ސްޕަޓްނިކް ވީ ވެކްސިން ހަދިޔާކުރާނެކަމަށްބުނެ ސަރުކާރަށް ހުށައަޅާފައިވަނީ ފޭކު ލިޔުންތަކެއް

ރަޝިއާ އިން އުފައްދާފައިވާ ސްޕަޓްނިކް ވީ ވެކްސިންގެ 500،000 ޑޯޒް ހަދިޔާ ކުރުމަށް ބޭނުންވާ ކަމަށް ބުނެ ރާއްޖޭގެ އަމިއްލަ ކުންފުންޏަކުން ސަރުކާރަށް ހުށައެޅީ ފޭކު ލިޔުންތަކެއް ކަމަށް ހެލްތް މިނިސްޓަރު އަހުމަދު ނަސީމް ރޭ ވިދާޅުވެއްޖެ އެވެ.

ރާއްޖެއިން ވަނީ 200،000 ޑޯޒްގެ ސްޕަޓްނިކް ވީ ވެކްސިން ވެކްސިން ގަތުމަށް އެއްބަސްވެފައެވެ. މި އެއްބަސްވުން އެކުލަވާލި 500،000 ޑޯޒް ހަދިޔާކުރަން އަމިއްލަ ކުންފުންޏަކުން ސަރުކާރަށް ހުށައަޅާފައިވަނިކޮށް ކަމަށް ބުނެ ބައެއް ނޫސްތަކުގައި ވަނީ ރިޕޯޓްކޮށްފައެވެ.

advertisement

ރޭބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު އަހުމަދު ނަސީމް ވިދާޅުވީ އެ ހުށައެޅުން ލިބުމާއި ގުޅިގެން އެ ސިޓީގެ ސައްހަކަން ބެލުމަށް ފޮރިން މިނިސްޓްރީއަށް ހުށައެޅި ކަމަށާ މިނިސްޓްރީން ބެލި ބެލުމުން ރަޝިޔާގެ ކަމާބެހޭ ފަރާތުން މިއީ ފޭކު ޑޮކިއުމަންޓްތަކެއް ކަމަށް ބުނެފައިވާކަމަށެވެ.

މިނިސްޓަރު ވަނީ މިފަދަ ކަންކަން ނުކުރެއްވުމަށް އިލްތިމާސް ކުރައްވާފައެވެ. އަދި ހަގީގަތެއް ނެތް ވާހަކަތައް ބޭރަށް ނެރެ އާންމު ނުކުރެއްވުމަށްވެސް އެދިވަޑައިގެންނެވިއެވެ.