މަސްވެރިކަން ރަނގަޅުވެ ކޫއްޑޫއަށް ކިރާ މަހުގެ އަދަދު އިތުރުވެއްޖެ

ރާއްޖޭގެ ދެކުނަށް މަސްވެރިކަން ރަނގަޅުވެ ކޫއްޑޫއަށް ކިރާ މަހުގެ އަދަދު އިތުރުވެއްޖެއެވެ.

ކޫއްޑޫއަށް ބާރުބޮޑުވެ، ކޯލްޑް ސްޓޯރޭޖްތައް ފުރި، މަސް ކިރުވަން ދަތިތަކާއި ދިމާވުމުން މިފްކޯއިން މިހާރުވަނީ ބުދަ ދުވަހުގެ ނިޔަލަށް މަސް ކިރާނީ ކޮންޓްރޯލް ކޮށްގެންކަމަށްވެސް ބުނެފައެވެ.

advertisement

މިފްކޯއިން ވިދާޅުވީ މަސްވެރިކަން މިފަހުން މިހާބޮޑަށް ރަނގަޅުވެފައިވަނީ މީގެ 15 އަހަރު ކުރިން 2006 ވަނަ އަހަރުކަމަށެވެ. މިހާރު މަސްވެރިކަން ރަނގަޅުވެ މަސް ބާނަމުންދަނީވެސް ކޫއްޑޫއާއި ކައިރިން ކަމަށްވުމުން، މަސް ކިރަން ކޫއްޑޫއަށް އަންނަ ދޯނިފަހަރުތައް ވަރަށް ގިނަ ވެފައިވާ ކަމަށެވެ.

އަންނަ ބުދަ ދުވަހުގެ ނިޔަލަށް ކޫއްޑޫއަށް މަސް ކިރަމުންދާނީ ކޮންޓްރޯލްކޮށްގެންނެވެ. އެގޮތުން ދޯންޏަކުން 4 ޓަނު މަސް ކިރާ ގޮތަށް މިފްކޯއިންވަނީ ހަމަޖައްސާފައެވެ.

އަންގާރަ ދުވަހާއި ހަމައަށް މަސްވެރިކަން ހުރި ގޮތަކަށް ބެލުމަށްފަހު، ބުދަ ދުވަހުގެ ފަހުން އަމަލްކުރާނެ ގޮތެއް ނިންމާނެކަމަށް މިފްކޯއިން ވިދާޅުވެއެވެ. ރާއްޖޭގެ ދެކުނުގައި މިވަގުތު މަސްވެރިކަން ރަނގަޅުވެފައިވާކަން މިފްކޯއިން ހާމަކޮށްފައިވާއިރު، އެކުންފުނިން ދަނީ ރާއްޖޭގެ އެކި ސަރަހައްދުތަކުގައި ޤާއިމު ކުރެވިފައިވާ އެކުންފުނީގެ ފެސިލިޓީތައް ތަރައްޤީ ކުރުމަށް މަސައްކަތް ކުރަމުންނެވެ.

އެގޮތުން ދެކުނުން އައްޑޫ ސިޓީގައި ޤާއިމު ކޮށްފައިވާ މިފްކޯ މަސް ޕްލާންޓުގެ ބަނދަރު އަޕްގްރޭޑް ކުރުމުގެ މަސައްކަތް ސަރުކާރުން އެމްޓީސީސީއާ ވަނީ ހަވާލުކޮށްފައެވެ. ހުޅުމީދޫ މަސް ޕްލާންޓުގެ ބަނދަރުގެ މަސައްކަތް ނިމުމާއެކު، އެބަނދަރަށް ކެރިއަރ ބޯޓުތައް ވަނުމަށް ދިމާވާ ދަތިތައް ހައްލުވެގެން ދާނެކަމަށް މިފްކޯއިން ބުނެއެވެ.