ކުޑަކުދިން “ގްރޫމް” ކުރާ ހަރުފަތްތައް، ބެލެނިވެރިން ސަމާލުވާންޖެހޭ!

މިއަދުގެ މުޖްތަމައުގައި ޖިންސީ ގޯނާގެ ޝިކާރައަކަށްވާ ކުޑަކުދިންގެ އަދަދު އިތުރެވެ. ކުއްޖާގެ އެންމެ ގާތުގައިވާ މީހުންނާއި އަދި މުޖްތަމައުގެ ތެރެއިންވެސް މިފަދަ ގޯނާތަކާއި ތުއްތު ކުދިން ކުރިމަތިލާންޖެހެއެވެ. މިފަދަ ކަންކަން ކުރާމީހުން މިކަންކަން ކުރަނީ ދުރާލާ ވަރަށް ބޮޑަށް ވިސްނައިގެން ކުއްޖާއަށް އެކަން މާބޮޑަށް އިޙްސާސް ނުވާނެފަދަ ގޮތަކަށެވެ.

ފޮރެންސިކް ސައިކިއޭޓްރިސްޓް ޑރ. މިޝެލް ވެލްނާ ވިދާޅުވަނީ ކުޑަކުދިންނަށް ޖިންސީ ގޯނާ ކުރާ މީހުން އެކަން ކުރުމުގެ ކުރިން ތަފާތު 6 ހަރުފަތެއް ގިރާކުރާކަމަށެވެ. މިކަންކަން ކުރަނީ ކުއްޖާއަށް އޭނާއަކީ ޚާއްސަ މީހެއްކަން އަންގައިދީ އެކުދިންނަށް ލޯތްބާއި އަޅާލުންދޭކަން ދެއްކުމަށްޓަކައެވެ.

advertisement

ފުރަތަމަ ހަރުފަތް: ކުއްޖާއަށް ޓާގެޓްކުރުން

މިފަދަ މީހުން ކުއްޖާގެ ފިޒިކަލް އަދި އިމޯޝަނަލް ހާލަތު އެންމެ ފުރަތަމަ ދެނެގަންނާނެއެވެ. ކުއްޖާގެ ބެލެނިވެރިޔާއާއި ދުރުގައި ގިނަވަގުތު ހެދަކުރާ ކުދިންނަށް ޓާކެޓްކުރަން މިފަދަ މީހުންނަށް ފަސޭހަވާނެއެވެ.

ދެވަނަ ހަރުފަތް: ކުއްޖާގެ އިތުބާރު ހޯދުން

ކުޑަކުދިންނާއި ޖިންސީގޮތުން ގޯނާކުރާ މީހުން އެކަން ކުރުމުގެ ކުރިން ކުއްޖާގެ އިތުބާރާއި ޔަޤީންކަން އެމީހަކާއި ދޭތެރޭ ހޯދާނެއެވެ. މީގެތެރޭގައި ކުއްޖާ ބޭނުންވާ ކަންކަމާއި ކުރާހިތްވާ ކަންކަން ހޯދާ ބަލާނެއެވެ.

ތިންވަނަ ހަރުފަތް: ކުއްޖާ ބޭނުންވާ ކޮންމެވެސް ކަމެއް ކޮށްދިނުން

ކުއްޖާ ބޭނުންވާ ކޮންމެވެސް ކަމެއް ކޮށްދިނުމުގެ ސަބަބުން އެމީހަކު ބޮޑަށް ފާހަގަވެގެންދާނެއެވެ. އަދި އެއީ ކުއްޖާގެ ދިރިއުޅުމުގައި މުހިންމު މީހެއްކަމަށް ބެލެވޭނެއެވެ. ކުއްޖާ ބޭނުންވާ ކަމެއް ކޮށްދިނުމުގެ ތެރޭގައި ހަދިޔާ ދިނުމާއި، ކުއްޖާއަށް އެޓެންޝަން ދިނުން ހިމެނެއެވެ.

ހަތަރުވަނަ މަރުހަލާ: ކުއްޖާއާއިއެކު އެކަހެރިކޮށް ވަގުތު ހޭދަކުރުން

ޖިންސީގޮތުން ކުޑަކުއްޖަކަށް ގޯނާކުރަން ބޭނުންވާ މީހާ ކުއްޖާއަށް ގާތް ގުޅުމެއް އުފައްދައި ކުއްޖާއާއިއެކު އެކަހެރިކޮށް ވަގުތު ހޭދަކުރާނެއެވެ. އެކަހެރިކޮށް ހޭދަކުރާ ވަގުތުގައި ކުއްޖާއާއި ޚާއްސަ ގުޅުމެއް އުފެއްދުމަށް މަސައްކަތް ކުރާނެއެވެ. އެކަހެރިކޮށް ހޭދަކުރާ ވަގުތަކީ ބޭބީސިޓްކުރާ ވަގުތު، ކިޔަވައިދިނުމަށް ނުވަތަ ކޯޗްކޮށްދިނުން ފަދަ ކަމެއް ކުރުމަށްކަމަށްބުނެ ހޭދަކުރާ ވަގުތަކަށްވެސް ވެދާނެއެވެ.

ފަސްވަނަ މަރުހަލާ: ޖިންސީ ގޯނާކުރަން މަގުފަހިވާ ކަންކަންކުރުން

ޖިންސީ ގޯނާއަށް މަގުފަހިވާ ކަންކަންކަމަށްވާ އެފަދަ ވާހަކަތައް ދެއްކުމާއި، ފޮޓޯއާއި މަންޒަރު ކުޑަކުދިންނަށް އެފަދަ މީހުން ދައްކާނެއެވެ. އަދި ފަތަން ދިއުންފަދަ ހަށިގަނޑު ބޮޑަށް ފާޅުކުރެވޭ ކަންކަން ކުރަން ހިތްވަރުދޭނެއެވެ.

ހަވަނަ މަރުހަލާ: ކުއްޖާ އޭނާގެ ކޮންޓްރޯލްގެ ދަށުގައި ބެހެއްޓުން

ޖިންސީ ގޯނާގެ އަމަލަކީ ކުއްޖާގެ ހުރި ކޮންމެވެސް ކަމެއްގެ ސަބަބުންކަމަށްބުނެ ކުއްޖާ ކުއްވެރިކުރަން މަސައްކަތް ކުރާނެއެވެ. އަދި އެހެން މީހަކުކައިރީގައި ބުނެދާނެތީ ކުއްޖާއަށް ބިރުދައްކައި އޭނާގެ ބާރުގެ ދަށުގައި ކުއްޖާ ބެހެއްޓުމަށް މިފަދަ މީހުން މަސައްކަތްކުރާނެއެވެ.

ޖިންސީ ގޯނާގެ މައްސަލަތަކަކީ މިއަދު އަޅުގަނޑުމެންގެ މުޖްތަމައުގައިވެސް ހިނގާ ހިތާމަވެރި ކަންކަމެވެ. މިފަދަ ކަންކަން މަދުކުރުމަށް ބެލެނިވެރިން މިހާރަށްވުރެ ބޮޑަށް ސަމާލުކަންދޭންޖެހެއެވެ. އޭގެތެރޭގައި ކުއްޖާއާއި ކޮންމެ ދުވަހަކުވެސް ބައްދަލުވަނީ ކޮންކޮން ބައެއްކަމާއި އެމީހުންގެ އަމަލުތައް ކުއްޖާއާއި ދޭތެރޭގައި ހުންނަގޮތް ގާތުން ބެލުމަކީ މުހިންމު ކަމެކެވެ. އެންމެ ހީނުކުރާ މީހުންގެ ފުށުންވެސް ކުއްޖާއަށް މިފަދަ އަނިޔާއެއް ލިބިދާނެއެވެ.