފަހަރު މަތިން ތާރީހުތައް ދިވެހި ސަރުކާރުން ކަނޑައެޅި އެވެ. މިއަހަރުގެ ރޯދަމަހަށް ވެސް ތަނުގައި ނަމާދުކުރެވޭތޯ ސަރުކާރުން މަސައްކަތް ކުރި އެވެ.

އިސްލާމިކް މިނިސްޓްރީން ބުނީ ސައުދީގެ އޮފިޝަލުންނަށް ވަޑައިނުގެންނެވުނީ ކޮވިޑް-19ގެ ބަލިމަޑުކަމުގެ ސަބަބުން، ރައްކާތެރިކަން ނެތިގެން ކަމަށެވެ.

ސައުދީ ބޭފުޅުންނަށް ވަޑައިގެންނެވޭ ގޮތް ނުވުމުގެ އިތުރުން އެ މިސްކިތުގައި ގާއިމްކުރަން ޖެހޭ ވަސީލަތްތައް ގާއިމްކޮށް އަދި ނުނިމޭކަމަށާއި އެ މަސައްކަތް ކުރަމުން އަންނަ ކަމަށް ވެސް އިސްލާމިކް މިނިސްޓްރީން ބުންޏެވެ.

ތުރުކީގެ ކުންފުންޏަކާ ހަވާލުކޮށްގެން ކިންގް ސަލްމާން މިސްކިތް ބިނާކުރީ ގާތްގަނޑަކަށް 370 މިލިޔަން ރުފިޔާ ހަރަދުކޮށްގެންނެވެ.