މިދިޔަ މަހު ހުޅުމާލޭ ފެސިލިޓީގައި އެޑްމިޓްކުރި %93 މީހުން ވެކްސިންގެ 2 ޑޯޒް ފުރިހަމަ ނުކުރޭ

މިދިޔަ މޭއިމަހު ހުޅުމާލެ މެޑިކަލް ފެސިލިޓީގަ އެޑްމިޓްކޮށްގެން ފަރުވާ ހޯދި މީހުންގެތެރެއިން %93 މީހުންނަކީ ވެކްސިންގެ 2 ޑޯޒް ފުރިހަމަ ނުކުރާ މީހުން ކަމަށް ހެލްތު އިމަރޖެންސީ އޮޕަރޭޝަން ސެންޓަރ އެޗްއީއޯސީން ހާމަކޮށްފިއެވެ.

ހެލްތު އިމަރޖެންސީ އޮޕަރޭޝަން ސެންޓަރ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް އޮފީހުގެ ތަރުޖަމާނު މުޙައްމަދު މަބްރޫކް އަޒީޒް ވިދާޅުވީ، އެޑްމިޓްކޮށްގެން ފަރުވާދޭންޖެހުނު މީހުންގެ ބޮޑު އިންސައްތައަކީ ވެކްސިންގެ ދެވަނަ ޑޯޒް ފުރިހަމަކޮށްފައި ނުވާ މީހުންކަމަށެވެ. އެގޮތުން މިދިޔަ މަހު ހުޅުމާލޭ މެޑިކަލް ފެސިލިޓީން އެޑްމިޓްކޮށްގެން ފަރުވާދިން މީހުންގެ ތެރެއިން %93 މީހުންނަކީ ކޯވިޑް ވެކްސިންގެ 2 ޑޯޒް ފުރިހަމަކޮށްފައިނުވާ މީހުންކަމަށް އޭނާ ވިދާޅުވިއެވެ.

advertisement

ހެލްތު ޕްރޮޓެކްޝަން އެޖެންސީ އެޗްޕީއޭއިން ހާމަކޮށްފައިވާ މަޢުލޫމާތަށް ބަލާއިރު، ނިމުނު މޭއި މަހު ހުޅުމާލެ މެޑިކަލް ފެސިލިޓީގަ 725މީހުންނަށް ފަރުވާދީފައިވާއިރު މޭއި މަސް ނިމުނު އިރު ފަރުވާދީ 718މީހުން މެޑިކަލް ފެސިލިޓީންވަނީ ދޫކޮށްލާފައެވެ.

ކޯވިޑް ބަލީގައި މިވަގުތުވެސް އެޑްމިޓްކޮށްގެން 166މީހުން އަންނަނީ ފަރުވާ ހޯދަމުންނެވެ. އޭގެ ތެރެއިން ހުޅުމާލޭ މެޑިކަލް ފެސިލިޓީގަ 89މީހުންނަށް މިހާރު އަންނަނީ ފަރުވާދެމުންނެވެ. މީގެ ތެރެއިން މެޑިކަލް ފެސިލިޓީގެ އައިސީޔޫގަ 8މީހުންނަށް ފަރުވާދެމުން އަންނައިރު، 5 މީހުންނަށް ފަރުވާދެނީ ވެންޓިލޭޓަރުގެ އެހީގައެވެ.

ދަރުމަވަންތަ ހޮސްޕިޓަލްގަ 26 މީހުންނަށް އަންނަނީ ފަރުވާދެމުންނެވެ. ހުޅުމާލޭ ހޮސްޕިޓަލް ފެސިލިޓީގަ 20މީހުންނަށް އެޑްމިޓްކޮށް އަންނަނީ ފަރުވާދެމުންނެވެ. އަދި އޭޑީކޭގަ ކޯވިޑް ބަލީގެ 4 މީހަކަށް އަންނަނީ ފަރުވާދެމުންނެވެ.

ރާއްޖޭގަ 300000އަށްވުރެ ގިނަ މީހުންނަށް ވެކްސިންގެ ފުރަތަމަ ޑޯޒްވަނީ ދީފައެވެ. މިހާތަނަށް ދެވަނަ ޑޯޒް 170000އަށްވުރެ ގިނަ މީހުން ފުރިހަމަކޮށްފައިވެއެވެ.