ވޯޓު އަލުން ގުނުން ކުރިއަށްދަނިކޮށް ހަމަނުޖެހުން ހިންގި މައްސަލަ ބަލަން އެމްޑީޕީން ގޮވާލައިފި

އިންތިޚާބުގެ ވޯޓު އަލުން ގުނުމުގެ މަސައްކަތް ކުރަމުން ދަނިކޮށް ހަމަނުޖެހުން ހިންގި މައްސަލަ ބަލައި، ފިޔަވަޅު އެޅުމަށް އެމްޑީޕީން ގޮވާލައިފިއެވެ.

މިދިޔަ ހޮނިހިރު ދުވަހު ބޭއްވި އިންތިޚާބުގެ ވޯޓުތަކެއް އަލުން ގުނުމުގެ މަސައްކަތް ކުރަން ތައްޔާރުވަމުން ދަނިކޮށް އިލެކްޝަންސް ކޮމިޝަންގެ އިންތިޚާބީ މައި މަރުކަޒަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަޑައިގަތުމުން ވަނީ ހަމަނުޖެހުން ހިނގައިފަ އެވެ.

advertisement

ނަޝީދު ވިދާޅުވެފައިވަނީ ވޯޓު ގުނާ މަރުކަޒަށް އެމަނިކުފާނު ވަޑައިގަތީ އެތަނަށް އިދިކޮޅު ކޯލިޝަންގެ އިސްވެރިން ވަޑައިގެން ތިއްބެވުމުން އެކަން ހިނގާ ގޮތް ބެއްލެވުމަށް ކަމަށެވެ. އަދި ވޯޓު ގުނާ މަރުކަޒެއްގައި އޮފިޝަލުން ނޫން ބަޔަކަށް ނުތިބެވޭނެ ކަމަށް ނަޝީދު ވިދާޅުވެފައިވެ އެވެ. ނަމަވެސް އިދިކޮޅު ކޯލިޝަނުން ބުނާގޮތުން ނަޝީދު އެތަނަށް ވަޑައިގަތީ ހަމަނުޖެހުން އުފެއްދެވުމަށެވެ.

މިކަމާއި ގުޅިގެން އެމްޑީޕީން ނެރުނު ބަޔާނުގައިވަނީ ޕީޕީއެމް އާއި ޕީއެންސީގެ އިސްވެރިން އެ ސަރަހައްދަށް ގޮސް، ހަމަނުޖެހުން ހިނގީ ވޯޓު ގުނުމުގެ މަސައްކަތް ކުރަމުން ދަނިކޮށް އެކަމަށް ހުރަސް އެޅުމަށް ކަމަށެވެ. އޭގެ ސަބަބުން އެތަނުގައި ގަޔަށް އަތްލައި، މާރާމާރީ ހިންގާފައިވާ ކަމަށާއި އެކަމާ މެދު ކަންބޮޑުވާ ކަމަށްވެސް އެމްޑީޕީގެ ބަޔާނުގައިވެއެވެ.

އެ ބަޔާނުގައިވަނީ އެ ފަރާތްތަކާ މެދު ގާނޫނީ ފިޔަވަޅު އެޅުމަށާއި އަދި ވޯޓުގެ ނަތީޖާ އިއުލާން ކުރަން ދެ ފުށް ފެންނަ ގޮތަކަށް ކުރުމުގެ ޖާގަ ދިނުމަށް އެ ޕާޓީން ގޮވާލާ ކަމަށެވެ.