ދިވެހި ބަސް އުވިގެން ދަނީތަ؟

ކޮންމެ އަހަރެއްގެވެސް އޭޕްރީލް މަހުގެ 14 ވަނަ ދުވަސް ފާހަގަކުރަނީ ދިވެހި ބަހުގެ ދުވަހުގެ ގޮތުގައެވެ. މިދުވަސް ފާހަގަކުރަނީ ރާއްޖޭގެ މަޝްހޫރު އަދީބު ފަޟީލަތުއްޝައިޚް އަލްމަރްޙޫމް ޙުސައިން ޞަލާޙުއްދީން އުފަންވެވަޑައިގެންނެވި ދުވަސްކަމުގައިވާ، އެޕްރީލް 14 ވަނަ ދުވަހާއި ގުޅުވައިގެންނެވެ. ސަރުކާރުން މިދުވަސް ދިވެހި ބަހުގެ ދުވަހުގެ ގޮތުގައި ފާހަގަކުރަން ނިންމަވާފައިވަނީ 2015 ވަނަ އަހަރުއެވެ. އެދުވަހުން ފެށިގެން ކޮންމެ އަހަރަކު އޭޕްރީލް 14 ފާހަގަކުރަނީ ދިވެހި ބަހުގެ ދުވަހުގެ ގޮތުގައެވެ.

ތަފާސްހިސާބުތައް ދައްކާގޮތުން ދުނިޔޭގައި ހާހަކަށްވުރެ ގިނަ ބަހުން އިންސާނުން ވާހަކަދައްކައެވެ. ބަސްވާރުން އިއްތިފާގުވެވަޑައިގަންނަވާގޮތުގައި އެބައެއްގެ ހިޔާލުތަކާއި ޝުއޫރުތައް އުފެދި ސިކުނޑީގައި ޕްރޮގްރާމްކުރެވޭނީ އެބައެއްގެ މާދަރީ ބަހުންނެވެ. އެހެންކަމުން އެބައެއްގެ މާދަރީބަސް ނެތިގެން ހިނގައްޖެނަމަ އެ ގެއްލިދަނީ ވަރަށް ބޮޑު ރައުސުލްމާލެކެވެ. އެހެންކަމުން އަޅުގަނޑުމެންގެ ދިވެހިބަސްވެސް އަންނަންއޮތް ޖީލުތަކަށް ރައްކާތެރިކަމާއިއެކު ގެންދިއުމަކީ މުހިންމު ކަމެކެވެ. ބަސް އުވިޔަނުދީ ރައްކާތެރިކުރުމަކީ މިފަދަ ދުވަހެއްގައި އެންމެ އިސްކަމެއްދޭންޖެހޭ އެއްކަމެވެ.

advertisement

ދިވެހި ބަހަކީ ދުގު ތާރީހެއްއޮތް އަދި އެބަސް ލިޔާނެ އަމިއްލަ އަކުރެއް އޮތް ފަހުރުވެރި ބަހަކަށްވީހިނދު “ދިވެހި ބަހުގެ ދުވަހެއް ފާހަގަކުރުމަކީ މުހިންމު ކަމެކެވެ. ބަވަނަވަމުން އަންނަ މި ދުނިޔޭގައި ކުދި ބަސްތަކަށް ނުރައްކަލާ ކުރިމަތިލާން ޖެހިފައިވާކަމަށް ޔުނެސްކޯއިން ބުނެ ކަންބޮޑުވުން ފާޅުކޮށްފައިވެއެވެ. އަދި ދުނިޔޭގެ ފެންވަރުގައި “ބައިނަލްއަޤްވާމީ މާދަރީބަހުގެ ދުވަހެއް ފާހަގަކުރަނީ ކޮންމެ ބަޔަކަށްވެސް އެބައެއްގެ މާދަރީބަހުގެ މުހިންމުކަން ދުނިޔޭގެ ފެންވަރުގައި ފާހަގަކުރުމަށްޓަކައެވެ.

މިއަދު މަދުން ނަމަވެސް އަޅުގަނޑުމެންގެ ތެރޭގައި ދިވެހި ބަހަށް އިހާނެތިކޮށް ކަންތައްކުރާތަން ފެނެއެވެ. ދިވެހި ބަހާއި އެހެން ބަސްތައް މަސްހުނިކޮށްގެން ވާހަކަދައްކާ މަންޒަރު ފެނެއެވެ. ޚާއްސަކޮށް ބައެއް ތުއްތު ކުދިންނަށް ދިވެހި ބަހުން ވާހަކަދައްކަން ނޭންގެއެވެ. ދިވެހިބަހަށް ތުއްތުކުދިންގެ މެދުގައި އޮންނަ ލޯބި އިތުރުކުރުމަށްޓަކައި ކުޑައިރުއްސުރެ ދިވެހި ބަހުން އެކުދިންނަށް ވާހަކަދެއްކުމަކީ މުހިންމު ކަމެކެވެ. އެއިރުން އެކުދިންގެ ހިތުގައި ދިވެހި ބަހަށް އޮންނަ ލޯބި އިތުރުވެގެންދާނެއެވެ.