ހޫނު މިނާ ކަރަންޓު ބިލް ބޮޑުވުމާ ހުރީ ކޮން ގުޅުމެއް؟

ކުރިޔަށް މިއޮތީ ހޫނު މޫސުމަށްވުމާއެކު، އަބަދުވެސް ކަރަންޓުގެ ހިދުމަތްދޭ ތަންތަނަށް އަންނަ ޝަކުވާއެއް އޮވެ އެވެ. އެ ޝަކުވާއަކީ އަހަރުގެ އެހެން މަސްތަކާއި އަޅާބަލާއިރު، ހޫނު މޫސުމާއި ދިމާކޮށް ކަރަންޓު ބިލްތައް ބޮޑުވުމެވެ. ބަވަނަ ވެފައިވާ ދުނިޔޭގައި މިކަން މިގޮތަށް ހިނގާ ސަބަބު އޮޅުން ފިލުވުމަކީ ފަސޭހަކަމަކަށް ވިޔަސް އިންސާނީ ތޮބިއްޔަތާއި، އެއްގޮތައް އެކަމަށް މާބޮޑު ސަމާލުކަމެއް ދިނުމުގެ ބަދަލުގައި، އާންމުކޮށް ކުރެވެމުން މިގެންދަނީ އެ ޝަކުވާ އެވެ. މިއާއެކު، މިކަން މިގޮތައް ހިނގަން މެދުވެރިވާ ސަބަބަކީ ކޮބާތޯ ވަރަށް ތިލަކޮށް ބަލާލުން މުހިންމު ކަމުގައި ދެކެމެވެ.

މޫސުމަށް އަންނަ ބަދަލާއިއެކު ކަރަންޓުބިލް ބޮޑުވުމަކީ ހަމައެކަނި ރާއްޖޭގައި ދިމާވާ މައްސަލައެއް ނޫނެވެ. ހޫނު މޫސުމާއި ދިމާކޮށް، އެހެން ގައުމުތަކުގައިވެސް މި މައްސަލަ ދިމާވެ އެވެ. އޭގެތެރޭގައި އަވައްޓެރި އިންޑިއާ، ލަންކާ، ބަންގްލަދޭޝްގެ އިތުރުންވެސް އެހެން ގައުމުތައްވެސް ހިމެނެއެވެ.

advertisement

ހޫނު މޫސުމާއި ދިމާކޮށް ކަރަންޓުބިލް ބޮޑުވުމަކީ އެކަމަށް ސަމާލުވެ ތިބެއްޖެ ނަމަ ބިލް ބޮޑުނުވެ ސަލާމަތްވުމުގެ ފުރުސަތުވެސް އޮތް ކަމެކެވެ. އެކަމަށްޓަކައި ކުރަންޖެހޭ ކަންކަން ކުރުމުގެ ބާރު އޮންނަނީވެސް ކަސްޓަމަރު އަތްމަތީގަ އެވެ.

ހޫނުމޫސުމުގައި ބިލް ބޮޑުވުމުގެ އެންމެ ބޮޑު އެއް ސަބަބަކަށް ވަނީ ބޭރާއި އެއްވަރަށް ގޭގެ އެތެރޭގެ ފިނިހޫނުމިންވެސް އުފުލުމެވެ. ރޫމްޓެމްޕަރޭޗަރ މައްޗަށްދާ ވަރަކަށް އެތަނެއް ފިނި ކުރުމުގެ މަސައްކަތް ހަވާލުކޮށްފައިވާ އެއަރކޮންޑިޝަން ނުވަތަ އޭސީތަކުން ކުރަންޖެހޭ މަސައްކަތް ބޮޑުވެގެންދެ އެވެ. އެއާއެކު އެ މަސައްކަތް ކުރުމަށް އިތުރަށް ކަރަންޓުނަގައި، ބިލަށް އެބައި އިތުރުވެގެންދެ އެވެ.

2018 ވަނަ އަހަރާއި 2019 ވަނަ އަހަރު މާލޭގައި އެކަނި ކަރަންޓް ބޭނުންކުރި ގޮތައް ބަލާއިރުވެސް 2018 ވަނަ އަހަރަށްވުރެ 2019 ވަނަ އަހަރު ގޭބީސީތަކުން ކަރަންޓް ބޭނުންކުރު މިންވަރު ވަނީ އިތުރުވެފައެވެ. ޖަނަވަރީ މަހުން ފެށިގެން އޭޕްރިލް މަހާއި ހަމައަށް ކަރަންޓް ބޭނުންކުރާވަރު އައީ އިތުރުވަމުންނެވެ. އެންމެ ގިނައިން ކަރަންޓް ބޭނުންކޮށްފައިވަނީ އޭޕްރިލް މަހުއެވެ. އޭޕްރިލް މަހުން ފެށިގެން އޮގަސްޓް މަހާއި ހަމައަށް އެވްރެޖްކޮށް ގޭބީސީތަކުން ކަރަންޓް ބޭނުންކުރާވަރު އިތުރެވެ. ނަމަވެސް އޭގެފަހުން ކަރަންޓް ބޭނުންކުރާ މިންވަރު ވަނީ ދަށްވެފައެވެ.

މިކަންކަން މިހެން ހުރުމާއެކު، ހޫނު މޫސުމުގައި، ފިނި ކުރަން ގެންގުޅޭ އާލާތްތަކާއި، ހޫނު ކުރަން ގެންގުޅޭ އާލާތްތަކަށް ރަނގަޅަށް ބަލައިގެން އުޅެފިނަމަ، ބިލް ބޮޑުވުމުގެ ފުރުސަތު ކުޑަވެގެންދާނެ އެވެ. އެގޮތުން އޭސީވެސް 25 ޑިގްރީއަށްވުރެ ދަށް ނުކުރުމާއި، ފިނި ބޭރު ވާގޮތައް ކޮޓަރީގެ ދޮރުތައް ހުޅުވާފައި ނުބެހެއްޓުން އަދި އަވިނުވަންނަ ގޮތައް ކުޑަދޮރުތަކުގައި ފޮތި ދެމުން ފަދަ ކުދިކުދި ކަންކަން ކޮށްގެން އަޅުގަނޑުމެންނަށް ބިލް ބޮޑުވިޔަ ނުދީ އެއްވަރެއްގައި ހިފެހެއްޓުމުގެ ފުރުސަތު އެބައޮތެވެ. ހޫނު މޫސުމުގެ ކުރިންނާއި އޭގެ ފަހުންވެސް އޭސީގެ އައުޓްޑޯ ޔުނިޓާއި، އިންޑޯ ޔުނިޓް ސާވިސް ކުރުމާއި، ސާވިސް ނުކުރިކަމުގައިވީނަމަވެސް، ފިލްޓަރުތައް ސާފުކޮށްލުން ފަދަ ކަންކަން ކޮށްގެން އޭސީގެ އެފިޝިއެންސީ އިތުރު ކުރުމުގެ ފުރުސަތު ބޮޑުވެ އެވެ. އަދި އޭސީގެ އައުޓްޑޯ ޔުނިޓް ހިޔާކުރުމަކީވެސް އޭސީގެ އެފިޝިއެންސީއަށް ރަނގަޅު ބަދަލެއް ގެނުވާނެ ކަމެކެވެ.

މީގެ އިތުރުން އެމްބިއެންޓް ޓެމްޕަރޭޗަރ ހުންނަ ގޮތުންނާއި، ރާއްޖޭގައި މިހާތަނަށް އިމާރާތް ކުރެވިފައިވާ ތަންތަނަކީ އެނާޖީ އެފިޝިއެންޓް އިމާރާތްތަކަކަށް ނުވުމުން، 16 ޑިގްރީއަށް އޭސީ ދަށްކުރިނަމަވެސް އެ ޓެމްޕަރޭޗަރ އަށް އޭސީއަކަށް އެތަނެއް ފިނި ކުރެވޭނީ ވަރަށް މަދު ހާލަތެއްގަ އެވެ. ކުޑަ ތަނެއްގައި ބޮޑު އޭސީއެއް ހަރުކޮށްގެން އެވަރަށް ޓެމްޕަރޭޗަރ ދަށްކުރެވުނު ނަމަވެސް މާގިނަ އިރުތަކެއް ވަންދެން 16 ޑިގްރީގައި އެކޮޓަރިއެއް ނުބެހެއްޓޭނެ އެވެ. އެހެން ކަމުން އަނެއްކާވެސް އޭސީ ކުރަންޖެހޭ މަސައްކަތް ބޮޑުވެ، ކަރަންޓު އިތުރަށް ބޭނުން ކުރަން ފަށާނެއެވެ.

ކަން މިހެން ހުރުމާއެކު، އަބަދުވެސް 25 ޑިގްރީއިން މަތީގައި އޭސީ ބެހެއްޓުމަކީ މިކަމުގައި އޮތް އެންމެ ހަރަދުކުޑަ އަދި ރަނގަޅު ގޮތެވެ. އޭސީއެއް ގަންނަ އިރު، އެތަނަކާއި އެކަށީގެންވާ ޒައިޒެއްގެ އޭސީއެއް ގަތުމާއި، އޭސީ ގަންނަ އިރު އެނާޖީ އެފިޝިއެންސީ ކްލާސްއަށް ބެލުންވެސް މުހިންމެވެ.