ޓެރަރިޒަމްގެ ޤާނޫނަށް އަނެއްކާވެސް އިސްލާހު ގެންނަނީ

ޓެރަރިޒަމްގެ ތުހުމަތުގައި ހައްޔަރު ކުރެވޭ މީހުން 48 ގަޑިއިރު ވަންދެން ކޯޓު އަމުރާ ނުލާ ބަންދުގައި ބެހެއްޓޭ ގޮތަށް ހެދުމަށް ޓެރަރިޒަމް ގާނޫނަށް އިސްލާހު ގެނައުމަށް، އެޓޭނީ ޖެނެރަލް އޮފީހުން ބިލެއް ފަރުމާކޮށް ރައީސް އޮފީހަށް ފޮނުވާފި އެވެ.

އޭޖީ އޮފީހުން ނެރުނު ނޫސް ބަޔާނުގައި ބުނީ، ސަރުކާރުގެ ފަރާތުން މަޖިލީހަށް ހުށަހެޅުމަށް އެ ގާނުނަށް އިސްލާހު ގެނައުމުގެ ބިލު ރައީސް އޮފީހަށް މިހާރު ފޮނުވާފައިވާ ކަމަށެވެ. މައިގަނޑު ބޮޑު ބަދަލަކީ، މިހާރު 24 ގަޑިއިރު ކޯޓު އަމުރާ ނުލާ ހައްޔަރު ކުރެވޭ ވަގުތު 48 ގަޑި އިރަށް ދިގު ދެންމުމާއެކެ، އެއާ ބެހޭ ބައެއް ކަންކަން އިތުރަށް ސާފުކޮށްދިނުމެވެ. އަދި އެމީހަކު ހުރި ތަނެއްވެސް ކޯޓު އަމުރަކާ ނުލާ ފާސް ކުރުމުގެ ބާރު ފުލުހުންނަށް ދިނުމަށް ބިލުގައި ހިމަނާފައިވާނެ ކަމަށް އޭޖީ އޮފީހުން ބުންޏެވެ.

advertisement

ހަނގުރާމައަށް ދިޔުމަށްފަހު އަނބުރާ ރާއްޖެއަށް އަންނަ ފަރާތްތަކާމެދު އަމަލުކުރާ އިޖުރާއަތުތަކަށް ބަދަލު ގެނައުމަށްވެސް ބިލުގައި ހިމަނާފައިވާނެ ކަމަށް އޭޖީ އޮފީހުން ބުންޏެވެ. އެގޮތުން، އެފަދަ މީހުންގެ ތެރެއިން ޓެރަރިޒަމްގެ އަމަލުތައް ކުރުމުގައި ބައިވެރިވެފައިވާ ކަމަށް ބެލެވޭ ކުށުގެ ތުހުމަތުގައިވާ ފަރާތްތަކުގެ ތަހްގީގު ވަގުތުން ވަގުތަށްވެސް ކުރިއަށްގެންދެވޭނެ ގޮތް ހަމަޖެއްސުމާއި، އެނޫން ފަރާތްތަކަކީ އެފަދަ އަމަލުތަކުގައި ސީދާ ބައިވެރިވި ފަރާތްތަކެއް ކަމަށް ނުވިނަމަވެސް، އެއީ، ޓެރަރިޒަމްގެ އަމަލުތަކަށް ހުށަހެޅިފައިވާ ނުވަތަ ހުށަހެޅުމުގެ ފުރުސަތު އޮތް ބައެއް ކަމުގައި ބަލައި، އެފަދަ އަމަލުތަކުން މުޖުތަމައު ރައްކާތެރިކުރުމަށްޓަކައި އަޅަންޖެހޭ ފިޔަވަޅުތައް އެޅުމަށާއި، އެފަދަ ފިޔަވަޅުތައް އެޅުމާއެކުގައިވެސް އެފަދަ ފަރާތްތަކަށް ދޭންޖެހޭ ރީހެބިލިޓޭޝަންގެ ފަރުވާ ދިނުމަށް މަގުފަހިކުރެވޭނެ ގޮތަށް ގާނޫނު އިސްލާހު ކުރުމަށް ހިމަނާފައިވާނެ ކަމަށް ބަޔާނުގައިވެ އެވެ.

އެ ގާނޫނުގެ ދަށުން ރިހެބިލިޓޝަން ފަރުވާ ދެނީ، މޮނިޓާކޮށް ކޮންޓްރޯލްކުރުމުގެ އަމުރެއް ތަންފީޒުކުރަމުންދާ ފަރާތްތަކަށާއި ޓެރަރިޒަމްގެ ކުށުގެ ތުހުމަތުގައި ތަހްގީގު މަރުހަލާގައި ބަންދުގައިވާ ފަރާތްތަކަށާއި، ޓެރަރިޒަމްގެ ކުށް ސާބިތުވެ ހުކުމް ތަންފީޒުކުރަމުންދާ ފަރާތްތަކަށާއި އަނބުރާ އަންނަ ހަނގުރާމަވެރިންނާއި އެފަރާތްތަކުގެ އާއިލާގެ މެންބަރުންނަށެވެ.

ރީހެބިލިޓޭޝަން ފަރުވާ ދެވޭ މީހުންނަކީ، ގާނޫނީ ނިޒާމުގެ ކުރިމައްޗަށް އެމީހުން ހުށަހެޅޭ ހިނދުން ފެށިގެން، މުޖުތަމައުއަށް އަނބުރާ ރުޖޫއަވަންދެން މެދުކެނޑުމެއް ނެތި ދެވޭ ފަރުވާއެއް ކަމުގައި ގާނޫނުގައި ކަނޑައެޅިގެން ބަޔާންކޮށްފައިވާނެ ކަމަށްވެސް އޭޖީ އޮފީހުގެ ބަޔާނުގައިވެ އެވެ.

އެންމެ ފަހުން މަޖިލިސް ޗުއްޓީގައި ވަނިކޮށް، ދައުރުން ބޭރުން ޖަލްސާ ބާއްވައިގެން ޓެރަރިޒަމްގެ ޤާނޫނު އިސްލާހު ކުރީ 2019 ވަނަ އަހަރުގެ ފަހުކޮޅެވެ. އެފަހަރުން ފުލުހުނަށް ބޮޑެތި ބާރުތަކެއް ދިނުމަށް ގާނޫނަށް އިސްލާހު ގެނެސްފައިވެ އެވެ. އެގޮތުން 24 ގަޑިއިރު ވަންދެން ކޯޓު އަމުރަކާ ނުލާ ހައްޔަރު ކުރެވޭ ގޮތަށް ގާނުނަށް އެފަހަރު އިސްލާހު ގެނައެވެ. އަދި ބައެއް ހައްގުތައް ހަނިކޮށް، ވަރަށް ފާޅުކަން ބޮޑު ގޮތެއްގައި ޓެރަރިމްވެސް މާނަކޮށްފައިވެ އެވެ.