ޒަކާތު ފަންޑުން ކުރަނީ ކީތް؟

ޒަކާތު ފަންޑުގެ ދަށުން ކޮންމެ އަހަރަކުވެސް މާލީގޮތުން ދަތިވެފައިވާ މީހުންނަށް އިސްލާމިކް މިނިސްޓްރީން އަންނަނީ އެހީތެރިކަން ފޯރުކޮށްދެމުންނެވެ. މުޖުތަމަޢުގައި ޙާލުގައި ޖެހިފައިތިބި މީހުންނަށް އެހީތެރިވުމަށާއި ކިޔަވައިދިނުމަށާއި ބޭސްފަރުވާއަށްވެސް ޒަކާތު ފަންޑުން ދަނީ އެހީތެރިކަން ފޯރުކޮށްދެމުންނެވެ. މީގެ އިތުރަށް ބައެއް ހާލަތްތަކުގައި މިސްކިތްތައް އާބާތުރަ ފިލުވުމަށާއި އެނޫންވެސް، ރައްޔިތުންނާ ގުޅުންހުރި ގިނަ ކަންތައްތަކަކަށް ޒަކާތު ފަންޑުން އެހީތެރިކަން ފޯރުކޮށްދެމުން ގެންދެއެވެ. ޒަކާތު ފަންޑުން ބޭސްފަރުވާގެ ކަންކަމަށާއި މަތީ ތަޢުލީމް ހާސިލް ކުރުމަށް ޚާއްސަ އިސްކަމެއްދީގެން އަންނަނީ އެހީތެރިކަން ފޯރުކޮށްދެމުންނެވެ.

އިސްލާމިކް މިނިސްޓްރީން އެންމެ ފަހުން އާންމުކޮށްފައިވާ ތަފާސްހިސާބުތައް ދައްކާގޮތުން ބޭސްފަރުވާއަށް ދަތިވެފައިވާ 567 މީހަކަށް މިދިޔަ އަހަރު ޒަކާތު ފަންޑުން އެހީތެރިކަން ފޯރުކޮށްދީފައިވާކަމަށް އިސްލާމިކް މިނިސްޓްރީން ވިދާޅުވެއެވެ. އެ މިނިސްޓްރީގެ 2020ވަނަ އަހަރުގެ އަހީރީ ރިޕޯޓުގައި ވާގޮތުން ޒަކާތު ފަންޑުން ބޭސްފަރުވާ ކުރުމަށްޓަކައި މިދިޔަ އަހަރު 6،338،337 ރުފިޔާ ވަނީ ޚަރަދުކޮށްފައެވެ. އިސްލާމިކް މިނިސްޓްރީން ވިދާޅުވީ ވޭތުވެދިޔަ އަހަރު ނިމުނުއިރު ޒަކާތު ފަންޑުގައި 128،918،296.13 ރުފިޔާ ހުރިކަމަށެވެ.

advertisement

ކޯވިޑް-19އާ ގުޅިގެން ޒަކާތު ފަންޑުން، ބޭސްފަރުވާގެ އެހީއަށް އެދިފައިވާ މީހުންގެ ޢަދަދު ވަރަށް ބޮޑަށްވަނީ މަދުވެފައެވެ. އިސްލާމިކް މިނިސްޓްރީގެ ރިޕޯޓުގައި ވާގޮތުން އެންމެ ގިނައިން ޒަކާތު ފަންޑުން ފައިސާ ދޫކޮށްފައިވަނީ ކެންސަރު ބައްޔަށް ފަރުވާ ހޯދަމުން އަންނަ ފަރާތްތަކަށެވެ. މިގޮތުން އެފަދަ 144 މީހަކަށް އެހީތެރިކަން ވަނީ ފޯރުކޮށްދީފައެވެ. ދެން އެންމެ ގިނައިން އެހީތެރިކަން ފޯރުކޮށްދީފައިވަނީ ލޮލުގެ ބައްޔަށެވެ. ލޮލުގެ ބައްޔަށް ފަރުވާ ހޯދުމަށްޓަކައި 58 މީހަކަށް އެހީތެރިކަން ފޯރުކޮށްދީފައިވާއިރު ވޭތުވެ ދިޔަ އހަރު ވަނީ ހިތުގެ ބަލި ހުންނަށް 26 މީހަކަށް ޒަކާތު ފަންޑުން އެހީތެރިކަން ފޯރުކޮށްދީފައެވެ.

ޒަކާތު ފަންޑުން އެކިކަންކަމަށް އެހީތެރިކަން ފޯރުކޯށްދެމުން އަންނައިރު މިދިޔަ އަހަރުވަނީ ފުލް ސްކޮލަރޝިޕް ލިބިގެން ކިޔަވަމުންދާ 13 ދަރިވަރަކަށް ޖުމްލަ 677،166.10 ރުފިޔާވެސް މި ފަންޑުން ޚަރަދުކޮށްފައެވެ.

ޒަކާތު ފަންޑަށް ފައިސާ ލިބެނީ ރައްޔިތުންގެ ފަރާތުންނެވެ. ފިޠުރު ޒަކާތާއި މުދަލު ޒަކާތުން ލިބޭ ފައިސާ ޔަތީމުންނާއި މިސްކީނުންނާއި ފަޤީރުންނަށް ބެހުމަށްފަހު ބާކީވާ ފައިސާ ޖަމާކުރަނީ އެފަންޑަށެވެ. އަދި އެފަންޑުގައި ހުންނަ ފައިސާ އަނެއްކާވެސް ހަމަ ޚަރަދު ކުރަނީ ދިވެހި ރައްޔިތުން ބޭނުންވާ ކަންކަމަށް ވަކި އުޞޫލެއްގެ ދަށުން ޒަކާތު ކޮމިޓީގެ ލަފަޔާ މަޝްވަރާގެ މަތިންނެވެ.