އިނގިރޭސިވިލާތައް އެތެރެވުން މަނާ “ރެޑް ލިސްޓް” ޤައުމުތަކުގެ ލިސްޓުގައި ރާއްޖެ

އިނގިރޭސިވިލާތުގެ “ރެޑް ލިސްޓް” ޤައުމުތަކުގެ ތެރޭގައި ރާއްޖެ ހިމެނިއްޖެއެވެ. މުޅި ދުނިޔޭގައި ކޯވިޑް-19 ހަލުވިކަމާއެކު ފެތުރެމުން އަންނާތީ، މިކަމާ ގުޅިގެން އިނގިރޭސިވިލާތުގެ ސަރުކާރުން އަޅަމުންދާ ފިޔަވަޅުތަކުގެ ތެރެއިން، އެޤައުމުން “ރެޑް.ލިސްޓު” ކުރާ ޤައުމުތަކުން އެޤައުމަށް އެތެރެވުން އަންނަނީ މަނާކުރަމުންނެވެ.

އިނގިރޭސިވިލާތަށް އެތެރެވުން މަނާ ޤައުމުތަކުގެ ލިސްޓުގައި 12 މެއި 2021 ވާ ބުދަ ދުވަހުގެ ފަތިހު 04:00 އިން ފެށިގެން ރާއްޖެ ހިމެނުމަށް އެޤައުމުން ވަނީ ނިންމާފައެވެ. މިނިންމުމުގެ ސަބަބުން އިނގިރޭސިވިލާތާއި އަޔަލެންޑުގެ ރައްޔިތުންނާއި، އިނގިރޭސިވިލާތުގެ ރައްވެހިކަމުގެ ޙައްޤު ލިބިފައިވާ ފަރާތްތައް ފިޔަވައި އެހެން ފަރާތަކުން އިނގިރޭސިވިލާތަށް އެތެރެވުމުގެ 10 ދުވަސް ކުރިން ރާއްޖެއަށް ޒިޔާރަތްކޮށްފައިވާނަމަ ނުވަތަ ރާއްޖޭގައި ޓްރާންސިޓް ކޮށްފައިވާނަމަ، އިނގިރޭސިވިލާތައް އެތެރެވުން މަނާވާނެއެވެ.

advertisement

ޕޮރިން މިނިސްޓްރީން ވިދާޅުވީ، އިނގިރޭސިވިލާތަށް އެތެރެވުމުގެ ހުއްދަ ލިބިފައިވާ ފަރާތްތަކުން އެޤައުމަށް އެތެރެވުމުގެ 10 ދުވަސް ކުރިން ރާއްޖެއަށް ޒިޔާރަތްކޮށްފައިވާނަމަ ނުވަތަ ޓްރާންސިޓް ކޮށްފައިވާނަމަ، އެޤައުމަށް އެތެރެވުމަށްފަހު އެޤައުމުގެ ސަރުކާރުން ކަނޑައަޅާ މަރުކަޒެއްގައި 10 ދުވަހުގެ ކަރަންޓީނު ފުރިހަމަކުރަންޖެހޭނެކަމަށެވެ. އަދި ކަރަންޓީނުގެ 2 ވަނަ ދުވަހާއި 8 ވަނަ ދުވަހު ކޯވިޑް ޓެސްޓް ހަދަންޖެހޭނެ ކަމަށް ވެސް އެޤައުމުން އަންގާފައިވާކަމަށް ފޮރިން މިނިސްޓްރީން ވިދާޅުވެއެވެ. އެހެންކަމުން އިނގިރޭސިވިލާތައް ދަތުރުކުރާ ދިވެހިން މިކަމަށް ސަމާލުވުމަށް ފޮރިން މިނިސްޓްރީން ވަނީ އިލްތިމާސް ކުރައްވާފައެވެ.

ރާއްޖޭގެ އިތުރުން އިނގިރޭސިވިލާތަށް އެތެރެވުން މަގާ ޤައުމުތަކުގެ ލިސްޓަށް ތުރުކީއާއި ނޭޕާލްވެސް ވަނީ އިތުރުކޮށްފައެވެ. މި ތިން ޤައުމުވެސް ރެޑް ލިސްޓަށް ލާފައިވަނީ ކޯވިޑް ފެތުރުން އިތުރުވެފައިވާތީއެވެ.