2 ޑޯޒް ޖެހުމުން ދިން ލުއިތައް މެދުކަނޑާލައިފި

ކޮވިޑް ވެކްސިންގެ ދެ ޑޯޒު ފުރިހަމަކުރުމުން ދަތުރުކުރަން ދިން ލުއިތައް މި މަހުގެ 5 އިން 15 ވަނަ ދުވަހާ ހަމައަށް މެދުކަނޑާލައިފި އެވެ.

އެޗްޕީއޭއިން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ ވެކްސިން ޖެހުމުން ދަތުރުކުރަން ދިން ލުއިތައް މެދުކަނޑާލުމުގެ އިތުރުން، ހުއްދައާއެކު ޒަރޫރީ ބޭނުންތަކަށް ފިޔަވައި މީހުން ދިރިއުޅޭ އެއް ރަށުން އަނެއް ރަށާއި ސިނާއީ މަސައްކަތްކުރާ ރަށްރަށަށް ދަތުރުކުރުންވެސް މަނާވާނެ ކަމަށެވެ.

advertisement

ޒަރޫރީ ބޭނުމަކަށް މާލޭގެ އިތުރުން އެއް ރަށުން އެހެން ރަށަކަށް ވެސް ދަތުރުކުރެވޭނީ އެޗްޕީއޭގެ ހުއްދައާއެކު ކަމަށް މަބްރޫކް ވިދާޅުވި އެވެ.

ކޯވިޑް19 ރާއްޖޭގައި ފެތުރުން އިތުރުވުމާއިއެކު އެޗްޕީއޭއިން ވަނީ ގިނަ ފިޔަވަޅުތަކެއް ވަރުގަދަވެސް ކޮށްފައެވެ. އޭގެތެރޭގައި ރޭގަނޑު 12އިން ފަތިހު ހަތަރަކަށް މާލެ ސަރަހައްދުގައި އެއްގަމު އުޅަނދުފަހަރު ދުއްވުން މަނާކުރުމާއި، ޕާކުތަކާއި މައިޒާންތައް ބަންދުކުރުމާއި، ކުޅިވަރު ހަރަކާތްތަކާއި މުބާރާތްތައް ބޭއްވުން މަނާކުރުމުގެ އިތުރުން ކިންޑަގާޑަންއިން ފެށިގެން ގްރޭޑް12 އާ ހަމައަށް ކިޔެވުން އޮންލައިންކޮށް ކުރިއަށްގެންދިއުމާއި، ސަރުކާރު އޮފީސްތައް ބަންދުކުރުން ހިމެނެއެވެ.

ފާއިތުވެދިޔަ 24 ގަޑިއިރުގެ ތެރޭގައި އެހަނިވެސް ރާއްޖެއިން 585 މީހުން ވަނީ ޕޮޒިޓިވްވެފައެވެ. އަދި މިހާރު އެކްޓިވް ކޭސްތަކުގެ އަދަދު ވަނީ ހަ ހާހުން މައްޗަށް އަރާފަ އެވެ.