ރިޕޯޓު: ރައީސް ނަޝީދަށް ދިން ޓެރަރިސްޓް ހަމަލާ – އެތައް ދުވަހެއް ކުރިން ޖަހަމުން އައި ރަނގަބީލެއް!

“ގަބޫލުކުރަންޖެހޭ ހަގީގަތަކީ އަޅުގަނޑުމެންގެ ދިވެހި މުޖުތަމައުގެ ތެރޭގައި މިފަދަ ނުރައްކާތެރި ކަންތައްތައް ކުރެވޭނެ ގާބިލް ފަރާތްތައް ތިބިކަން. އެއީ އަޅުގަނޑުމެން ދެބަސްވާ ކަމެއް ނޫން،” ބުރާސްފަތި ދުވަހުގެ ރޭ އިރާކޮޅު ބޮމެއް ގޮއްވާލައި ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދަށް ދިން ނުރައްކާތެރި ޓެރަރިސްޓް ހަމަލާއާ ގުޅޭ ގޮތުން މައުލޫމާތު ދިނުމަށް ހުކުރު ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ޕޮލިސް ކޮމިޝަނަރ މުހައްމަދު ހަމީދު ވިދާޅުވިއެވެ.

މުޅި ގައުމު ވެސް ސިއްސުވައިލި އަދި ދުނިޔޭގެ ސަމާލުކަން ވެސް ހުއްޓުނު މި ހަމަލާގައި ރައީސް ނަޝީދުގެ ފުރާނަ ސަލާމަތްވި ނަމަވެސް ބޮޑެތި އަނިޔާތަކެއް ލިބި ނުރައްކަލަށް ހުށަހެޅުނެވެ. ލިބިވަޑައިގެންނެވި އަނިޔާތަކަށް މި ވަގުތު އަންނަނީ ފަރުވާ ހޯއްދަވަމުންނެވެ. ހާލުކޮޅު ރަނގަޅުވަމުން އަންނަ ކަމަށް ޑޮކްޓަރުން މައުލޫމާތު ދެއްވާފައި ވެއެވެ. މި ހަމަލާގައި އެމަނިކުފާނުގެ އިތުރު ހަތަރު މީހަކަށް ހޮސްޕިޓަލުގައި ފަރުވާ ދޭންޖެހުނެވެ. އޭގެ ތެރޭގައި އިނގިރޭސި ރައްޔިތަކު ވެސް ހިމެނުމާއި ރައީސް ނަޝީދަކީ ވެސް ބައިނަލްއަގުވާމި ދުނިޔޭގައި ނަން މަޝްހޫރު ބޭފުޅަކަށްވުމުން މި ހަމަލާގެ ވާހަކަ ބޭރުގެ މީޑިއާތަކުން ވެސް ވަރަށް ބޮޑަށް ކަވަރުކުރިއެވެ.

advertisement

މާލޭގެ އެންމެ ކާރޫބާރޫ ބޮޑު މަގު ކަމުގައިވާ މަޖީދީ މަގުގައި އެއްޗެއް ގޮއްވާލައިގެން މި ހަމަލާ ދީފައި ވަނީ ކާފިއު ގަޑި ކައިރިވަން ދަނިކޮށް ގިނަ ބަޔަކު މަގުތަކުގައި ވެސް އުޅެނިކޮށެވެ. ހާއްސަކޮށް ބައިބޯ ގަޑިއެއްގައެވެ. ނަމަވެސް ހަމަލާ ދިން ބަޔަކު އެކަމަށް ޖެހިލުމެއް ނެތި އެކަން ކުރީއެވެ. ކޮމިޝަނަރ ހަމީދު ވިދާޅުވި ފަދައިން މިފަދަ ނުރައްކާތެރި ކަންކަން ކުރެވޭނެ ގާބިލްކަން ހުރި ބަޔަކު އެކަން ކުރީއެވެ. އަސްކަރީ ފެންވަރުގެ ބޮމަކަށް ނުވި ނަމަވެސް މިއީ އަޑުގަދަ ނުރައްކާ ބޮޑު އަދި އޭގެ އަސަރު ވަރުގަދަ ބޮމެކެވެ. ސައިކަލެއްގައި ހަރުކޮށްގެން ހަމަލާދިން އިރު އޭގެ ޕެޓްރޯލް ޓޭންކް ފަޅައިގެން ދިޔަ ނަމަ އަލިފާނާ އެކު ނުރައްކާ އިތުރަށް ބޮޑުވީސް ކަމަށް ތަޖުރިބާކާރުން ލަފާކުރެއެވެ. ސުވާލަކީ އެފަދަ ކަމެއް ހިނގައިގެން ދިޔަ އިރު އަދި އެފަދަ ކަމެއް ރޭވިގެން ދިޔައިރު އެއްވެސް ބަޔަކަށް އޭގެ އިޝާރާތެއް ވެސް ހިލަމެއް ވެސް ވެފައި ނުވަނީ ކީއްވެބާއެވެ؟ ނޫސްވެރިން ވެސް އަދި އާންމުންގެ ވެސް އެންމެ ބޮޑު ސުވާލަކީ ފުލުހުންނާއި އަދި ރައީސް ނަޝީދުގެ ސަލާމަތީ ކަންކަން ބަލަހައްޓާ ސިފައިންގެ އިންޓެލިޖެންސްއަށް މިކަމުގެ ކުޑަ ވެސް ހީއެއް ވެފައި ނުވަނީ ހެއްޔެވެ؟ ސިފައިންގެ ވެރިންގެ ސުވާލަކީ އާންމު މީހަކަށް ވެސް އެކަމުގެ ހީއެއް ވެސް ވެފައި ނުވަނީ ހެއްޔެވެ؟

ކޮމިޝަނަރ ހަމީދު ވިދާޅުވި ވާހަކަތަކަށް ބަލާއިރު މިއީ ނޭނގި ހިނގި ކަމެއް ނޫނެވެ. މިކަމުގެ ރަނގަބީލު ޖަހަމުން އަންނަތާ އެތައް އަހަރެކެވެ. މުޖުތަމައުގެ ތެރޭގައި އެފަދަ ހަމަލާތައް ދެވޭ ފެންވަރުގެ މީހުން ތިބި އިރު އަދި އެފަދަ މަގުސަދުތައް ހިތުއަޅައިގެން އަދި ފާޅުކުރަމުންދާ މީހުން މަދެއް ނޫނެވެ. މީހުން ފުރާނަ އަށް ނުރައްކާކުރުމަށް ގޮވާލައި އަދި އެފަދަ ކަންކަމަށް ހިތްވަރު ދީ ބަސްބުނާ މީހުން މަދެއް ނޫނެވެ. ސޯޝަލް މީޑިއާ މެދުވެރިކޮށް ސީދާ ގޮތުންނާއި ނުސީދާ ގޮތުން ނަފްރަތު އުފެއްދުމަށް މަސައްކަތްކުރާ މީހުން ވެސް މަދެއް ނޫނެވެ. ސިޔާސީ ބޭނުންތަކާއި ދީނީ ދެބައިވުންތަކުގެ ތެރޭގައި މީހުންގެ ފުރާނަ އަށް ނުރައްކާކުރުމަށް ގޮވާލާ ގޮވައިލުންތައް މަދެއް ނޫނެވެ. އަދި އެފަދަ ކަންކަން ރާވާ ހިންގާ މީހުން ވެސް މަދެއް ނޫނެވެ. ނަމަވެސް ކޮމިޝަނަރ ހަމީދު ވެސް ވިދާޅުވި ގޮތަށް އެކި ސަބަބުތަކާ ހުރެ އެފަދަ އެތައް ބަޔަކު މި މުޖުތަމައުގައި މިނިވަންކަމާ އެކު އެބަ އުޅެއެވެ. ސިޔާސީ ގޮތުންނާއި ދީނީ ގޮތުން ހައްދުފަހަނައަޅާފައިވާ އެތައް ބަޔަކު މި މުތަމައުގެ ތެރޭގައި އެބަ ތިއްބެވެ.

“ބައެއް ފަރާތްތައް ޖަލުތަކުގައި، އަނެއް ފަރާތްތަކެއް، ވަރަށް ގިނަ ފަރާތްތަކެއް މިނިވަންކަމާ އެކު، ބައެއް ހާލަތްތަކުގައި ޝަރީއަތުން ކުށް ސާބިތުނުވެގެން ނުވަތަ އެ ފަރާތްތަކުގެ މައްޗަށް އެކަށީގެންވާ ހެކި ނެތުމުގެ ސަބަބުން މިނިވަން ރައްޔިތުންގެ ގޮތުގައި ހަރަކާތްތެރިވަމުންދޭ. އެހެންވީމާ މިފަދަ ވެއްޓެއްގައި ހުރިހާ ވައްތަރެއްގެ ވެސް ނުރައްކަލެއް ހުންނާނެ،” ސީޕީ ހަމީދު ވިދާޅުވިއެވެ.

ރައީސް ނަޝީދަކީ މި ދެ ވައްތަރުގެ ނުރައްކާތައް ވެސް އަމާޒުވެފައިވާ ބޭފުޅެކެވެ. ސިޔާސީ ގޮތުން ވެސް އަދި ދީނީ ހަރުކަށި ވިސްނުމުގެ ފަރާތްތަކުގެ ބަހުގެ ހަމަލާތައް ވެސް އެމަނިކުފާނަށް ރައްދުވެއެވެ. އަދި އެމަނިކުފާނަށް ދޭ އިންޒާރުތައް ވެސް މަދެއް ނޫނެވެ. އަދި ހަށިކޮޅަށް ގެއްލުން ދިނުމަށް ސީދާކޮށް އަދި ނުޝީދާކޮށް އެކި ފަހަރު މަތިން ހިތްވަރު ދީފައިވާ މައްސަލަތައް ފުލުހުން ވެސް ތަހުގީގުކުރެއެވެ.

ސަލާމަތި ގޮތުން ބަލާއިރު ވެސް ސިފައިންނާއި ފުލުހުން ވެސް އެންމެ ހައި ރިސްކް ބޭފުޅުންގެ ތެރޭގައި ރައީސް ނަޝީދު ހިމަނުއްވާފައި ވެއެވެ. ޗީފް އޮފް ޑިފެންސް ފޯސް މެޖޭ ޖެނެރަލް އަބްދުﷲ ޝަމާލް ވިދާޅުވި ގޮތުން ނަމަ ރައީސް ނަޝީދަށް ގިނަ އިންޒާރުތަކެއް ލިބެމުން ދެއެވެ. އެހެންކަމުން ސިފައިން ސެކިއުރިޓީ ވެސް ދެނީ އެންމެ ހައި ރިސްކް ބޭފުޅެއްގެ ގޮތުގައި ބަލައިގެން ކަމަށް ވިދާޅުވިއެވެ. އެ ގޮތުން ދެއްވަނީ ކުރީގެ ރައީސުންނަށް ނުވަތަ އެހެން ބާރުތަކުގެ އިސްވެރިންނަށް ދޭ ސެކިއުރިޓީ އަށް ވުރެ ވެސް މަތީ ދަރަޖައިގެ ސެކިއުރިޓީއެކެވެ. އަދި އެޑްވާންސް ޓީމުތައް ފޮނުވައިގެން އެމަނިކުފާނު ވަޑައިގަންނަވާ ތަންތަން ވެސް ޗެކްކުރައްވާ ކަމަށް ވިދާޅުވިއެވެ. އެހެންކަމަށް ވާ ނަމަ އެހާ ފަސޭހައިން އެމަނިކުފާނުގެ ފުރާނައަށް ނުރައްކާކުރާ ވަރުގެ ބޮމުގެ ހަމަލާއެއް ދެވުނީ ކީއްވެ ހެއްޔެވެ؟ މިއީ ޖަވާބު ހޯދަން އެހާ ފަސޭހަ ކަމަށް ނުވެދާނެއެވެ.

ކޮންމެ ސަބަބަކާ ހުރެ ނަމަވެސް ރައީސް ނަޝީދަށް އެވަރުގެ ހަމަލާއެއް ދެވުނީ ކޮންމެ ވެސް ހިސާބަކުން ފެއިލްވެގެންނެވެ. ސަލާމަތީ ކަންކަން ކިތަންމެ މޮޅަށް ހުރި ނަމަވެސް ދުނިޔޭގެ އެހެން ގައުމުތަކުގައި ވެސް ވެރިންނަށް ހަމަލާ ދީފައި އެބަހުއްޓެވެ. ނަމަވެސް އެހެން ގައުމުތަކާ ހިލާފަށް ރާއްޖެއަކީ ކުޑަކުޑަ ތަނެކެވެ. ވަސީލަތްތަކުގެ ގޮތުން އެފަދަ ކަމެއް ކުރަން އެތައް މަސައްކަތެއް ކުރަންޖެހޭނެ ފަދަ މާހައުލެއް އޮތްތަނެކެވެ. މިފަދަ ހަމަލާއެއް ދެވޭނީ ގިނަ ދުވަސްތަކެއްގެ ރޭވުންތެރިކަމާ އެކުއެވެ. އެމަނިކުފާނު ވަޑައިގަންނަވާ ތަންތަނާއި ވަގުތުތައް ބަލައި ދިރާސާތަކެއް ކޮށްގެންނެވެ. އެވަރުގެ ބޮޑު ކަމެއް ވެގެންދިޔަ އިރު އެއްވެސް ބަޔަކަށް ރޭކާނުލުމަކީ މުޅި ގައުމުގެ ވެސް ފެއިލިއާއެކެވެ. ނުރައްކާތެރި އިންޒާރުތަކާ އެކު ދިރިއުޅުއްވަމުން ގެންދަވާ ބޭފުޅަކަށް ގައުމުގެ ކަމަ ބެހޭ އިދާރާތަކުން ދޭ ސަލާމަތީ ހިދުމަތްތަކާ މެދު ސުވާލު އުފެދޭ އެތައް ކަމެއް މާޒީން ވެސް ފެންނަން އެބަހުއްޓެވެ. އަދި މިއީ ކުއްލިއަކަށް ހިނގިކަމެއް ނޫނެވެ. ފުލުހުންގެ ތެރެއިން ވެސް އެމަނިކުފާނަށް ފާރަލާކަމަށް މީގެ ކުރިން ރައީސް ނަޝީދު ވެސް ހާމަކުރައްވާފައި ވެއެވެ. އެހެންކަމުން މިއީ ކުރިން ވެސް ޖަހަމުން އައި ރަނގަބީލެކެވެ. ހަމަލާ ދެވުނީ ބައެއްގެ އިހްމާލު އެކަމުގައި އޮވެގެންނެވެ.