ޓެރަރިޒަމަށް ހިތްވަރުދީ ސޯޝަލް މީޑިއާގައި ވާހަކަދައްކާ ފަރާތްތަކަށް ފިޔަވަޅު އަޅަނީ

ޓެރަރިޒަމަށް ތާއީދުކޮށް، ނުވަތަ އެފަދަ ކަންކަމަށް ހިތްވަރުދީ ސޯޝަލް މީޑިއާގައި ކޮމެންޓުކޮށް ވާހަކަދެއްކުމަކީ ޖިނާއީ ކުށެއްކަމަށާއި، އެފަދަ ފަރާތްތައް ހޯދާ ފިޔަވަޅު އަޅާނެ ކަމުގެ އިންޒާރު ފުލުހުން ދީފި އެވެ.

ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅޭގޮތުން ފުލުހުން ބޭއްވި ނޫސްވެރިންގެ ބައްދަލުވުމުގައި އޭސީޕީ މުހައްމަދު ރިޔާޒް ވިދާޅުވީ އެ ހަމަލާއަށް ފަހު އެކި ފަރާތްތަކުން ސޯޝަލްމީޑިއާ އާއި، ބައެއް އޮންލައިން ނޫސްތަކުގެ ކޮމެންޓް ސެކްޝަންތަކުގައި ވެސް އެކި ގޮތްގޮތަށް ހިޔާލު ފާޅުކުރަމުން އަންނަ ކަމަށެވެ. މީގެތެރޭގައި ޓެރަރިޒަމްގެ މި އަމަލަށް ހިތްވަރުލިބިދޭ ކަހަލަ ވާހަކަ އާއި އެކަން ކުރި މީހުންނަށް ތައުރީފުކޮށް ކޮމެންޓު ކުރުން ފަދަ ކަންކަން ފާހަގަވެފައިވާ ކަމަށެވެ.

advertisement

މިބާވަތުގެ ޓެރަރިޒަމްގެ އަމަލުތަކަށް އެއްވެސް ސިފައެއްގައި ތައުރީފު ކުރުމާއި، ހިތްވަރު ދިނުމާއި، ޝައުގުވެރިކުރުވުމާއި، ނޫނީ ތާއީދުކުރާ ކަމަށް ދެއްކުމަކީ ދިވެހިރާއްޖޭގެ ޓެރަރިޒަމްގެ ގާނޫނުގެ ދަށުން ވެސް މަނާކޮށްފައިވާ، އަދި އެހެން ގާނޫނުތަކުން ވެސް އަދަބު ކަނޑަޅިފައިވާ ޖިނައީ ކުށްތައް ކަން އޭސީޕީ ވަނީ ހަނދާންކޮށްދެއްވައިފަ އެވެ.

އޭސީޕީ ރިޔާޒް ވިދާޅުވީ ކާކުކަން އެނގޭ ގޮތަށް އަދި ކާކު ކަން ނޭނގޭ ގޮތަށް ވެސް ހަދާފައިވާ ސޯޝަލް މީޑިއާގެ ބައެއް އެކައުންޓުތަކުން ޓެރަރިޒަމް އަށް ހިތްވަރު ދޭ ގޮތަށް ކޮށްފަ ހުރި ކޮމެންޓުތަކުގެ މައުލޫމާތު ނަގައި އެއީ ކޮން ބައެއްތޯ ބަލައި، އެ މައުލޫމާތުތައް އާކައިވް ކުރަމުން އަންނަ ކަމަށެވެ.

ނޫސްވެރިންގެ ބައްދަލުވުމުގައި ކޮމިޝަނާ އޮފް ޕޮލިސް، މުހައްމަދު ހަމީދު ވިދާޅުވީ މިފަދަ ހަބަރުތަކާ ގުޅިގެން، އޮންލައިން ނޫސްތަކުގެ ކޮމެންޓް ސެކްޝަނާއި ސޯޝަލް މީޑއިއާ ޕޭޖުތަކުގައި އެކި ފަރާތްތަކުން ކާކުކަން އެނގޭ ގޮތަށާއި ކާކު ކަން ނޭނގޭ ގޮތަށް ވެސް އެކަމަށް ތާއީދުކޮށް ކޮމެންޓް ކުރާކަން ސާފުކޮށް ފެންނަން އޮތް ކަމަށެވެ.

ސީޕީ ހަމީދު ވިދާޅުވީ ޓެރަރިޒަމަށް ހިތްވަރު ދިނުމުގެ އިތުރުން މީހުންނަށް އިންޒާރުދީ ހަދާ މީހުންގެ ކަންކަން މޮނީޓާކުރަމުން އަންނަ ކަމަށެވެ. ސީޕީ ވަނީ އެ ކަމުގައި މީޑިއާތަކުގެ އެހީތެރިކަމަށް ވެސް އެދިވަޑައިގެންފަ އެވެ.

ޓެރަރިޒަމަށް ހިތްވަރުދިނުމުގެ އަމަލެއް ކޮށްފި މީހެއްގެ އަދަބަކީ 10 އަހަރާއި 15 އަހަރާ ދެމެދުގެ މުއްދަތަކަށް ޖަލަށްލުމެވެ.