މިނީ ބަހުގެ ޚިދުމަތްދިނުން ލަސްވަނީ ފައިސާ ނެތުމުން – މިނިސްޓަރ ނަހުލާ

މިނީ ބަހުގެ ހިދުމަތް ނުފެށި ލަސްވަނީ، އެކަމަށް ބޭނުންވާ ވަރަށް ފައިސާ ނެތުމުން ކަމަށް ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވެއްޖެ އެވެ.

ރައްޔިތުންގެ މަޖިލީހުގެ އިގްތިސާދީ ކޮމެޓީން އޮންލައިންކޮށް ބޭއްވި ބައްދަލުވުމުގައި މެމްބަރެއްގެ ސުވާލަކަށް ޖަވާބު ދެއްވަމުން މިނިސްޓަރު ނަހުލާ ވިދާޅުވީ ޕަބްލިކް ޓްރާންސްޕޯޓް ނުވަތަ މިނީބަހުގެ ހިދުމަތަކީ ރައީސުލްޖުމްހޫރިއްޔާގެ ވައުދުފުޅެއް ކަމަށްވުމާއެކު އެ ހިދުމަތް ފަށަން މަސައްކަތް ކުރަމުންދާ ކަމަށެވެ. ނަމަވެސް އެކި ސަބަބުތަކާ ހުރެ އެކަން ކާމިޔާބުވެފައި ނުވާ ކަމަށް މިނިސްޓަރު ވިދާޅުވި އެވެ. މި ޚިދުމަތްދޭން ފެށުމުގެ ގޮތުން ހިލޭ އެހީގެ ދަށުން ފައިސާ ހޯދަން މަސައްކަތް ކުރަމުންދާ ކަމަށްވެސް މިނިސްޓަރ ވިދާޅުވިއެވެ.

advertisement

“އަޅުގަނޑުމެންނަށް މިއަހަރު ލިބުނު ބަޖެޓުގެ ތެރެއިން ކޮންމެވެސް ވަރެއް އެކަމަށް ކަނޑައެޅުނު. އެއީ 16 މިލިއަން ރުފިޔާ. އެކަމަކު 16 މިލިއަން ރުފިޔާއިން ދެ ބަސް ނުވަތަ ތިން ބަސް ގަނެގެން މި ހިދުމަތް ނުފެއްޓޭނެތީ އެބަޖެޓު ހުރި ގޮތަށް ބަހައްޓާފައި، ހިލޭ އެހީގެ ދަށުން އެއްވެސް ފަރާތަކުން އިތުރަށް އިނާޔަތެއް ލިބޭތޯ މަސައްކަތް ކުރަމުންދަނީ.” މިނިސްޓަރު ވިދާޅުވި އެވެ.

މަސައްކަތް ފަށައިގަތްއިރު ފޮރިން މިނިސްޓްރީ މެދުވެރިކޮށް ބޭރުގެ އެހީއެއް ލިބޭތޯވެސް ބެލި ކަމަށާއި ނަމަވެސް އެކަންވެސް ކާމިޔާބުވެފައި ނުވާ ކަމަށް މިނިސްޓަރު ވިދާޅުވި އެވެ. ޔޫއެންއާއި އިންޑިއަން އެއިޑްއަށް ހުށަހަޅައިގެންވެސް ހިލޭ އެހީ ހޯދުމުގެ މަސައްކަތް ކުރަމުންދާކަމަށް މިނިސްޓަރ ވިދާޅުވިއެވެ.
އެ ހިދުމަތް ފަށަން ކުރިން ރާވާފައި އޮތީ 2020ވަނަ އަހަރުގަ އެވެ. އެކަން ކުރުމަށްޓަކައި 2019ވަނަ އަހަރު އެމްޓީސީސީއާއެކު އެއްބަސްވުމެއްގައިވެސް ވަނީ ސޮއިކޮށްފަ އެވެ.