އެމްޑީޕީގެ އެތެރޭގެ އިންތިހާބު އަންނަ މަހުގެ 29 ގައި

މޯލްޑިވްސް ޑިމޮކްރެޓިކް ޕާޓީ އެމްޑީޕީގެ އެތެރޭގެ އިންތިޚާބު އަންނަ މަހުގެ 29ވަނަ ދުވަހު ބޭއްވުމަށް ހަމަޖައްސައިފިއެވެ. މި އިންތިޚާބަކީ ޕާޓީގެ ދާއިރާތަކުގެ ހިންގާ ކޮމިޓީތަކާ ޕްރޮވިންސްތަކަށް މެންބަރުން ހޮވުމަށް ބާއްވާ އިންތިޚާބެކެވެ.
އިންތިޚާބުގައި ވޯޓުލުމަށް ހަމަޖެހިފައިވަނީ އެ ދާއިރާއެއްގައި ހިމެނޭ ޕާޓީގެ އާއްމު މެންބަރުންނެވެ. އިންތިޚާބުގެ ކަންކަން ކުރިއަށްގެންދިއުމަށްޓަކާ، ޕާޓީގެ މެންބަރަކަށްވުމަށް ފޯމު ބަލައިގަތުން އިއްޔެއިން ފެށިގެން އަންނަ މަހުގެ 29ވަނަ ދުވަހުގެ ނިޔަލަށް ވަގުތީގޮތުން މެދުކަނޑާލާފައިވާކަމަށްވެސް އެ ޕާޓީން ބުނެއެވެ. އެ ޕާޓީން ބުނީ އިންތިޚާބުގައި ވޯޓުލެވޭނީ 18 އޭޕްރިލް 2020 ގެ ނިޔަލަށް ޕާޓީގެ މެންބަރުންގެ ގޮތުގައި ތިބި މީހުންނަށް އެކަނިކަމަށެވެ.
އެމްޑީޕީން އެންމެ ފަހުން އިންތިޚާބުކޮށްފައިވާ ޤައުމީ މަޖިލީހުގައި 140އަށްވުރެ ގިނަ މެންބަރުން ހިމެނެއެވެ. މި މެންބަރުން އިންތިޚާބުކޮށްފައިވަނީ 2016ވަނަ އަހަރުއެވެ.

advertisement