ރަށްރަށުގައި ހުރި ފަތުރުވެރިންނަށް ޚިދުމަތްދޭ ތަންތަން އިންސްޕެކްޓްކުރަނީ

މީހުން ދިރިއުޅޭ ރަށްރަށުގައި ހުރި ފަތުރުވެރިންނަށް ޙިދުމަތްދޭ ތަންތަނަށް އާމާޒުކޮށްގެން ޚާއްސަ އިންސްޕެކްޝަނެއް ފެށުމަށް ޓޫރިޒަމް މިނިސްޓްރީން ނިންމައިފިއެވެ. ޓޫރިޒަމް މިނިސްޓްރީން ވިދާޅުވީ، މިއީ މީހުން ދިރިއުޅޭ ރަށްރަށުގައި ހުރި ފަތުރުވެރިކަމުގެ ހިދުމަތްދޭ ތަންތަން ކޯވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތަކާއި އަދި ގައިޑްލައިންތަކަށް އަމަލުކުރަމުންދާ މިންވަރު ބެލުމަށް ކުރިއަށްގެންދާ އިންސްޕެކްޝަނެއްކަމަށެވެ.

ޓޫރިޒަމް މިނިސްޓްރީން މި އިންސްޕެކްޝަން ފެށުމަށް ހަމަޖެހިފައިވަނީ މިމަހުގެ 11 ވަނަ ދުވަހުއެވެ. ރަށްރަށުގެ ފަތުރުވެރިންނަށް ޚިދުމަތްދޭ ތަންތަން އިންސްޕެކްޓްކުރަން ޓޫރިޒަމް މިނިސްޓްރީން ނިންމާފައިމިވަނީ މާލެއާއި ރާއްޖޭގެ މީހުންދިރިއުޅޭ ބައެއް ރަށްރަށުން ކޯވިޑް-19 އަށް، ކޮންމެ ދުވަހަކު ޕޮޒިޓިވް ވަމުންދާ މީހުންގެ އަދަދު އިތުރުވަމުން އަންނާތީއެވެ.

advertisement

މި އިންސްޕެކްޝަންގެ ތެރެއިން ފަތުރުވެރިކަމުގެ ހިދުމަތްދޭ ތަންތަނުގައި މުވައްޒަފުންނާއި އަދި ފަތުރުވެރިންގެ ސަލާމަތާއި ރައްކާތެރިކަމަށްޓަކައި އަޅާފައިވާ ފިޔަވަޅުތަކާއި އަދި ހިދުމަތްދިނުމުގައި އަމަލުކުރަންޖެހޭ ގައިޑްލައިންތަކަށް ފަތުރުވެރިކަމުގެ ހިދުމަތްދޭ ތަންތަނުން އަމަލުކުރަމުން އަންނަކަން ބަލާ މިނިސްޓްރީން އެކަންކަން ކަށަވަރުކުރުކުރާނެއެވެ. މިގޮތުން، ރެންޑަމް އުސޫލުން ކޮންމެ ދުވަހަކުވެސް ގެސްޓް ހައުސް އަދި ސިޓީ ހޮޓެލްތައް އިންސްޕެކްޓްކުރަމުން ގެންދާނެއެވެ.

މިއިންސްޕެކްޝަންތައް މާލެ ސަރަހައްދުގައި ކުރިއަށް ގެންދާނީ މިނިސްޓްރީ އޮފް ޓޫރިޒަމްއިންނެވެ. އަދި ރާއްޖޭގެ އެހެން ސަރަހައްދުތަކުގައި އިންސްޕެކްޝަން ކުރިއަށްގެންދާނީ ރަށްރަށުގެ ރަށުކައުންސިލާއި ސިޓީކައުންސިލް އަދި ޓާސްކްފޯސްތަކާއި ގުޅިގެންކަމަށް ޓޫރިޒަމް މިނިސްޓްރީން ވިދާޅުވެއެވެ.