އަހަރުގެ ފުރަތަމަ ކުއަރޓަރުގައި ގްރީން ފަންޑަށް 214 މިލިއަން ރުފިޔާ

މިއަހަރުގެ ފުރަތަމަ ކުއާޓަރުގެ ތެރޭގައި ގްރީން ފަންޑަށް 214 މިލިއަން ރުފިޔާ ލިބިއްޖެއެވެ.

ފިނޭންސް މިނިސްޓްރީން އާއްމުކޮށްފައިވާ ތަފާސް ހިސާބުތައް ދައްކާގޮތުން މިއަހަރުގެ ފުރަތަމަ ކުއާޓަރުގެތެރޭގައި ގްރީން ފަންޑުން 31 މިލިއަން ރުފިޔާ ޙަރަދުކޮށްފައިވެއެވެ.

advertisement

މިއަހަރުގެ ފުރަތަމަ ކުއާޓަރުގައި ގްރީން ފަންޑުން 30 މަޝްރޫޢެއް ކުރިއަށްގެންގޮސްފައިވެއެވެ. އަދި މި މަޝްރޫޢުތަކަށް ގްރީން ފަންޑުން 214 މިލިއަން ރުފިޔާ ޙަރަދުކޮށްފައިވެއެވެ. މިގޮތުން ކުރިއަށް ގެންގޮސްފައިވާ މަޝްރޫޢުތަކުގެ ތެރޭގައި ފެނާއި ނަރުދަމާގެ މަސައްކަތްތަކާއި ގޮނޑުދޮށް ޙިމާޔަތްކުރުމުގެ މަސައްކަތްތަކުގެ އިތުރުން ކުނި މެނޭޖްކުރުމުގެ މަޝްރޫއުތައް ހިމެނެއެވެ.
މިއަހަރުގެ ފުރަތަމަ ކުއާޓަރުގައި އެންމެ ބޮޑު ޚަރަދެއް ހިނގާފައިވަނީ ޕްރޮވިޝަން އޮފް ވޯޓަރ ސަޕްލައި، ސެނިޓަރީ އެންޑް ވޭސްޓް މެނޭޖްމަންޓް މަޝްރޫޢަށެވެ. މި މަޝްރޫއަށް ގްރީން ފަންޑުން ވަނީ 7.8 މިލިއަން ރުފިޔާ ޙަރަދުކޮށްފައެވެ. ދެން އެންމެ ބޮޑު ހޭދައެއް ކޮށްފައިވާ ގްރޭޓަރ މާލެ އެންވަރޔަރަމެންޓަލް އިންޕްރޫވްމަންޓް އެންޑް ވޭސްޓް މެނޭޖްމަންޓް މަޝްރޫޢުއަށެވެ. މި މަޝްރޫޢަށް 3.6 މިލިއަން ރުފިޔާ ވަނީ ހޭދަކޮށްފައެވެ.

ފުރަތަމަ ކުއާޓަރު ނިމުނުއިރު ގްރީން ފަންޑުގައި ހުރީ 921.8 މިލިއަން ރުފިޔާއެވެ. ގްރީން ފަންޑަކީ ތިމާވެއްޓާ ގުޅުންހުރި މަސައްކަތްތައް ކުރުމަށް މާލީ އެހީ ހޯދުމަށް، ރާއްޖެ އަންނަ ފަތުރުވެރިންގެ އަތުން ނަގަމުން އަންނަ ޓެކްސްއެކެވެ.

ގްރީން ޓެކްސްގެ ގޮތުގައި ނަގަނީ ރިޒޯޓުތަކާއި ސަފާރީ އާއި ހޮޓާތަކުގައި ޗުއްޓީ ހޭދަކުރާ ކޮންމެ މީހެއްގެ އަތުން 6 ޑޮލަރެވެ. އަދި ގެސްޓް ހައުސްތަކުގައި ޗުއްޓީ ހޭދަކުރާ މީހުންގެ އަތުން 3 ޑޮލަރެވެ. ގްރީން ޓެކްސް ނަގަން ފަށާފައިވަނީ 2016 ވަނަ އަހަރުގެ ތެރޭގައެވެ.