ކުޑަކުދިންގެ ހައްޤު ކަށަވަރު ނުވާނަމަ ޤާނޫނުގައި ލިޔެފައި އޮތުމުގެ ބޭނުމެއްނެތް!

ދިވެހިރާއްޖޭގެ ޤާނޫނުތަކުން އެންމެހައި ރައްޔިތުންގެ ހައްޤުތައް ކަށަވަރުކޮށްދެއެވެ. އެގޮތުން ޤާނޫނާއި ޤަވައިދުތަކުން ކުޑަކުދިންގެ އެތައް ހައްޤުތަކެއްވެސް ވަނީ ޔަޤީންކޮށް ކަށަވަރުކޮށްދީފައެވެ.

“ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނު” ގެ ދަށުން ކުޑަކުއްޖަކަށް ވީތީ ލިބެންޖެހޭ އެތައް ހައްޤެއް ވަނީ ބަޔާންކޮށް ކަނޑައަޅާފައެވެ. މީގެތެރޭގައި ކުއްޖާގެ ނުވަތަ ކުއްޖާގެ ބެލެނިވެރިއެއްގެ ނަޞްލަށް، ނުވަތަ ކުލައަށް، ޖިންސަށް، ބަހަށް، ނުވަތަ ސިޔާސީ ނުވަތަ އެނޫންވެސް ވިސްނުމަކަށް ބިނާކޮށް، އެއްވެސް ކުއްޖަކާމެދު ތަފާތުކޮށްގެންނުވާނެކަމަށް ވަނީ ބަޔާންކޮށްފައެވެ.

advertisement

ދިރިހުރުމާއި ހެދިބޮޑުވުމުގެ ޙައްޤު އޭގެ އެންމެ ފުޅާ ދާއިރާގައި ކުޑަކުދިންނަށް ކަށަވަރުކޮށްދިނުމަށްޓަކައި، ދުޅަހެޔޮ ޞިއްޙަތެއްގައި އެކުދިންނަށް ދެމިތިބެވޭނެ ފުރުޞަތު ފަހިކޮށްދީ، އެކަމަށް ބޭނުންވާ ވަސީލަތްތައް ހޯދައިދިނުމަކީ، އަދި އަނިޔާއާއި ގޯނާއިން އެކުދިން ސަލާމަތްކޮށްދިނުމަށްޓަކައި އަޅަންޖެހޭ ފިޔަވަޅުތައް އެޅުމަކީ، އެކުދިންގެ ބެލެނިވެރިންނާއި ޢާއިލާއާއި އެކުދިން ދިރިއުޅޭ މުޖުތަމަޢުގެ ފަރާތްތަކާއި، ދައުލަތުގެ ޒިންމާއެކެވެ. ދައުލަތުގެ އިދާރާތަކުންވިޔަސް ނުވަތަ ޝަރުޢީ ކޯޓުތަކުންވިޔަސް ނުވަތަ ރައްޔިތުންގެ މަޖިލީހުންވިޔަސް ނުވަތަ އިޖްތިމާޢީ ރައްކާތެރިކަން ފޯރުކޮށްދޭ ދައުލަތުގެ ނުވަތަ އަމިއްލަ ފަރާތަކުންވިޔަސް ނުވަތަ ބެލެނިވެރިން ކަމުގައިވިޔަސް، ކުޑަކުއްޖަކާގުޅޭ ކަންކަން ނިންމުމުގައި އެންމެ އިސްކަމެއް ދޭންވާނީ، އެކުއްޖާގެ މަޞްލަޙަތު ޙިމާޔަތްކުރުމަށްކަމަށް ޤާނޫނުގައި ވަނީ ބަޔާންކޮށްފައެވެ.

ކުއްޖާ ހެދިބޮޑުވުމަށް ބޭނުންވާ ރައްކާތެރިކަމާއި އަޅާލުން، ކުއްޖާގެ ބެލެނިވެރިންގެ ފަރާތުންނާއި ކުއްޖާގެ ޢާއިލާގެ ފަރާތުންނާއި މުޖުތަމަޢުގެ ފަރާތުންނާއި ދައުލަތުގެ ފަރާތުން ލިބުމަކީ ކޮންމެ ކުއްޖަކަށްމެ ލިބިގެންވާ ޙައްޤެކެވެ. އަދި ކޮންމެ ކުއްޖަކީވެސް، ޖިންސީގޮތުން އެކުއްޖެއްގެ ނާޖާއިޒު ބޭނުންހިފުމާއި، އެކުއްޖަކަށް ޖިންސީ ގޯނާކުރުމުން ރައްކާތެރިކަން ލިބުމުގެ ޙައްޤު ލިބިގެންވާ ކުއްޖެކެވެ. ކޮންމެ ކުއްޖަކީވެސް އެންމެހައި ބާވަތެއްގެ ޖިސްމާނީ އަދި ނަފްސާނީ އަނިޔާއާއި، ގޯނާކުރުމަކުންނާއި، އަޅާނުލުމާއި، އިހުމާލުވުމާއި، ނުބައިކޮށް ހިތުމާއި، ނާޖާއިޒް ފައިދާނެގުމާއި، ޖިންސީ ގޯނާކުރުމާއި، އެނޫންވެސް ކުއްޖާގެ ހެދިބޮޑުވުމަށް ހުރަސްއެޅޭނެ އެންމެހައި ޝިކާރަތަކުން ރައްކާތެރިކަން ލިބުމުގެ ޙައްޤު ލިބިގެންވާ ކުއްޖެއްކަމަށް ޤާނޫނުގައި ވަނީ ބުނެފައެވެ.

“ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނު” ގެ ދަށުން ކުޑަކުދިންނަށް ލިބެންޖެހޭ އެތައް ހައްޤެއް ބަޔާންކޮށްފައިވީނަމަވެސް މަދުން ނަމަވެސް އާއިލާއާއި މުޖްތަމައު އަދި މުވައްސަސާތަކުން ބައެއް ފަހަރު އެންމެ އެކަށީގެންވާ ހައްޤާއި ރައްކާތެރިކަން ކުޑަކުދިންނަށް ނުލިބޭ ފަހަރު އާދެއެވެ. ބައެއް ފަހަރު ޖިސްމާނީ ގެއްލުމާއި، ގިންސީ ހާނިއްކައިގެ ޝިކާރައަކަށް ކުޑަކުދިން ވެގެންދެއެވެ. މަދުން ނަމަވެސް މިފަދަ ގެއްލުންތަކުގެ ސަބަބުން ކުޑަކުދިންގެ ފުރާނަވެސް ގެއްލިފައި އެބަހުއްޓެވެ. އެހެންކަމުން ޤާނޫނެއްގައި އަދި ހައްޤުތައް ކަނޑައެޅިފައިވީނަމަވެސް މި ހައްޤޫތައް އެންމެ އެކަށީގެންވާ ގޮތުގައި ކުޑަކުދިންނަށް ނުލިބޭނަމަ ޤާނޫނުގައި ލިޔެފައި އޮތުމުގެ ބޭނުމެއް ނެތެވެ.