ތަފާތުކުރުމެއްނެތި، ދިވެހި ބަހުގެ ދަރަޖަތައް އެންމެންނަށް އެއްވަރަށް ބޭނުންކުރުމަށް އެމްވީ+ އިން ނިންމުން

ތަފާތުކުރުމެއްނެތި، އާދައިގެ ބަހާއި، މާތްބަހާއި އަދި އެންމެމާތް ބަސް މީހެއްގެ ހައިބަތާއި ނަސަބަށް ބެލުމެއްނެތި، އެންމެނަށް އެއްވަރަށް ބޭނުންކުރުމަށް އެމްވީ+ އިން ނިންމައިފިއެވެ.

advertisement

ބަހުގައި އެކި ފަންތީގެ މީހުންނަށް ބޭނުންކުރުމަށް އެކިއެކި ދަރަޖަ ހަދައި، ގިންތިކޮށްގެން ބޭނުންކުރުމަކީ ބަސް ބޭނުންކޮށްގެން އަޅުވަތިކުރުމުގެ ސަޤާފާތުގެ ބައެކެވެ. ނިކަމެތިން މަރުވާއިރު އިއްޒަތްތެރީން އަވަހާރަވުން މިފަދަ ޒަމާނެއްގައި ބަލައިގަތުން ކިތައްމެހާވެސް ދައްޗެވެ. އަދާކުރާ މަޤާމަކުން، ނިސްބަތްވާ އާއިލާއަކުން، ވަކި ބައެއް އެއީ އާދަޔާ ހިލާފަށް މާތްބައެއްގެ ގޮތުގައި ދެކި، އެހެން މީހުން ދަށްކޮށްލުމުގެ ނިޔަތުގައި ދިވެހިބަސް ބޭނުންކުރުމަކީ މިޒަމާނުގައި ބަލައިގަނެވޭނެކަމެއް ނޫނެވެ.

ކޮންމެ ދިވެއްސަކުވެސް އެދެނީ އެމީހަކަށް ނުވަތަ އެމީހެއްގެ މައިބަފައިން ނުވަތަ އާއިލާއަށް ދިވެހި ބަހުގެ ތެރެއިން އިހްތިރާމް ލިބުމެވެ. ވަޒީރަކަށް ވީތީ ދަރަޖަ މަތިވެފައި، މަސްވެރިންނާއި ދަނޑުވެރިންނަށް ވީތީ ބަހުގެ ތެރެއިން ނިކަމެތި ނުކޮށް ލުމަށެވެ.

އިސްތިއުމާރީ އަދި އަޅުވެތިކަމުގެ ޒަމާނުގައި ބޭނުންކުރެވުނު ބަހުގެ ބައެއް ހަމަތަކާއި އުސޫލަތަކަކީ، މިއަދުގެ ތަހުޒީބު މުޖުތަމައުއަކަށް ފެތޭނެ ކަންކަމެއް ނޫނެވެ. ދިވެހި ބަސް މިފަދަ ކަންކަމުގެތެރެއިން ނެރެ، އިސްލާހީ ބަދަލުތަކެއް ގެންނަން ޖެހޭކަމީ ޝައްކެއްވެސް އޮތްކަމެއް ނޫނެވެ.

މިބަދަތަކާއެކުވެސް، ދީނީ ގޮތުން އެކި ފަރާތްތަކާއި ކަންކަމަށް، ދިވެހި ބަހުގެތެރެއިން ދޭންޖެހޭ އިހްތިރާމް މިހާރެކޭ އެއްގޮތަށް ދެމުން ގެންދާނެއެވެ.