އަލީ ވަހީދުގެ މައްސަލަ ރެޑް ނޯޓިސް ނެރެގެން ވިޔަސް ކުރިއަށް ގެންދާނަން – ޕީޖީ ޝަމީމް

ޖިންސީ ކުށުގެ ހަތް ދައުވާއެއް އުފުލާފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ މައްސަލަ، އިންޓަޕޯލް ރެޑް ނޯޓިސް ނެރެގެން ވިޔަސް، ކުރިއަށް ގެންދަވާނެ ކަމަށް ޕްރޮސެކިއުޓާ ޖެނަރަލް ހުސެއިން ޝަމީމް ވިދާޅުވެއްޖެ އެވެ.

ވަޒީރުކަމުގައި ހުންނެވިއިރު، ޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާކުރި ކަމުގެ ތުހުމަތުގައި މިދިޔަ އަހަރު މަގާމުން ވަކިކުރި އަލީ ވަހީދުގެ ޝަރީއަތް ހިނގަމުންދަނިކޮށް އޭނާ ވަނީ ރާއްޖެ ދޫކުރައްވައި ވަޑައިގެންފަ އެވެ.

advertisement

އެ މައްސަލައާ ގުޅޭ ގޮތުން ޕީއެސްއެމްގެ “ރާއްޖެ މިއަދު” ޕްރޮގްރާމުގައި ޕީޖީ ޝަމީމް ވިދާޅުވީ އަލީ ވަހީދު މިހާރު އުޅުއްވާ ވަކި އެޑްރެހެއް ކޯޓުގައި ބުނެދެވިފައި ނުވާތީ ޗިޓް ރައްދުކުރާނެ ގޮތެއް ނެތުމުން، މައްސަލަ ހައި ކޯޓުގައި ހުއްޓިފައިވާ ކަމަށެވެ.

ބޭރަށް މީހުން ފުރައިގެން ދިއުމުން، އެ މީހުން އުޅޭ އެޑްރެސް ނޭނގޭ ހާލަތްތަކުގައި ފުރިހަމަ ކުރަންޖެހޭ އިޖުރާއަތްތައް ވެސް ހައިކޯޓުން ފުރިހަމަކޮށްފައި ނުވާ ކަމަށް ވިދާޅުވެ، އެކަމުގައި ޝަމީމް ވަނީ ކަންބޮޑުވުން ފާޅުކުރެއްވި އެވެ.

އޭނާ ވިދާޅުވިގޮތުގައި، އެ މައްސަލަ މިހާރު ސުޕްރީމް ކޯޓުގައި ވަނީ އިލްތިމާސް ކުރައްވައިފަ އެވެ. ނަމަވެސް އެ ކޯޓުން އެކަމުގައި ވަކި ގޮތެއް ނުނިންމާ ކަމަށް ޝަމީމް ވިދާޅުވި އެވެ.
އޭނާ ވިދާޅުވީ މީހެއްގެ އެޑްރެސް ނޭނގޭ ފަދަ ހާލަތެއްގައި ފުލުހުންނަށް އަމުރުކޮށް، ބަންދެއްގައި ބަހައްޓައިގެން ހާޒިރު ކުރެވޭނެ ކަމަށެވެ.

ކޯޓު އަމުރެއްގެ ދަށުން ހިފަހައްޓާފައި އޮތް އަލީ ވަހީދުގެ ޕާސްޕޯޓް ދޫކޮށް، ފުރުން މަނާކުރުމުގެ އަމުރު ބާތިލުކުރީ ސިއްހީ ފަރުވާ އަށް ރާއްޖެ އިން ބޭރަށް ވަޑައިގަންނަވަން ޖެހުމުން އޭނާއާ ޖާމިނުވާނެ މީހަކު ވެސް ހުށަހަޅާފައިވާތީ އެވެ. އެއީ އަލީ ވަހީދުގެ ގާތް އެކުވެރިޔާ އަދި ޔޫތު އެންޑް ސްޕޯޓްސް މިނިސްޓްރީގެ ސްޓޭޓް މިނިސްޓަރު އަސްއަދު އަލީ (އަޑުބަރޭ) އެވެ.

އަލީ ވަހީދު، ރާއްޖެ އިން ބޭރަށް ވަޑައިގަޔުމުގެ ހުއްދަދީ، ޕާސްޕޯޓް ދޫކުރުމަށް ދަށު ކޯޓުން ކުރި އަމުރު ޕްރޮސެކިއުޓާ ޖެނަރަލްގެ ފަރާތުން ހައި ކޯޓުގައި އިސްތިއުނާފް ވެސް ކުރި އެވެ.

ޕީޖީ ޝަމީމް ވިދާޅުވި ގޮތުގައި ޖިންސީ ކުށުގެ މައްސަލަތައް ކުރިއަށް ގެންދިއުމަށް ވެސް މަސައްކަތް ކުރައްވާނެ އެވެ. އެގޮތުން އެ މައްސަލައިގައި ޗިޓް ހަވާލުކޮށް، ކޯޓަށް ހާޒިރުނުވެއްޖެ ނަމަ އަމުރެއް ނެރެގެން ވިޔަސް، ހާޒިރުކުރެވޭނެ ކަމަށް ވިދާޅުވި އެވެ.

އަލީ ވަހީދަށް ރާއްޖެ އިން ބޭރަށް ވަޑައިގަތުމަށް ފުރުސަތު ދިނުމުން އެކަމުގައި އެތައް ބަޔަކު ވަނީ ނުރުހުން ފާޅުކޮށްފަ އެވެ.

އަލީ ވަހީދުގެ ޖިންސީ ފުރައްސާރަ ކުރިމަތިވި ކަމަށް ބުނާ މުވައްޒަފުންގެ އަދަދު 13 އަށް ވުރެ ގިނަ އެވެ.