އޭޑީކޭ ހޮސްޕިޓަލުގައި އެޑްމިޓްކޮށްފައި ތިބި މީހުންނަށް ޒިޔާރަތްކުރުން މަނާ

ކޮވިޑް19ގެ ކޭސްތައް އިންތިހާއަށް މަތިވެފައިވާތީ، ރައްކާތެރިކަމުގެ ފިޔަވަޅެއްގެ ގޮތުން އޭޑީކޭ ހޮސްޕިޓަލުގައި އެޑްމިޓްކޮށްފައި ތިބި މީހުންނަށް ޒިޔާރަތްކުރުން ހުއްޓާލައިފި އެވެ.

އޭޑީކޭ އިން ނެރުނު ބަޔާނެއްގައި ބުނެފައި ވަނީ މިހާރު ބަލި ފެތުރެމުންދާ މިންވަރަށް ބަލައި، ރައްކާތެރިކަމުގެ ފިޔަވަޅުތައް އަޅަމުން އަންނަ ކަމަށެވެ. އެގޮތުން ކޮވިޑް19ގެ ހާލަތު އިތުރަށް ގޯސްވަމުން ދިއުމާ ގުޅިގެން، މިމަހުގެ 9 ވަނަ ދުވަހުން ފެށިގެން އެ ހޮސްޕިޓަލުގައި އެޑްމިޓްކޮށް ފަރުވާދޭ ބަލިމީހުން ކައިރިއަށް ޒިޔާރަތްކުރުން ހުއްޓާލާފައިވާ ކަމަށެވެ.

advertisement

އޭޑީކޭ އިން ބުނީ އެޑްމިޓްކޮށްގެން ފަރުވާދޭ ބަލިމީހުންގެ އެހީތެރިންގެ ގޮތުގައި މަޑުކުރެވޭނީ އެންމެ މީހަކަށް ކަމަށާއި އެމީހަކީ ކޮވިޑްގެ އެއްވެސް އަލާމާތެއް ހުރި މީހަކަށް ވެގެން ނުވާނެ ކަމަށެވެ.

ހަމައެއާއެކު އެންމެންގެ ރައްކާތެރިކަމަށްޓަކައި، ބަލީމިހުންގެ ކައިރީ ތިބުމަށް ހޮސްޕިޓަލުން ހުއްދަ ދީފައިވާ ފަރާތްތައް ފިޔަވައި އެހެން މީހުން ހޮސްޕިޓަލަށް ނުދިޔުމަށް ވެސް ވަނީ އިލްތިމާސްކޮށްފަ އެވެ.