މޭ ޑޭ: މަސައްކަތްތެރިންނަށް ގިނަ ޖޮންޖެހުންތަކަކާއި ވަނީ ކުރުމަތިލާންޖެހިފައި

މަސައްކަތްތެރިންގެ ދުވަސް ނުވަތަ މޭޑޭ އަކީ މުޅި ދުނިޔޭގައިވެސް ކޮންމެ އަހަރެއްގެ މޭ މަހުގެ 1 ވަނަ ދުވަހު މަސައްކަތްތެރިންގެ ހައްޤުތައް ހޯދުމަށް އަޑު އުފުލައި ފާހަގަ ކުރާ ދުވަހެކެވެ. ރާއްޖޭގައި މޭ ޑޭގެ ހަރަކާތްތައް ރަސްމީކޮށް ފަށާފައިވަނީ 2011ވަނަ އަހަރު ސަރުކާރުން އެދުވަސް ފާހަގަކުރަން ނިންމުމާ ގުޅިގެންނެވެ.

މޭޑޭ ނުވަތަ ބައިނަލްއަޤްވާމީ މަސައްކަތްތެރިންގެ ދުވަހަކީ ދުނިޔޭގައި މަސައްކަތްތެރިންގެ ހައްޤުތަށް ރައްކާތެރިކުރުމަށް 1886 ވަނަ އަހަރުގެ މޭމަހުގެ 4 ވަނަ ދުވަހު ލަންޑަންގައި ކުރިއަށްގެންދިޔަ އަމާން މުޒާހަރާއަށް ދިން އުދުވާނީ ހަމަލާއާއި ދިމާކޮށް މަސައްކަތްތެރިންގެ ހައްޤުގައި ފާހަގަކުރަން ފެށި ދުވަހެކެވެ.

advertisement

މި ދުވަސް ފާހަގަކުރުމަށް 1980ގެ ފަހުކޮޅު ހިންގަން ފެށި މިހަރަކާތްތަކުގެ ނަތީޖާއަކަށްވެގެންދިޔައީ، މަސައްކަތްކުރަންޖެހޭ ވަކި ވަގުތުތަކެއް ކަނޑައަޅާދީ މަސައްކަތުގައި ސަލާމަތީ ފިޔަވަޅުތަށް ވަރުގަދަކުރުމަށް ގިނަ ފިޔަވަޅުތަކެއް ގިނަ ޤައުމުތަކަކުން އަޅަން ފެށުމެވެ. އެގޮތުން އަމާން މުޒާހަރާތަކަކުން ފެށި މިހަރަކާތްތައް މިއަދު ފުޅާވެ ބައިނަލްއަޤްވާމީގޮތުން ފާހަގަކުރާ ހަރަކާތަކަށް މިވަނީ ވެފައެވެ.

މަސައްކަތްތެރިންގެ ދުވަސް، ނުވަތަ ލޭބަރ ޑޭ ރާއްޖޭގައި ރަސްމީކޮށް ފާހަގަކުރުމަށް ނިންމަވާފައިވަނީ 2011 ވަނަ އަހަރު އޭރުގެ ރައީސުލްޖުމްހޫރިއްޔާ މުޙައްމަދު ނަޝީދެވެ. މިއާއެކު ލޭބާރ ޑޭއެއް ގޮތުގައި މޭ މަހުގެ 1 ހަމަޖައްސަވާ އެއީ ރާއްޖޭގައިވެސް ރަސްމީ ބަންދު ދުވަހެއްގެ ގޮތުގައި ހަމަޖެހިގެންދިޔައެވެ. އަދި މިއާއެކު ޤާނޫނަކާއި ލޭބަރ ރިލޭޝަންސް އޮތޯރިޓީއެއްގެ އިތުރުން ލޭބަރ ޓްރައިބިއުނަލް އެއްވެސް ޤާއިމުކުރެވުނެވެ.

މަސައްކަތްތެރިންގެ ދުވަހެއް މިއަދު ފާހަގަކުރަމުންދާއިރު މުޅި ދުނިޔެއަށްވެސް މިއަދު މިވަނީ ބޮޑު ސިއްހީ ކުއްލި ނުރައްކަލުގެ ހާލަތަކާއި ކުރިމަތިވެފައެވެ. 2020 ވަނަ އަހަރު ވެގެންދިޔައީ މަސައްކަތްތެރިންނަށް ގޮންޖެހުން ބޮޑު ދަތި އަހަރަކަށެވެ. މުޅި ދުނިޔެ ހުއްޓުމަކަށްއައިސް ބޮޑެތި އެކި ދާއިރާތަކުގެ މަސައްކަތްތައް ހުއްޓި ގިނަ ބައެއްގެ ވަޒީފާ ވަނީ ގެއްލިފައެވެ. މިއަދުވެސް ކޯވިޑް19 ގެ ސަބަބުން ވަޒީފާ ގެއްލުނު ގިނަ ބަޔަކަށް އަދިވެސް ވަޒީފާ ލިބުމުގައި ވަނީ ގިނަ ހުރަސްތަކަކާއި ކުރިމަތިލާންޖެހިފައެވެ.

ރާއްޖޭގައިވެސް އެތައް ބައެއްގެ ވަޒީފާއަށް ކޯވިޑް19 ގެ ސަބަބުން ވަނީ އަސަރުކޮށްފައެވެ. ގިނަ ބައެއްގެ ވަޒީފާތައް އަނބުރާ ލިބިފައިވީނަމަވެސް މިއަދު މަސައްކަތްތެރިންގެ ދުވަސް ފާހަގަކުރާއިރު ރާއްޖޭގައިވެސް ގިނަ ބަޔަކު ވަނީ ވަޒީފާ ގެއްލިފައެވެ.

މި ސަރުކާރުގެ ވައުދުތަކުގެ ތެރޭގައި މަސައްކަތްތެރިންނަށް ދެވޭނެ އެންމެ ކުޑަ އުޖޫރައެއް ކަނޑައެޅުން ހިމެނެއެވެ. އެހެންނަމަވެސް މިއަދާއި ހަމައަށްވެސް މިނިމަމް ވޭޖްއެއް ކަނޑައެޅިފައެއް ނުވެއެވެ. މިކަމާއިމެދު ގިނަ ބަޔަކު ދަނީ ކަންބޮޑުވުންވެސް ފާޅުކުރަމުންނެވެ.