ދެމެހެއްޓެނިވި ތަރައްޤީއަށް ސަގާފީ ފަތުރުވެރިކަން ކުރިއަރުވަންޖެހޭ – މިނިސްޓަރ ޔުމްނާ

ދެމެހެއްޓެނިވި ތަރައްޤީއަށް ސަގާފީ ފަތުރުވެރިކަން ކުރިއަރުވަންޖެހޭކަމަށް މިނިސްޓަރ އޮފް އާޓްސް ކަލްޗަރ އެންޑް ހެރިޓޭޖް ޔުމްނާ މައުމޫން ވިދާޅުވެއްޖެއެވެ.
މިނިސްޓަރ ޔުމްނާ މިހެން ވިދާޅުވީ، ދުނިޔޭގެ ތަރިކައިގެ ދުވަހުގެ މުނާސަބަތުގައި ދެއްވި ޚާއްސަ މެސެޖުގައެވެ. މި އަހަރުގެ ދުނިޔޭގެ ތަރިކައިގެ ދުވަހުގެ ޝިޢާރަކީ “މުއްސަނދި މާޒީތަކަކުން: ތަފާތު ކުރިމަގުތަކަކަށް” ނުވަތަ “ކޮމްޕްލެކްސް ޕާސްޓްސް: ޑައިވަރސް ފިއުޗަރ” އެވެ.
މިނިސްޓަރ ވިދާޅުވީ، އަޅުގަނޑުމެންގެ މުއްސަނދި މާޒީތަކުން އައިސްފައިވާ ސަގާފީ ތަރިކަތައް ކުރިމަގުގެ ޖީލުތަކަށް ރައްކާތެރިކަމާއެކު ފޯރުކޮށްދިނުމަކީ އަޅުގަނޑުމެން އެންމެންގެ ޒިންމާއެއްކަމަށެވެ. އަދި މިފަދަ ބިނާތަކާއި ސަރަޙައްދުތަކާއި ތަންތަނާއި ތަކެއްޗަކީ އެ ރަށެއްގެ އަމިއްލަ ވަންތަކަމާއި ސަގާފަތް ދައްކުވައިދޭ ތަންތަނާއި ތަކެތިކަން މިނިސްޓަރ ފާހަގަކުރެއްވިއެވެ. އަދި މިފަދަ ބިނާތަކާއި ސަރަޙައްދުތަކީ ރަށުގެ ނުވަތަ އަތޮޅުގެ ކުރިމަގު ބިނާކުރާއިރުވެސް މުހިންމު ތަންތަނާއި ތަކެތިކަމަށާއި، ފަތުވެރީން ބަލައިލަން ބޭނުންވާނެ ބިނާ ތަކާއި، ސަރަހައްދުތަކާއި ތަކެތިކަމަށްވެސް މިނިސްޓަރ ވިދާޅުވިއެވެ.
މިނިސްޓަރ ޔުމްނާ ވިދާޅުވީ، ސަގާފީ ތަރިކައަކީ އަޅުގަނޑުމެންގެ ފަޚުރަކަށް ވާއިރު، ސަޤާފީ ތަރިކަ ރަނގަޅު ގޮތުގައި ރައްކާތެރިކޮށް ދެމެހެއްޓިއްޖެނަމަ، ސަގާފީ ފަތުރުވެރިކަމުގެ ތެރެއިން ރަށަށާއި އަތޮޅަށް އެތައް ފައިދާތަކެއް ލިބިގެންދާނެކަމަށެވެ.
އަދުގެ ދުނިޔޭގައި އާދަކާދައާއި ސަގާފީ ތަރިކައަކީ އަގުބޮޑު “މުދަލެއް”ކަން ދެނެގަނެ، ދެމެހެއްޓެނިވި، ރަނގަޅުގޮތުގައި އޭގެ ބޭނުން ހިފުމަށް މިނިސްޓަރ ޔުމްނާ ވަނީ ގޮވާލައްވާފައެވެ.

advertisement