މިއަހަރު ރާއްޖޭގެ އިޤްތިޞާދު %17.1 ކުރިއަރާނެ: ވާލްޑް ބޭންކް

މި އަހަރު ރާއްޖޭގެ އިޤްތިޞާދު 17.1 އިންސައްތައިގައި ކުރިއަރާނެ ކަމަށް ވާލްޑް ބޭންކުން ލަފާކޮށްފިއެވެ. މިގޮތައް ދައްކާފައިވަނީ “ވާލްޑް ބޭންކް މޯލްޑިވްސް ޑިވެލޮޕްމަންޓް އަޕްޑޭޓް: އަ ޑިޖިޓަލް ޑޯން ރިޕޯޓް” ގައެވެ.

މާލީ ޙާލަތާއި ދަރަނި ބެލެހެއްޓުން މެނޭޖުކޮށްގެން، އިޤްތިޞާދީ ކުރިއެރުމާއި ތަރައްޤީ ރާއްޖެ އަށް ހާޞިލްކުރެވިދާނެކަމަށް ވޯލްޑް ބޭންކުން ރާއްޖެ އާއި ނޭޕާލާއި ލަންކާ އަށް ކަނޑައަޅާފައިވާ ކަންޓްރީ ޑިރެކްޓަރު ފާރިސް ހަދާދު ޒާވޮސްވެސް ވަނީ ވިދާޅުވެފައެވެ. ދާދިފަހުން އޭނާ ވަނީ ރާއްޖެއަށް ދަތުރުފުޅެއް ކުރައްވާފައެވެ.

advertisement

ފާރިސް ހަދާދު ޒާވޮސް ވިދާޅުވީ، ރާއްޖޭގެ އިގްތިޞާދު މިހާރު އޮތީ ކުރީގެ ހާލަތައް ދިއުމުގެ މަގުމަތީގައިކަމަށެވެ. އިޤްތިޞާދު އަލުން އޮތް ހާލަތައް ދާން ފަށާފައިވަނީ އެކަށޭނެ ފިޔަވަޅުތައް އަޅައި ރާއްޖޭގެ ފަތުރުވެރިކަން ހުޅުވާލާ އެ ފިޔަވަޅުތަކަށް ތަބާވުމުގެ ސަބަބުން ކަމަށް އޭނާ ވިދާޅުވިއެވެ.

“އެކަށޭނަ ފިޔަވަޅުތަކާއި އެ ކަންކަމަށް ތަބާވުމުގެ ނަތީޖާއެއްގެ ގޮތުން، މިދިޔަ އަހަރުގެ ފަހުކޮޅުން ފެށިގެން ރާއްޖޭގެ ފަތުރުވެރިކަމުގެ ސިނާޢަތް ވަނީ ވަރަށް ބާރަށް ކުރިއަރަން ފަށާފައި. އެއާއެކު، ރާއްޖޭގެ އިޤްތިޞާދު ވެސް މިހާރު އޮތީ ކުރީގެ ހާލަތަށް ދިއުމުގެ މަގުމަތީގައި، އިޤްތިޞާދީ ކުރިއެރުން ލަފާކުރެވޭ ގޮތުގެ މައްޗަށް ބިނާކޮށް، މާލީ ޙާލަތާއި ދަރަނި ބެލެހެއްޓުން މެނޭޖުކޮށްގެން، ކުރިއަށް ވުރެ ތިމާވެއްޓާ ރަށްޓެހި، ކުރިމަތިވެދާނެ ކާރިޡާތަކަށް ކުރިއަށް ވުރެ ބޮޑަށް ތައްޔާރުވެފައިވާ އަދި އެންމެހާ ދިވެހިންނަށް އޭގެ ފައިދާ ކުރާ އިޤްތިޞާދީ ކުރިއެރުމާއި ތަރައްޤީ ރާއްޖެ އަށް ހާޞިލްކުރެވިދާނެ.” ފާރިސް ހަދާދު ޒާވޮސް ވިދާޅުވިއެވެ.

ވާލްޑް ބޭންކުން ދިވެހިރާއްޖެ އާއި ނޭޕާލް އަދި ސްރީ ލަންކާ އަށް ކަނޑައަޅާފައި ހުންނަވާ ކަންޓްރީ ޑިރެކްޓަރ ފާރިސް ހަދާދު-ޒާވޮސް ދިވެހިރާއްޖެ އަށް ކުރެއްވި ކާމިޔާބު ދަތުރު ނިންމާލާފައިވަނީ އިއްޔެއެވެ. މިއީ، ކޮވިޑް-19 ގެ ސަބަބުން ކުރިމަތިވެފައިވާ ޞިއްޙީ އަދި އިޤްތިޞާދީ ކާރިޡާ އިން އަރައިގަނެ، ކުރިއަށް ވުރެ ރަނގަޅަށް އިޤްތިޞާދު ބިނާކުރުމުގައި އެހީތެރިވުމާ ގުޅޭ ގޮތުން ރާއްޖެއާއެކު ވާލްޑް ބޭންކުން ކުރިއަށްގެންދާ މަސައްކަތްތަކުގެ ދަށުން ކުރެއްވި ދަތުރުފުޅެކެވެ. ދެ ދުވަހުގެ މުއްދަތަށް ކުރެއްވި ދަތުރުފުޅުގައި، ވާލްޑް ބޭންކުގެ ކަންޓްރީ ޑިރެކްޓަރ ވަނީ ވާލްޑް ބޭންކުގެ އެހީގައި ހިންގޭ މުހިންމު މަޝްރޫޢުތައް ވިލަރެސްކުރައްވާ މިނިސްޓަރުންނާ ބައްދަލުކުރައްވާފަ އެވެ.

މި ބައްދަލުކުރެއްވުންތަކުގައި މައިގަނޑު ގޮތެއްގައި މަޝްވަރާކުރައްވާފައި ވަނީ، ދިވެހިރާއްޖޭގެ އިޤްތިޞާދީ ޙާލަތާއި ކޮވިޑް-19 ގެ ބަލިމަޑުކަމުގެ ސަބަބުން ދިވެހިރާއްޖޭގެ އިޤްތިޞާދަށް ކުރިމަތިވެފައިވާ ލޮޅުންތަކާ ގުޅޭ ގޮތުންނެވެ. ހަމަ އެއާއިއެކު، މި ކާރިޡާ އިން އަރައިގަނެ، އެންމެންގެ ބައިވެރިވުން އޮންނަ އަދި ދެމެހެއްޓެނިވި ތަރައްޤީއަކަށް މަގުފަހިވާނެ ގޮތަށް ކުރިއަށް ވުރެ ރަނގަޅަށް އިޤްތިޞާދު އާރާސްތުކުރުމުގައި ދިވެހިރާއްޖެ އަށް އެހީތެރިވުމުގައި ވާލްޑް ބޭންކުން ތައްޔާރަށް އޮތްކަން ވެސް ކަންޓްރީ ޑިރެކްޓަރ ވަނީ ހިއްޞާކުރައްވާފަ އެވެ.

މި މަހުގެ 15 ވަނަ ދުވަހު ވޯލްޑް ބޭންކުން ވަނީ “ވާލްޑް ބޭންކް މޯލްޑިވްސް ޑިވެލޮޕްމަންޓް އަޕްޑޭޓް: އަ ޑިޖިޓަލް ޑޯން ރިޕޯޓް” ވެސް ނެރެފައެވެ. މި ރިޕޯޓްގައި، ކޮވިޑް-19 ގެ ބަލިމަޑުކަމުގެ ސަބަބުން ދިވެހިރާއްޖޭގެ އިޤްތިޞާދަށް ކުރިމަތިވެފައިވާ ބޮޑެތި ނޭދެވޭ އަސަރުތަކުގެ މައްޗަށް އަލިއަޅުވާލާފައިވެ އެވެ. އެގޮތުން، އޭގެ ކުރީ އަހަރާ އަޅާބަލާއިރު މިދިޔަ އަހަރު ރާއްޖޭގެ އިޤްތިޞާދު ވަނީ ގާތްގަނޑަކަށް 30 އިންސައްތަ ދަށަށް ގޮސްފަ އެވެ. އެހެން ނަމަވެސް، ފަތުރުވެރިން ޒިޔާރަތްކުރާ މިންވަރު ބާރަށް ކުރިއަރަމުން ދިއުމާއި ފަތުރުވެރިކަމުގެ ދާއިރާގައި ކުރެވެމުން އަންނަ އިންވެސްޓްމަންޓްތަކުގެ ނަތީޖާއެއްގެ ގޮތުން، މި އަހަރު ރާއްޖޭގެ އިޤްތިޞާދު 17.1 އިންސައްތައިގައި ކުރިއަރާނެ ކަމަށް ވާލްޑް ބޭންކުން ލަފާކުރެ އެވެ. ހަމަ އެއާއެކު، ޑިޖިޓަލް ޓެކްނޮލޮޖީތައް މެދުވެރިކޮށް ރާއްޖޭގެ އިޤްތިޞާދީ ކުރިއެރުމާއި ތަރައްޤީގެ ދަތުރުގައި އިންގިލާބީ ބަދަލުތަކެއް ގެނެވިދާނެ ގޮތްތަކުގެ މައްޗަށް ވެސް މި ރިޕޯޓުގައި އަލިއަޅުވާލާފައިވެ އެވެ.

ޖުމްލަ 182 މިލިއަން ޑޮލަރުގެ އަގުހުރި 10 މަޝްރޫއެއް ވާލްޑް ބޭންކުން މިވަގުތު ރާއްޖޭގައި ހިންގަ އެވެ. ކޮވިޑް-19 އިން ރައްކާތެރިވުމަށާއި، މި ބަލި ދެނެގަނެ، މި ބައްޔާ ދެކޮޅަށް މަސައްކަތްކުރުމަށް ދިވެހިރާއްޖެ އަށް އެހީތެރިވުމުގެ ގޮތުން 7.3 މިލިއަން ޑޮލަރުގެ އަވަސް އެހީގެ ޕެކޭޖެއް ވާލްޑް ބޭންކުން ވަނީ މިދިޔަ އޭޕްރީލް މަހު ދިވެހިރާއްޖެ އަށް ފޯރުކޮށްދީފަ އެވެ.