މޯލްޑިވްސް ވަރޗުއަލް ޓުއަރ އެކްސްޕޯ ޖުލައިމަހު

މޯލްޑިވްސް ވަރޗުއަލް ޓުއަރ އެކްސްޕޯ މިއަހަރުގެ ޖުލައިމަހު ބޭއްވުމަށް ނިންމައިފިއެވެ. މިއީ ވަރޗުއަލްކޮށް ބާއްވާ ކޮންސިއުމަރ ޓްރެވެލް ފެއަރއެކެވެ. މި ފެއަރ ބާއްވަނީ މޯލްޑިވްސް ވަރޗުއަލް ޓުއަރ އިންނެވެ.

މި ފެއަރ މެދުވެރިކޮށް ދުނިޔޭގެ އެކި ހިސާބުތަކުން 100 މިލިއަން ފަތުރުވެރިންނަށް ރާއްޖެ އިޝްތިހާރުކުރުމަކީ އަމާޒެކެވެ.

advertisement

މޯލްޑިވްސް ވަރޗުއަލް ޓުއަރ އެކްސްޕޯ ބާއްވަނީ ފަތުރުވެރިން ރާއްޖެ އައުމުގެ ކުރިން އެމީހުންނަށް ރާއްޖޭގެ ރީތި މަންޒަރުތައް ވާޗުއަލްކޮށް ދައްކާލުމުގެ ބޭނުމުގައެވެ. މި ފެއަރ މެދުވެރިކޮށް ރާއްޖޭގެ ގިނަ ކަންކަމެއް އެއް ޕްލެޓްފޯމަކުން ބަލާލުމުގެ ފުރުސަތު ފަތުރުވެރިންނަށް ލިބިގެންދާނެއެވެ.
 
މި ފެއަރ ކުރިއަށްދާނީ 2 ހަފްތާގެ މުއްދަތަކަށެވެ. މޯލްޑިވްސް ވާޗުއަލް ޑޮކް ކޮމް މެދުވެރިކޮށް ބާއްވާ މި ފެއަރއަކީ ވަރޗުއަލްކޮށް ރާއްޖޭގެ މަންޒަރުތައް ބަލާލުމުގެ ފުރުސަތުލިބޭ ފެއަރއެކެވެ. މި ފެއަރ މެދުވެރިކޮށް ރާއްޖޭގެ 150 ވަރަކަށް ރަށުގެ 2000 އަށްވުރެ ގިނަ ވަރޗުއަލް ޓުއަރ ފެންނާނެއެވެ. މިއީ ކޮންމެ ކުއާޓަރަކު ދުނިޔޭގެ އެކި ހިސާބުތަކުގެ ފަތުރުވެރިންނަށް އަމާޒުކޮށްގެން ބާއްވާ ފެއަރއެކެވެ.

މޯލްޑިވްސް ވަރޗުއަލް ޓުއަރ ލޯންޗްކޮށްފައިވަނީ މިދިޔަ އަހަރުގެ ޑިސެމްބަރ މަހުގެ ތެރޭގައެވެ. މި ހަރަކާތް ކުރިއަށްދަނީ އޮރކާ މީޑީއާއާއި އެމްއެމްޕީއާރުސީ ގުޅިގެންނެވެ. އަދި މެއިން ޕާޓްނަރަކީ އުރީދޫ މޯލްޑިވްސްއެވެ. ސީޕްލޭން ޕާޓްނަރަކީ ޓީއެމްއޭއެވެ.

މޯލްޑިވްސް ވަރޗުއަލް ޓުއަރއަކީ އޮރކާ މީޑީއާ ގްރޫޕްގެ އުފެއްދުމެކެވެ. މިއީ ރާއްޖޭގެ އެންމެ ކުރިއަރާފައިވާ މީޑިއާ އަދި މާކެޓިންގ ކުންފުންޏެކެވެ.