ރާއްޖެއިން ރެކޯޑް އަދަދަކަށް މީހުން ކޯވިޑަށް ޕޮޒިޓިވްވެއްޖެ

ރާއްޖެއިން އިތުރު 464 މީހުން ކޯވިޑް-19އަށް ޕޮޒިޓިވްވެ، ބަލިޖެހުނު މީހުންގެ ޢަދަދު 29،000އިން މައްޗަށް އަރައިފިއެވެ. މިއީ ރާއްޖޭގައި އެންމެ ގިނައިން ކޯވިޑް-19އަށް މީހުން ޕޮޒިޓިވްވި ދުވަހެވެ. ވޭތުވެދިޔަ 24 ގަޑިއިރު ތެރޭގައި އެންމެ ގިނަ ޕޮޒިޓިވް ކޭސްތައް ރިޕޯޓުކޮށްފައިވަނީ މާލެ ސަރަހައްދުންނެވެ.

އެޗް.ޕީ.އޭއިން ހާމަކޮށްފައިވާ އެންމެފަހުގެ ތަފާސްހިސާބުތައް ދައްކާގޮތުން ފާއިތުވި 24 ގަޑިއިރުގެ ތެރޭގައި ރާއްޖެއިން ޕޮޒިޓިވްވި 464 މީހުންގެ ތެރޭގައި ހިމެނެނީ މާލެ ސަރަޙައްދުން ޕޮޒިޓިވްވި 207 މީހުންނާއި އަތޮޅުތަކުގެ ރަށްރަށުން ޕޮޒިޓިވްވި 146 މީހުންގެ އިތުރުން، ރިސޯޓްތަކުން 14 މީހަކާއި ސިނާޢީ ރަށްރަށުން ޕޮޒިޓިވްވި 93 މީހުންނެވެ. އަދި ސަފާރީތަކުން 3 މީހަކާއި ހަދަމުންދާ ރިޒޯޓަކުންވެސް މީހަކު ޕޮޒިޓިވްވެފައިވާކަން އެޗްޕީއޭގެ ތަފާސްހިސާބުތަކުން ދައްކަކައެވެ.

advertisement

މިރޭ އަތޮޅުތަކުން ޕޮޒިޓިވްވި 146 މީހުންގެ ތެރޭގައި ހިމެނެނީ ބ.އޭދަފުށިން ޕޮޒިޓިވްވި 38 މީހަކާއި މާލެއަތޮޅު ހިންމަފުށިން ޕޮޒިޓިވްވި 28 މީހަކާއި ޅ.ނައިފަރުން ޕޮޒިޓިވްވި 19 މީހަކާއި ލ.ގަމުން ޕޮޒިޓިވްވި 18 މީހެކެވެ.

ސިނާޢީ މަސައްކަތްކުރާ ރަށްރަށުން ޕޮޒިޓިވްވި 93 މީހުންގެ ތެރޭގައި ހިމެނެނީ ގުޅީފަޅުން ޕޮޒިޓިވްވި 3 މީހަކައި ތިލަފުށިން ޕޮޒިޓިވްވި އެކަކާއި މާންދޫން ޕޮޒިޓިވްވި 89 މީހެކެވެ.

މިއާއެކު ރާއްޖެއިން ކޯވިޑް-19އަށް ޕޮޒިޓިވްވި މީހުންގެ ޖުމުލަ ޢަދަދު މިވަނީ 29،052އަށް އަރާފައެވެ.

ޕޮޒިޓިވްވާ މީހުންގެ އަދަދު އިތުރުވުމާއެކު މިވަގުތު ރާއްޖޭގައި ކޯވިޑް-19އަށް ފަރުވާ ހޯދަމުންދާ މީހުންގެ ޢަދަދު ނުވަތަ އެކްޓިވް ކޭސްތަކުގެ އަދަދު މިހާރުވަނީ 4،396އަށް އިތުރުވެފައެވެ، އަދި އެޑްމިޓްކޮށްގެން 122 މީހަކަށްދަނީ މިހާރު ފަރުވާ ދެމުންނެވެ.