ފިޔަވަޅުތަކާއި ހިލާފުވެގެން އިއްޔެ 213 މީހަކު ޖޫރިމަނާކުރި

ކޮވިޑް-19 އިން ރައްކާތެރިވުމަށްޓަކައި އަޅާފައިވާ ފިޔަވަޅުތަކާއި ހިލާފުވި 213 މީހަކު ޖޫރިމަނާ ކޮށްފި އެވެ.

ކޮވިޑް ޖެހޭ މީހުންގެ އަދަދު އިތުރުވަމުންދާތީ މާލެ ސަރަހައްދުގައި ފިޔަވަޅުތައް ވަނީ ހަރުކަށި ކޮށްފައެވެ. އެޗްއީއޯސީން ބުނީ މިދިޔަ ސައުވީސް ގަޑިއިރުގެ ތެރޭގައި އުސޫލުތަކާއި ހިލާފުވި 213 މީހަކު ޖޫރިމަނާ ކޮށްފައިވާ ކަމަށެވެ. އެގޮތުން 136 މީހަކު ޖޫރިމަނާ ކުރީ މާސްކު ނާޅާ ބޭރުގައި އުޅެގެނެވެ.

advertisement

މީގެ އިތުރުން ކާފިއު ވަގުތު ބޭރުގައި އުޅުނު 66 މީހަކު ޖޫރިމަނާ ކޮށްފައިވެއެވެ. މާލެ ސަރަހައްދުގައި ކާފިއު ހިންގަނީ މިއަދުން ފެށިގެން 1 ހަފްތާގެ މުއްދަތައް ހަވީރު 4 އިން ރޭގަނޑު 4 ކަށެވެ. މި ހަތްގަޑިއިރު ޒަރޫރީ ބޭނުމަށް ހުއްދަ ހޯދައިގެން ނޫނީ ބޭރަށް ނިކުމެ އުޅުމަކީ މަނާ ކަމެކެވެ.

ކާފިއު ވަގުތު ވެހިކަލް ދުއްވައިގެން 11 މީހަކު ޖޫރިމަނާ ކޮށްފައިވެއެވެ. އިއްޔެ 213 މީހުން ޖޫރިމަނާކޮށްފައިވާއިރު އޭގެ ކުރީދުވަހު 267 މީހަކު ވަނީ ޖޫރިމަނާ ކޮށްފައެވެ. ޖޫރިމަނާ ކުރަނީ 1،000 ރުފިޔާއިންނެވެ.