ކުޑަކުދިންގެ ހައްޤުތައް ކަށަވަރުކުރުމަކީ ޤާނޫނުން އެކަނި ކުރެވޭނެ ކަމެއްނޫން – ރައީސް

ކުޑަކުދިންގެ ޙައްޤުތަކާ ގުޅިފައިވާ މައްސަލަތައް ޙައްލުކުރުމަކީ، ޤާނޫނަކުން އެކަނި ކުރެވޭ ވަރަށް ވުރެ، މާފުޅާ ދާއިރާއެއްގައި އެކަމަށް މަސައްކަތް ކުރަންޖެހޭކަމެއްކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ދިވެހިރާއްޖޭގެ ކުޑަކުދިންގެ ދުވަހުގެ މުނާސަބަތުގައި ފޮނުއްވި ތަހުނިޔާގެ ޚިޠާބުގައެވެ.

ރައީސުލްޖުމްހޫރިއްޔާގެ ޚިޠާބުގައި ކުޑަކުދިންގެ ދުވަހެއް ފާހަގަކުރާއިރު، އެންމެ ބޮޑު ސަމާލުކަމެއް ދޭންޖެހިފައިވަނީ، ލޯތްބާއި އޯގާތެރިކަމާއެކު ކުޑަކުދިން ބަލައި ބޮޑުކުރުމަށް ވިދާޅުވިއެވެ. ކޮންމެ ކުޑަކުއްޖަކާ މެދުވެސް ދެކެންވީ، ތިމާގެ އަމިއްލަ ދަރިއެއް ފަދައިންކަމަށާއި، އެހެން މީހުންނަށް އިޙްތިރާމްކުރުމާއި ކިޔަމަންތެރިވުމުގެ ސިފަ، އެކުދިންގެ ކިބައިން ފެންނާނީ، އެ ކުދިންނަށް ލޯތްބާއި އޯގާތެރިކަން ބެހެއްޓި މިންވަރަކުންކަމަށް ފާހަގަކުރެއްވިއެވެ. މުޖުތަމަޢަށް ބޭނުންތެރި، އަދި މުޖުތަމަޢުގައި ބަސްވިކޭ ބަޔަކަށް އެ ކުދިން ވާނީ، އެހެން މީހުންނާ ކުރާ މުޢާމަލާތުތަކުގައިވެސް، އަދި ގޭތެރޭގަޔާއި ބޭރުގައި އުޅޭ އުޅުމުގައިވެސް، އަޅުގަނޑުމެން އެ ކުދިންނަށް ރީތި ނަމޫނާ ދެއްކި މިންވަރަކުންކަމަށްވެސް ރައީސް ވިދާޅުވިއެވެ.

advertisement

ރައީސް ވަނީ ކުޑަކުދިންގެ ޙައްޤުތަކާ ގުޅިފައިވާ މައްސަލަތައް ޙައްލުކުރުމަކީ، ޤާނޫނަކުން އެކަނި ކުރެވޭ ވަރަށް ވުރެ، މާފުޅާ ދާއިރާއެއްގައި ކުރަންޖެހިފައިވާ މަސައްކަތެއްކަން ފާހަގަކުރައްވާ ދައުލަތުގެ ހުރިހާ އިދާރާތަކުގެ އެއްބާރުލުމާއި ބައިވެރިވުން ބޭނުންވާކަމަށް ވިދާޅުވެފައެވެ. ކުޑަކުދިންގެ ޙައްޤުތައް ރައްކާތެރިކޮށްދީ، އެ ކުދިންނަށް އިޖުތިމާޢީ ރައްކާތެރިކަމާއި ޢަދުލު އިންޞާފު ހޯދައިދިނުމަށް، މިހާރުވެސް މިދަނީ ގިނަ މަސައްކަތްތަކެއް ކުރަމުންކަން ފާހަގަކުރައްވައި ރައީސް ވިދާޅުވީ، އޭގެ ތެރެއިންވެސް އެންމެ މުހިންމު އެއް މަސައްކަތަކީ، 28 އަހަރުގެ ދިގު އިންތިޒާރަކަށް ފަހު އެކުލަވައިލި، ކުޑަކުދިންގެ ޙައްޤުތައް ރައްކާތެރިކުރުމުގެ ޤާނޫނަށް، މިދިޔަ އަހަރުގެ ކުރީކޮޅު ޢަމަލުކުރަން ފެށުންކަމަށެވެ. ނަމަވެސް، ކުޑަކުދިންގެ ޙައްޤުތަކާ ގުޅިފައިވާ މައްސަލަތައް ޙައްލުކުރުމަކީ، ޤާނޫނަކުން އެކަނި ކުރެވޭ ވަރަށް ވުރެ، މާފުޅާ ދާއިރާއެއްގައި އެކަމަށް މަސައްކަތް ކުރަންޖެހޭ ކަމެއްކަން ރައީސް ވިދާޅުވިއެވެ.

އިސްލާމްދީނުގެ ޞައްޙަ ޢަޤީދާގެ މަތީގައި، ތުއްތު ކުދިން ތަރުބިއްޔަތު ކުރުމަށް ސަމާލުކަން ދިނުމަށް ރައީސުލްޖުމްހޫރިއްޔާ ވަނީ އެދިވަޑައިގެންފައެވެ.