ކޯވިޑް19ގެ ބޮޑު އެއް ޝިކާރަ: ކުޑަކުދިން!

ކޯވިޑް19 ގެ ސަބަބުން ގިނަ ބައެއްގެ ދިރިއުޅުމަށް ވަނީ ބޮޑެތި ބަދަލުތަކެއް އައިސްފައެވެ. އޭގެތެރޭގައި އެންމެ ބޮޑު ބަދަލެއް އައިސްފައިވާ އެއް ބަޔަކީ ކުޑަކުދިންނެވެ. މެންޓަލީވެސް އަދި ފިޒިކަލީވެސް ކުޑަކުދިންގެ އުޅުމަށް މި ބަލިމަޑުކަމުގެ ސަބަބުން ވަނީ ބޮޑެތި ބަދަލުތަކެއް އައިސްފައެވެ.

ކޯވިޑްގެ ޕެންޑަމަކާއިއެކު ޤައުމު ލޮކްޑައުންކޮށް ގިނަ ދުވަސްތަކެއް ވަންދެން ކުޑަކުދިން ސުކޫލްތަކަށް ނުގޮސް ކިޔެވުން ކުރިއަށްގެންގޮސްފައިވަނީ ގޭގައެވެ. މީގެ ސަބަބުން އުނގެނުމުގައިވެސް ލަސްތަކެއް ދިމާވެ ގިނަ ކަންތައްތަކެއް އެކުދިން ވަނީ ތަޖުރިބާކޮށްފައެވެ. ސުކޫލަށް ގޮސްގެން ކިޔެވުމުގެ ބަދަލުގައި ގޭގައި އިނދެގެން ލެޕްޓޮޕް ނުވަތަ ޓެބްލެޓް ފަދަ ތަކެތި މެދުވެރިކޮށް ކިޔެވުމުގެ ސަބަބުން ކުދިންނަށް ސުކޫލަށް ގޮސްގެން އުނގެނުމާއި ހާސްބައި ތަފާތެވެ. ކިޔެވުމާއި ގިނަކުދިން ދުރުވެ ކިޔެވުމަށް އޮންނަ ޝައުޤުވެރިކަންވެސް މީގެސަބަބުން ކުޑަވެގެންދެއެވެ.

advertisement

ރަހުމަތްތެރިންނާއި ބައްދަލުވުމުގެ ފުރުސަތު ނުލިބި ގޭގައި ގިނަ ދުވަސްތަކެއް ހޭދަކުރަން ޖެހުމުގެ ސަބަބުން ސައިކޮލޮޖިކަލީވެސް ގިނަ ކުދިންނަށް ވަނީ އަސަރުކޮށްފައެވެ. އާންމުގޮތެއްގައި ޝައުގުވެރިކަން ހުންނަ ކަންކަމާއި ދުރުވެ، އާދަތަކަށް ބަދަލު އާދެއެވެ. ކެއިންބުއިމާއި ދުރުވެ، ފަހުން ބޭރަށްދާހިތް އެއްގޮތަކަށްވެސް ބައެއް ކުދިން ނުވެއެވެ.

މި ބަލިމަޑުކަމުން ރައްކާތެރިވުމަށް އެންމެ މުހިންމު އެއްކަމަކީ މާސްކް އެޅުމެވެ. 2 އަހަރުން ދަށުގެ ކުދިން ފިޔަވައި އެހެން އެންމެން މާސްކް އަޅަންޖެހޭއިރު މިއީވެސް ކުޑަކުދިންނަށް ދިމާވާނެ ނުހަނު އުނދަގޫކަމަކަށްވާނެއެވެ.

ކޯވިޑް19 ގެ ކޭސްތައް ރާއްޖޭގައި ހަލުވިކަމާއިއެކު އިތުރުވަމުން އަންނައިރު ބަލިޖެހޭ ކުޑަކުދިންގެ އަދަދުވެސް އަންނަނީ އިތުރުވަމުންނެވެ. ޑޮކްޓަރުން ވިދާޅުވާ ގޮތުގައި މިހާރު އެވްރެޖްކޮށް 10 އަހަރުން ދަށުގެ ކުޑަކުދިންގެ ތެރެއިން ދުވާލެއްގެ މައްޗަށް 70 ނުވަތަ 80 ކުދިން ޕޮޒިޓިވްވެއެވެ އަދި 1 އަހަރުން ދަށުގެ 4 ކުދިން ނޫނީ 5 ކުދިން ދުވާލެއްގެ މައްޗަށް މިހާރު ރާއްޖޭގައި ޕޮޒިޓިވްވެއެވެ. މީގެ ސަބަބުން ގިނަ ދުވަސްތަކެއް ކަރަންޓީން ނުވަތަ އައިސޮލޭޝަން ފެސިލިޓީތަކުގައި ހޭދަކުރަން ޖެހުމުގެ ސަބަބުންވެސް ކުދިންގެ އުޅުމަށް ބޮޑު އަސަރެއް ކުރާނެއެވެ. ޙާއްސަކޮށް ކުރިން ސައިކޮލޮޖިކަލް މައްސަލަތައް ހުންނަ ކުދިންނަށް ދިމާވާ މައްސަލަތައް އިތުރުވެގެންދާނެއެވެ. އެހެންކަމުން އެންމެން މިބަލިން އަވަހަށް އަރައިގަތުމަށް މަސައްކަތްކުރުމަކީ މިވަގުތައް ކުރެވެން އޮތް އެންމެ މުހިންމު އެއްކަމެވެ.