ރޭގަނޑު 9 ޖަހާއިރު ބްރިޖް ބަންދުކުރަނީ

ރޭގަނޑު ނުވައަކުން ފެށިގެން ސިނަމާލެ ބްރިޖް ބަންދުކުރާނެކަމަށާއި އޭގެ ކުރިން ދަތުރުތައް ނިންމުމަށް ފުލުހުން އިލްތިމާސްކުރައްވައިފިއެވެ. ކޯވިޑް އާއި ގުޅިގެން ރައްކާތެރިވުމުގެ ފިޔަވަޅެއްގެ ގޮތުން އެޗްޕީއޭއިން ވަނީ ރޭގަނޑު21:00 އިން ފަތިހު 4:00 އަށް ކާފިއު ހިންގާ އެއްގަމު އުޅަނދު ދުއްވުމަކީ މަނާކަމެއްގެ ގޮތުގައި ވަނީ ކަނޑައަޅާފައެވެ.

އެޗްއީއޯސީން ބޭއްވި ނޫސްވެރިންގެ ބައްދަލްވުމުގައި ސުޕްރިންޓެންޑެންޓް އޮފް ޕޮލިސް ޢަބްދުﷲ ޝަރީފް ވިދާޅުވީ ކާފިއު ވަގުތު ފެށުމާއެކު ބްރިޖް ބަންދު ކުރާނެ ކަމަށެވެ. އަދި އެވަގުތުތަކުގައި ވެހިކަލް ދުއްވުން މަނާވާނެކަމަށާއި ކުރިއަށްވުރެ ގިނައިން ފުލުހުން މަގުތަކަށް ނެރެ ކާފިއުގެ އަމުރު ތަންފީޒް ކުރަމުން ގެންދާނެކަމަށެވެ. ޝަރީފް ވިދާޅުވީ ރޭގަނޑު ނުވައެއްގެ ފަހުން ބުރިޖްއިން ދަތުރުކުރުމުގެ ހުއްދަދެވޭނީ ހުއްދަ އޮތް ފަރާތްތަކަށް އެކަނި ކަމަށެވެ.

advertisement

މާލޭގައި ކާފިއު ހިންގާ އެއްގަމު އުޅަނދުފަހަރު ދުއްވުން މަނާ ވަގުތުތަކުގައި ހުއްދައާ ނުލާ ބޭރުގައި އުޅޭފަރާތްތައް ހުއްޓުވާ ޖޫރިމާނާކުރަމުން އަންނަކަމަށް ފުލުހުން ވިދާޅުވެއެވެ. އަދި މާސްކް ނާޅާ އުޅޭފަރާތްތައްވެސް ޖޫރިމަނާކުރަމުން އަންނަ ކަމަށް ފުލުހުން ވިދާޅުވެއެވެ. ހުއްދައާ ނުލާ ބޭރުގައި އުޅޭ މީހުންނާއި މާސްކް ނާޅާ އުޅޭ މީހުން ޖޫރިމަނާ ކުރަނީ 1,000 ރުފިޔާއިންނެވެ.

ފުލުހުން ވަނީ މަނާ ވަގުތުތަކުގައި ޑިއުޓީއަށް ދާ ފަރާތްތައް ޑިއުޓީއަށް ދާއިރު އޮފީހުގެ ޔުނިފޯމް ނުވަތަ މުވައްޒަފެއްކަން އަންގައިދޭ ފާސް ހިފައިގެން ދިއުމަށް އިލްތިމާސްކުރައްވާފައެވެ.

މާލޭގައި ކާފިއު ހިންގަން ފަށާފައި މިވަނީ ކޯވިޑްގެ ކޭސްތައް އަނެއްކާވެސް އިތުރުވާން ފަށާފައިވާތީއެވެ. މާލެ ސަރަހައްދުގެ ސުކޫލުތަކާއި ކޮލެޖް، ޔުނިވާސިޓީ އަދި ގުރުއާން ކްލާސްތަކާއި ޓިއުޝަން ސެންޓަރުތަކާއި ޖިމްތަމާއި ކުޅިވަރު ކުޅޭ ތަންތަން އަދި ކަސްރަތު ކުރާ ތަންތަންވެސް މިހާރު ވަނީ ބަންދުކޮށްފައެވެ.