ހިޔާގައި އުޅޭ ކުދިންގެ ހައްޤުތައް ކަށަވަރުކޮށްދިނުމުގައި “ފެއިލް” ވެފައި

ވިލިނގިލީގައި ހުންނަ ކުޑަކުދިންގެ ހިޔާގައި އުޅޭ ކުދިންނަށް ބޭނުންވާ ވަސީލަތްތައް އެތަނުގައި ޤާއިމްވެފައި ނެތުމުގެ ކަންބޮޑުވުން ކުޑަކުދިންގެ ހައްޤުތަކަށް ވަކާލާތުކުރާ ޖަމިއްޔާއެއްކަމަށްވާ އެޑްވަރކޭޓިންގ ދަ ރައިޓްސް އޮފް ޗިލްޑްރަން، އާރކްއިން ފާޅުކޮށްފިއެވެ.

އާރކްއިން އިން މި ކަންބޮޑުވުންތައް ފާޅުކޮށްފައިވަނީ ދާދިފަހުން ކުޑަކުދިންގެ ހިޔާގައި ހިނގި އަލިފާނުގެ ހާދިސާއާއި ގުޅިގެންނެވެ. އެ ޖަމިއްޔާއިން ބުނެފައިވަނީ ކުޑަކުދިންގެ ހިޔާގައި ގިނަ މައްސަލަތަކެއްހުރެ އެތަނުގައި ދިރިއުޅޭ ކުދިންނަށް އަޅާލުމުގައި އިހުމާލުތަކެއް ވެފައިވާކަމަށެވެ. ކޯވިޑް19 އާއި ގުޅިގެންވެސް ކުޑަކުދިންގެ ހިޔާއަށް އެންމެ އެކަށީގެންވާ ގޮތުގައި އަޅާނުލެވިވާކަމަށެވެ. އާރކްއިން ވަނީ ކުޑަކުދިންގެ ހިޔާގައި ހުރި މައްސަލަތަކުގެ ކަންބޮޑުވުން ސަރުކާރާއި ކަމާގުޅުންހުރި ފަރާތްތަކުގެ ހިސާބަށް ގެންގޮސްފައެވެ.

advertisement

އާރކްއިން ވަނީ ކުޑަކުދިންގެ ހިޔާގައި އުޅޭ ކުދިންނާއި ގުޅޭގޮތުން މީޑިއާތަކުގައި ދެކެވޭ ވާހަކަތަކަށްވެސް ކަންބޮޑުވުން ފާޅުކޮށްފައެވެ. ނަމަވެސް އަސްލު ހަޤީގަތަކީ އެތަނުގައި ދިރިއުޅޭ ކުދިންނަށް ބޭނުންވާ ވަސީލަތްތައް ފޯރުކޮށްދިނުމުގައި އެކުދިންގެ ހައްޤުތައް ރައްކާތެރިކޮށްދިނުމުގައި ފެއިލްވެފައިވާކަމަށެވެ.

އާރކްއިން ވަނީ ހިޔާގައި އުޅޭ ކުދިންގެ ތެރެއިން ސުކޫލަށް ނުދާ ކުދިން ސުކޫލަށް ފޮނުވަން އެއްވެސް ވަރަކަށް ބާރު ނާޅައި ކިޔެވުމުގެ ހައްޤުންވެސް އެކުދިންނަށް ނުލިބޭކަން ފާހަގަކޮށްފައެވެ. އަދި އެކުދިންނާއި ސީދާ ކުޅުންހުރި ކަންކަމުގައި އެކުދިންގެ ހިޔާލާއި މަޝްވަރާ ނުހޯދާކަންވެސް ވަނީ ފާހަގަކޮށްފައެވެ.

މީގެތެރޭގައި އަނިޔާ ލިބިފައިވާ ކުދިންވެސް ރަށްރަށުގައި ހުރި ފެމިލީ އެންޑް ޗިލްޑްރަން ސަރވިސް ސެންޓަރުތަކުގައި ކިޔެވުމުގެ ހައްޤު ނުލިބި ގިނަދުވަސްތަކެއް ވަންދެން ތިބެން ޖެހިފައިވާކަން ވަނީ އާރކްއިން ފާހަގަކޮށްފައެވެ.

ކުޑަކުދިންގެ ހިޔާއާއި ފިޔަވަތީގައި އުޅުނު ބައެއް ކުދިން މިހާރު ވަނީ އަތޮޅުތަކުގައި ހުރި ފެމިލީ އެންޑް ޗިލްޑްރަން ސަރވިސް ސެންޓަރުތަކަށް ބަދަލުކޮށްފައެވެ. ނަމަވެސް މިއީ ރަށްރަށުގައި ހުރި ތަންތަން ކަމަށްވެފައި ރަށްރަށުންވެސް މިކުދިންނަށް ލިބެންޖެހޭ އޯގާތެރިކަމާއި އަޅާލުން ނުލިބެއެވެ. އެކުދިން ފެންނަނީ މުޖްތަމައުން ބާކީވެފައިވާ މަންޒަރެވެ. އަދި މިތަންތަނަށް އެކުދިން ބަދަލުކޮށްފައިވަނީ އެންމެ އެކަށީގެންވާ ވަސީލަތްތައްވެސް ޤާއިމްނުކޮށްދީއެވެ. އޭގެތެރޭގައި އެކުދިންނަށް ބޭނުންވާ ސްޕެޝިއަލިސްޓުންގެ ޙިދުމަތް ފާހަގަކޮށްލެވެއެވެ.

މިކުދިންގެ ސަލާމަތާއި ރައްކާތެރިކަމާއި މިކުދިންނަށް ލިބެންޖެހޭ ޙިދުމަތްތައް ފޯރުކޮށްދިނުމަކީ ސަރުކާރުގެ ޒިންމާއެކެވެ. އެހެންކަމުން މިކުދިންނަށް ބޭނުންވާ އެހީތެރިކަން ސަރުކާރާއި، ކަމާގުޅިންހުރި ފަރާތްތަކާއި މީޑިއާއިން ލިބުމަކީ މިކުދިންގެ ކުރިއެރުމާއި ހައްގުތައް ކަށަވަރުކުރުމަށް މުހިންމު ކަމެކެވެ.