ފްލައިން ސުކޫލާމެދު އަޅާނެ ފިޔަވަޅުތައް ބަންޑާރަނައިބު ފޮނުވައިފި

އޭޝިއަން އެކަޑަމީ އޮފް އެއިރޯނޯޓިކްސްގެ ދަށުން އައްޑޫ ސިޓީގައި ހިންގާ ފްލައިން ސުކޫލާމެދު، އެޅިދާނެ ޤާނޫނީ ފިޔަވަޅުތައް، މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނަށާއި މިނިސްޓްރީ އޮފް ހަޔަރ އެޑިއުކޭޝަނަށް، ބަންޑާރަ ނާއިބު ފޮނުއްވައިފިއެވެ.

ބަންޑާރަ ނާއިބު އިބްރާހީމް ރިފްޢަތު ވިދާޅުވީ، އައްޑޫގައި ހިންގާ ފްލައިން ސްކޫލުގެ މައްސަލާގައި ޓްރާންސްޕޯޓް އެންޑް ސިވިލް އޭވިއޭޝަން މިނިސްޓްރީން މެއި 30ގައި ލަފަޔަކަށް އެދުމުން، އޭގެ ޖަވާބު މިހާރު ފޮނުވާފައިވާކަމަށެވެ. ބަންޑާރަ ނާއިބު ވިދާޅުވީ، މޯލްޑިވްސް ސިވިލް އޭވިއޭޝަން އޮތޯރިޓިގެ ޤާނޫނާއި މަތީ ތަޢުލީމާބެހޭ ޤާނޫނުގެ ދަށުން މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނާއި މިނިސްޓްރީ އޮފް ހަޔަރ އެޑިއުކޭޝަނުން އެޅިދާނެ ފިޔަވަޅުތައް ފާހަގަކޮށްފައިވާނެކަމަށެވެ.

advertisement

އައްޑޫ ފްލައިން ސްކޫލުގެ މައްސަލާގައި މިނިސްޓަރ ނަހުލާއާއި، ހަޔަރ އެޑިއުކޭޝަން މިނިސްޓަރ ޑރ.އިބްރާހީމް ހަސަން ވަނީ މަޖިލީހުގެ ކޮމިޓީއަށް ޙާޒިރުކޮށްފައެވެ. އެ ކޮމިޓީގައި މިނސިޓަރ ނަހުލާ ވިދާޅުވީ، އައްޑޫ ފްލައިން ސްކޫލުގެ މައްސަލައަށް އޮތް ހައްލަކީ އެހެން ސްކޫލެއް ޤާއިމްކުރުންކަމަށް ވިދާޅުވެފައެވެ.

މިނިސްޓަރ މިހެން ވިދާޅުވެފައިވާއިރު، ޤައުމީ އެއަރލައިން ހިންގާ މޯލްޑިވިއަނުން ވަނީ ފްލައިން ސްކޫލެއް ހިންގަން ޝައުގުވެރިވާ ފަރާތްތައް ހޯދުމަށް އިއުލާންކޮށްފައެވެ. މިގޮތުން މާލީ ގޮތުން ގާބިލުކަންހުރި އަދި ފްލައިން ސްކޫލު ހިންގުމުގެ ތަޖުރިބާ ހުރި ރާއްޖެއާއި ބޭރުގެ ކުންފުނިތަކަށް ވަނީ އެފުރުޞަތު ހުޅުވާލާފައެވެ. އަދި ރާއްޖޭގެ އެއާޕޯޓެއްގައި ފްލައިން ސްކޫލު ހިންގާނީ އެކަމަށް ހާއްސަ ކޮށްށްގެން އުފައްދާ ސަބްސިޑަރީ ކުންފުންޏަކުންކަމަށާއި، އެތަން ހިންގާނީ މިނިވަންކަމާއެކުކަމަށްވެސް އެ އިއުލާންގައި ބުނެފައިވެއެވެ.

އައްޑޫ ފްލައިން ސްކޫލުގެ ދަރިވަރުންގެ ކިޔެވުމާމެދު ގިނަ ޝަކުވާތަކެއް ކަމާބެހޭ ފަރާތްތަކަށް ހުށަހަޅާފައިވާއިރު މައްސަލަ ބަލާފައިވާ އެކި އިދާރާތަކުން ވަނީ މިކަމުގައި ގިނަ އިހުމާލުތަކެއް ހުރިކަން ފާހަގަކުރައްވާފައެވެ. އަދި ފްލައިން ސްކޫލުގައި ހުރި މައްސަލަތަކަށް ހައްލު ހޯދައިދިނުމަށް އެ ދަރިވަރުން ވަނީ އެދިފައެވެ.