ދަނޑުވެރިކަން ފުޅާކުރަން ސަރުކާރުން އުފެއްދި ކުންފުންޏަށް 1 އަހަރު

ސަރުކާރުގެ އިޤްތިޞާދީ ސިޔާސަތުގެ ދަށުން ، ޞިނާޢަތެއްގެ ގޮތުގައި، ދަނޑުވެރިކަން ތަރައްޤީ ކުރުމުގެ ޒިންމާއާއި މަސްއޫލިއްޔަތާއެކު ، އެގްރޯ ނެޝަނަލް ކޯޕަރޭޝަން (އެގްރޯނެޓް) އުފެއްދެވީ 21 އޭޕްރިލް 2020 ގައެވެ. މިއަދަކީ އެގްރޯނެޓްގެ ފުރަތަމަ އަހަރީ ދުވަހެވެ.

ކޯވިޑް-19 އާގުޅިގެން، ރާއްޖެއަށް ކޮށްފާނެ ނޭދެވޭ އަސަރުތައް ކުޑަކުރުމަށްޓަކައި، އިޤްތިޞާދީ ވަޞީލަތްތައް ހޯދައި ތަރައްޤީ ކުރުމަށްޓަކައި، ޤައުމީ ފެންވަރުގައި، ކުރިއަށް ގެންދާ ޕްރޮގުރާމެއްގެ ގޮތުގައި ކޮންޓްރެކްޓް ފާމިންގ ވަނީ ރާއްޖެއަށް ތަޢާރުފު ކޮށްފައިކަން އެގްރޯނެޓުން ފާހަގަކުރެއެވެ. މިޕްރޮޖެކްޓްގެ މައިގަނޑު ލަނޑުދަނޑިއަކީ، ދަނޑުވެރިކަމުގެ ފުއްދުންތެރިކަން އިތުރުކުރުމާއި، ކާބޯތަކެތީގެ ޖަމާއެއް އެކަށީގެންވާ މިންވަރަކަށް، ރާއްޖޭގައި ހުންނާނެކަން ޔަޤީންކުރުމުގެ ވިސްނުން ފުޅާކުރުމެވެ. މިފަދަ ތަޞައްވުރެއް ޙާޞިލު ކުރެވޭނީ ދަނޑުވެރިންގެ މެދުގައި ތަނަވަސް، ފުއްދުންތެރި އަދި ތިމާވެއްޓާ ރަޙްމަތްތެރި ވިޔަފާރިކުރުމުގެ އުކުޅުތައް ތަޢަރުފްކޮށް އާލާކޮށް، ދަނޑުވެރި ކަމުގެ  ވިޔަފާރީގެ އައު ޖީލެއް އުފެއްދިގެންކަން މިކުންފުނިން ޤަބޫލު ކުރަމެވެ. ކުދި  އަދި މެދު ފަންތީގެ ވިޔަފާރިތައް ތަރައްޤީކުރުމަށް، ދިވެހި ސަރުކާރުން ކުރައްވަމުން ގެންދަވާ މަސައްކަތަށް، އެހީތެރިކަން  ފޯރުކޮށްދީ  އިޤްތިޞާދީ ޢާންމު ޙާލަތަށް ވާޞިލުވުމަށް  މިކުންފުނީގެ ދަނޑުވެރިކަމުގެ މަޝްރޫޢުން އެހީތެރިކަން ލިބިގެންދާނެއެވެ.

advertisement

 
މިމަޝްރޫޢުގެ ފުރަތަމަ ފިޔަވަހީގެ ދަށުން 45 ރަށެއް އިޚްތިޔާރު ކުރެވި، އޭގެތެރެއިން، ކޮންޓްރެކްޓް ފާމިންގއަށް ތައްޔާރުވެ ، ދަނޑުވެރިންނާއެކު އެގްރީމެންޓް ކުރެވިފައިވާ ރަށްރަށުގައި، ދަނޑުވެރިކަމުގެ ޢަމަލީ މަސައްކަތް ފެށިގެން ދަނީ ކުރިއަށެވެ. މުޑުވަށްކުރާހިސާބުން ފެށިގެން، ތަކެތިކެނޑުމާހަމަޔަށް އިންތިޒާމު ކުރެވިގެން، ބެލެހެއްޓިގެން ކުރެވޭ ދަނޑުވެރިކަމުގެ މިމަޝްރޫޢުގެ ދަށުން، އުފައްދާނެ 17 ބާވަތެއް ކަނޑައެޅުމަށް ފަހު، ކޮންމެ ދަނޑުވެރިއަކު ވެސް ހައްދާނެ ދެބާވަތެއް އިޚުތިޔާރު ކުރުމުގެ ފުރުޞަތު ވަނީ ދީފައެވެ.

ޒަމާނުއްސުރެ ރާއްޖޭގެ ދަނޑުވެރިން ތަޙައްމަލު ކުރަމުން ގެންދާ މާރކެޓު ކުރުމުގެ މައްސަލައަށް، އެގްރޯނެޓް އައުމާއެކު، އެކަށީގެންވާ ޙައްލެއް ލިބިއްޖެއެވެ. ކޮންޓްރެކްޓް ފާމިންގއަށް ދިވެހި ދަނޑުވެރިންގެ ފަރާތުން ލިބޭ ތަރުޙީބާއި، އެއްބާރުލުން ފާހަގަ ކޮށްލެވެއެވެ. 1500 އަށް ވުރެ ގިނަ ދަނޑުވެރިން، މިމަޝްރޫޢުގައި ބައިވެރިވުމުގެ ޝައުޤުވެރިކަން ފާޅުކޮށް ފޯމު ހުށަހަޅާފައި ވެއެވެ. އަދި މިހާތަނަށް 400 ފަރާތަކާއެކު އެއްބަސްވުމުގައި ސޮއި ކުރެވި ، އިތުރު 684 ފަރާތަކާއެކު އެގްރިމެންޓް ކުރުމުގެ މަސައްކަތް ދަނީ ކުރެވެމުންނެވެ. ކުންފުނީގެ އިދާރީ އަދި ފަންނީ މަސައްކަތްތައް ހަލުވިކަމާއެކު ކުރިއަށް ދާއިރު، ދަނޑުވެރިންގެ މަސައްކަތުން ކޮންޓުރެކްޓް ފާމިންގެ ފޮނި މީރުކަން މިހާރު ދަނީ ލިބެމުންނެވެ. މިކުންފުނީގެ ދަނޑުވެރިންގެ އުފެއްދުންތައް މިހާރުވަނީ ބާޒާރަށް ނެރެވިފައެވެ. ރަމަޟާން މަހަށް ޚާއްޞަކޮށްގެން އުފައްދާފައިވާ ދަނޑުވެރިކަމުގެ ބާވަތްތައް ބާޒާރަށް ނެރެވިގެން ދިއުމަކީ، ބާޒާރުގައި އާދަޔާ ޚިލާފަށް އަގުތައް އުފުލިގެންދާ މައްސަލައަށް ލުޔެއް ލިބޭނެ ކަމެކެވެ.

މިކުންފުނިން އިންތިޒާމްކޮށްގެން ހިންގާ، ސުކޫލު ނާސްތާ ޕުރޮގުރާމަށް ބޭނުންވާ ފަތްކޭލާއި ކުކުޅު ބިސް ފޯރުކޮށް ދިނުމުގެ މަސައްކަތް، ކާމިޔާބު ކަމާއެކު ހިންގޭކަމީ އުފަލާއެކު ފާހަގަ ކުރާ ޤައުމީ މަސައްކަތެކެވެ. މިޕްރޮގުރާމްގެ މަސައްކަތް ވިލަރެސް ކުރުމަށްޓަކައި، މިކުންފުނީގެ މުވައްޒަފުން ގެންދަނީ އަތޮޅުތަކުގައި އަދި ރަށްރަށުގައި ޙަރަކާތްތެރި ވަމުންނެވެ. މިކޯޕަރޭޝަންގެ 15 ރަށު ކޯޑިނޭޓަރުންނާއި، 17 އަތޮޅު ކޯޑިނޭޓަރުން، އަތޮޅުފެންވަރުގައި އަދި ރަށުފެންވަރުގައި، މަސައްކަތް ކުރައްވަމުން ގެންދަވާކަމީ، އެކުންފުނީގެ އަހަރު ދުވަހުގެ މަސައްކަތްތަކުގެ ތެރޭގައި ފާހަގަ ކޮށްލެވޭ ކަމެއްކަމަށް އެގްރޯނެޓުން ވިދާޅުވެއެވެ.