ކަރަންޓް ކޭބަލްތައް ގެއްލުނު މައްސަލަ ދަނީ ތަހުޤީގުކުރުމަން – އެޗްޑީސީ

ހިޔާ މަޝްރޫޢުގެ ދަށުން އިމާރާތްކޮށްފައިވާ ހައުސިންގ ޔުނިޓުތަކަށް ކަރަންޓުގެ ޙިދުމަތް ދިނުމަށް ގެނެވިފައިވާ ކަރަންޓް ކޭބަލްތައް ގެއްލިފައިވާކަން އެޗްޑީސީގެ ސަމާލުކަމަށް އައުމާއި އެކު އެ ކުންފުނީގެ އިންޓަރނަލް އޮޑިޓުންނާއި މޯލްޑިވްސް ޕޮލިސް ސާވިސަސްއާއި ގުޅިގެން މިހާރު މިކަން ތަޙުޤީގުކުރަމުންދާކަމަށް އެ ކުންފުނިން ބުނެފިއެވެ.

ހުޅުމާލެ ފޭސް 2 ހިޔާ ސަރަޙައްދުގައި މީހުން ދިރިއުޅެން ފެށުމުގެ ކުރިން ކަރަންޓުގެ ޙިދުމަތް ދިނުމަށް ގިނަ މަސައްކަތްތަކެއް ކުރެވެމުން ދާއިރު މިފަދަ ކަމަކާއި ކުރިމަތި ވުމަކީ މިކަމުގެ ސަބަބުން މިމަޝްރޫޢު ހިންގުމަށް އެތަކެއް ދަތިތަކެއް ކުރިމަތިވެގެން ދާނެ ކަމެއް ކަމުގައި އެޗްޑީސީން ވަނީ ފާހަގަކޮށްފައެވެ. އަދި ކަމާބެހޭ ފަރާތްތަކާއި ގުޅިގެން މި މައްސަލަ ތަޙުޤީގުކޮށް މިކަމުގައި ބައިވެރިވާ ފަރާތްތަކަކީ ކޮބައިތޯ ދެނެގަތުމުގެ މަސައްކަތް ދަނީ ކުރެވެމުންނެވެ. މި ކަމުގައި މިކޯޕަރެޝަންގެ އެއްވެސް މުވައްޒަފެއްގެ ބައިވެރިވުމެއް ވާނަމަ އެ މުވައްޒަފަކާއި މެދު ފިޔަވަޅު އެޅުމަށް ފަސް ނުޖެހޭނެ ކަމަށްވެސް އެޗްޑީސީން ބުނެއެވެ.

advertisement

މީގެއިތުރުން، ހުޅުމާލެ ފޭސް 2 ގައި ގިނަ އަދަދެއްގެ ރައްޔިތުންތަކެއް އާބާދުވެގެން ދާއިރު ކޮންމެހެން ހުންނަން ޖެހޭނެ އަސާސީ ޙިދުމަތްތައް ޤާއިމުކުރުމުގެ މަސައްކަތްތައް ހުއްޓުމަކަށް ނުގެނެސް ތާވަލުތަކާއި އެއްގޮތަށް ކުރިއަށް ގެންދިއުމަށް ކުރެވެން ހުރި ހުރިހާ މަސައްކަތެއް މިކޯޕަރޭޝަންގެ ފަރާތުން ކުރަމުން ގެންދާނެ ކަމުގައި އެޗްޑީސީން ވަނީ ބުނެފައެވެ.