މަމްސް އެންޖީއޯގެ “ހެލްޕް އަ ފެމިލީ ދިސް ރަމަޟާން” ކެމްޕެއިނަށް ލައްކައަކަށްވުރެ ގިނަ ރުފިޔާ

މިދިޔަ ރަމަޟާންމަހު މަމްސް އެންޖީއޯއިން ކުރިއަށްގެންދިޔަ “ހެލްޕް އަ ފެމިލީ ދިސް ރަމަޟާން” ކެމްޕެއިނަށް 145،555 ރުފިޔާ ލިބިފައިވާކަމަށް އެ ޖަމިއްޔާއިން ހާމަކޮށްފިއެވެ.

މަމްސް އެންޖީއޯއިން ވިދާޅުވީ، މި ފައިސާގެ ތެރެއިން 118،334 ރުފިޔާ ޚަރަދުކޮށްފައިވާކަމަށެވެ. މި ކެމްޕެއިންގެ ތެރެއިން މަމްސް އެންޖީއޯއިން ވަނީ ހާލުގައި ދިރިއުޅެމުންދާ އާއިލާތައް ދެނެގަނެ ކާބޯތަކެތި ހިމެނޭ ޕެކޭޖްތައް އެ އާއިލާތަކަށް ފޯރުކޮށްދީފައެވެ. މިގޮތުން މާލެ އަދި ރާއްޖެތެރޭގެ އެކި ކަންކޮޅުތަކުގައި ދިރިއުޅެމުންދިޔަ 125 އާއިލާއަކަށް މި ކެމްޕެއިންގެ ދަށުން ވަނީ އެހީތެރިކަން ފޯރުކޮށްދީފައެވެ.

advertisement

ކޮންމެ އާއިލާއަކަށް ފޯރުކޮށްދީފައިވަނީ 1000 ރުފިޔާގެ ޕެކޭޖެކެވެ. މި ޕެކޭޖްތަކުގައި ހިމެނެނީ ރަމަޟާންމަހު އާންމުގޮތެއްގައި ކެއިންބުއިމަށް ބޭނުންކުރާ ތަކެތިކަމަށް މަމްސް އެންޖީއޯއިން ވިދާޅުވެއެވެ. މި ޕެކޭޖްތަކުގެ ސަބަބުން ރަމަޟާންމަހު ކެއިންބުއިމުގެ ކަންކަން ހަމަޖެއްސެން ނެތް އާއިލާތަކަށް ވަރަށް ބޮޑު ލުޔެއް ލިބިފައިވާކަން އެ ޖަމިއްޔާއިން ފާހަގަކުރެއެވެ.

މި ޕެކޭޖްތަކުގެ އިތުރުން ވަރަށް ހާލުގައި ދިރިއުޅެމުންދިޔަ އާއިލާތަކަށް ވަނީ 4000 ރުފިޔާގެ ޕެކޭޖްތަކެއް ހަވާލުކޮށްފައެވެ. މަމްސް އެންޖީއޯއިން ބުނީ މި ކެންޕެއިން މިހާ ފުރިހަމަކަމާއިއެކު ކުރިއަށްގެންދެވުނީ މަމްސް ކޮމިއުނިޓީއާއި ކާބޯތަކެތި ސްޕޮންސަރ ކޮށްދެއްވި ވިޔަފާރިތަކާއި މި ކެމްޕެއިނަށް އެހެނިހެން ގޮތްގޮތުން އެހީތެރިވެދިން ފަރާތްތަކުގެ އެއްބާރުލުމުގެ ސަބަބުން ކަމަށެވެ. އެހެންކަމުން އެ ހުރިހައި ފަރާތްތަކަށް މަމްސް އެންޖީއޯއިން ވަނީ ޝުކުރު އަދާކޮށްފައެވެ.

މި ކެމްފެއިނުން ލިބިފައިވާ ފައިސާ ކެމްޕެއިން ނިމުނު ކަމުގައިވިއަސް ހާލުގައި ދިރިއުޅެމުންދާ އެހެން އާއިލާތަކަށް އެހީތެރިވުމުގެ ގޮތުން ބޭނުންކުރެވިގެންދާނެކަމަށް މަމްސް އެންޖީއޯއިން ބުނެއެވެ.